Read Talaud SASABANGNGA 35 Bible Online

SASABANGNGA 35 - Talaud bible

SASABANGNGA 35

¹I Musa nangammulu anambon balahannu Israel ana see nabbisara si mangitou, “Indiwe parentan MAWU si yamiu;

²Pia annummu allo ipammanara, arawe allo appitune eteudde allo pangillol᷊oanna, allo wahewalla apan niṛṛae su MAWU. Isai apan mammanara su allon Sabat ṛinone iṛṛuumanna pateanna.

³Su allo udde i yamiu tawe wotongnge makkunuttu putungnga su wal᷊enu.”

⁴I Musa nabbisara su anambon balahannu Israel, “Arendiwe parentan MAWU;

⁵Apira'e sasamba su MAWU. Isai apan umal᷊ore naungnge, ṛinone mangonggolu wul᷊awanna, sal᷊a'a wuṛṛu witu'a;

⁶linen al᷊ussa, wol ma'elomma, ungu wuṛṛu maṛṛamu; mal᷊aṛṛenessa wuassu pisin ambingnga;

⁷pisin domba esakka apan niwuṛṛannu maṛṛamu; pisi al᷊ussa, alu akasia,

⁸lanan sol᷊o; rampa-rampa lanan lal᷊aghu wuṛṛu amania mawangngi,

⁹permata delima wuṛṛu permata waine apan ire'etta su laubbu imam wuṛṛu lal᷊indumma ro'on Imam Bahewalla.”

¹⁰“Anambon taumata masingkatta mammanara apan pia asingkatta su wallati yamiu ṛinone rumanta ma'ola'a sarangkanambone apan niparentan MAWU, eteudde:

¹¹Rasanna, atuppa wuṛṛu lal᷊aabbe, aaitta wuṛṛu salabbune, manga alu wawarene, diṛṛin ngara wuṛṛu apampakke;

¹²Wantallu Pa'aire ringannu alu papasannane, lal᷊uubbe wuṛṛu mal᷊aṛṛenessa tataamme;

¹³medda ringannu alu papasannane, anambon saranapane wuṛṛu roti ia'imbe

¹⁴leddan sol᷊o ipanemakka ringannu saranapane, sol᷊o wuṛṛu lanane;

¹⁵mezbah tampan panutunganna amania ringannu alu papasannane, lanan lal᷊aghu, amania mawangngi; pampelen ngaran Dasanna,

¹⁶mezbah panutunganna sasamba ringannu manga taraline wuassu witu'a, alu papasannane ringannu anambon saranapane, loyanga tampan pabbansal᷊anna ringannu apampakke,

¹⁷manga senggota ipaatta su rallaka, manga diṛṛi ringannu apampakke, pampele ngaran dallaka,

¹⁸manga pati'anna wuṛṛu manga tal᷊in Dasanna wuṛṛu ipaata su rallaka;

¹⁹laubbu patataṛṛamawun manga imam su tempo i mangitou mammanara su Wabbo'a Susi wuṛṛu laubbi imam i Harun sassane, wuṛṛu manga anangnge.”

²⁰Ana see anambon taumatan Israel apan uaammula udde nassal᷊iawukka,

²¹wuṛṛu suapan isai apan niumal᷊ore naungnge, mangapiddu sasamba su MAWU ipanuungngu Rasannu MAWU. I mangitou lai nangapiddu anambon saranapa pappandumannu patataṛṛamawu wuṛṛu mal᷊aṛṛenessa olaanna laubbu imam.

²²Walate isai apan mappulu, mawae esakka ara'e wawine, rumanta mangapiddu lapaneti wul᷊awanna, ngante-ngante, sinsingnga, wul᷊ele, wuṛṛu al᷊awo'u hatin lal᷊oggakka wul᷊awanna apan ionggola su MAWU.

²³Suapan taumata apan uatahuanna mal᷊aṛṛenessa linen al᷊ussa, mal᷊aṛṛenessa wol ma'elomma, ungu ara'e maṛṛamu, mal᷊aṛṛenessa wuassu wambul᷊un ambingnga, pisin domba esakka apan niwuṛṛannu maṛṛamu, ara'e pisi al᷊ussa, ṛinone mangonggolu saranapa udde.

²⁴Suapan taumata apan botongnge mangonggolu sal᷊a'a ara'e witu'a, apira'e ringannu MAWU. Aroddi lai niola'u manga taumata apan uatahuanna alu akasia hunan manara udde.

²⁵Manga wawine apan pande mandadu'a mangapiddu wananna linen al᷊ussa see lai wananna wol ma'elomma, ungu wuṛṛu maṛṛamu apan buatte niola'i mangitou.

²⁶I mangitou lai nangandongngu wananna wuassu wambul᷊un ambingnga.

²⁷Manga piaṛṛangnge uaapiddu permata delima wuṛṛu manga permata waine apan itabbi'a sulaubbu imam wuṛṛu lal᷊indumma ro'o.

²⁸I mangitou lai uaapiddu rampa-rampa wuṛṛu lanan sol᷊o, lanan lal᷊aghu wuṛṛu amania apan mawangngi.

²⁹Taumattan Israel sarangkanambone ringanu naungnga mal᷊uassa nangapiddu aonggoli mangitou su MAWU su ola'u manara apan nirolokku MAWU si Musa.

³⁰Wua'udde i Musa nabbisara taumatan Israel, “MAWU buatte namile si Bezaleel ana'i Uri, pulunni Hur, wuassu ṛuanganni Yehuda

³¹wuṛṛu i tou nionggol᷊annu taṛṛino-Ne. MAWU nangonggolu pasasunna si tou, apande wuṛṛu asingkatta su al᷊awo'u hatin manara mangnguitta,

³²ipa'ola'a ṛiinnu manara apan mappandumma asingkatta, see ma'ola'a udde wuassu wul᷊awanna, sal᷊a'a wuṛṛu witu'a;

³³ipangasan batu permata apan sarun ipallogakka; ipanguitta alu wuṛṛu al᷊awo'u hatin manara mangnguitta waine.

³⁴Si Bezaleel wuṛṛu si Aholiab, ana'i Ahisamakh wuassu ṛuanganni Dan, MAWU nangonggolu apande iapaaṛṛa'u asingkatti mangitou su taumata waine.

³⁵I mangitou nionggol᷊annu apande sulal᷊ummu al᷊awo'u hatin manara apan ao'alaannu mapapanden mangnguitta, maṛṛaṛṛingidda wuṛṛu pande mandadu'u linen al᷊ussa, wol ma'elomma, ungu wuṛṛu maṛṛamu, wuṛṛu mal᷊aṛṛenessa waine. Ete i mangitou udde maṛṛaṛṛingidde apan pande wuṛṛu wotongnge ma'ola'a al᷊awo'u hatin manara.