Read Talaud SASABANGNGA 37 Bible Online

SASABANGNGA 37 - Talaud bible

SASABANGNGA 37

¹I Bezaleel na'ola'a Wantallu Pa'aire wuassu alu akasia, al᷊o'engnge 110 sentimetere, al᷊alakke wuṛṛu atanggakke sambau-sambau 66 sentimetere.

²Wageangngu lal᷊umme wuṛṛu liudde nioosannu wul᷊awanna tutune, ana see niolaanna wingkene wul᷊awanna uapal᷊iwutta.

³Wua'udde i tou na'ola'a appata hal᷊angnga wul᷊awanna su alu papasannane wuṛṛu nipase su appatu leddan bantalla udde, hal᷊angnga darua suapan sandiṛṛanne.

⁴I tou lai na'ola'a papasannane wuassu alu akasia, wuṛṛu nioosannu wul᷊awanna,

⁵ana see alu papasannane udde nisuṛṛi su hal᷊angnga suapan sandiṛṛannu wantalla udde.

⁶Wua'udde i tou lai na'ola'a lal᷊uubbe wuassu wul᷊awanna tutune, al᷊o'engnge 110 sentimetere wuṛṛu al᷊alakke 66 sentimetere.

⁷I tou na'ola'a lai darua mala'ekatta wuassu wul᷊awanna nisassala,

⁸sambau niaddo suapan pentakku lal᷊uubbe udde. Mala'ekatta darua udde niṛṛaiddu lal᷊uubbe

⁹wuṛṛu niola'a uasasaruanna, ringannu papaidde uati'akka uataappa lal᷊uubu wantalla udde.

¹⁰I Bezaleel na'ola'a medda wuassu alu akasia, al᷊o'engnge 88 sentimetere, al᷊alakke 44 sentimetere wuṛṛu atanggakke 66 sentimetere.

¹¹Medda udde nioosannu wul᷊awanna tutune wuṛṛu nipal᷊iwutannu wingke wul᷊awanna.

¹²Ana see i tou na'ola'a wiwikku medda al᷊alakke 7,5 sentimetere. Wiwikke udde niolaana wingke wul᷊awanna uapal᷊iwutta.

¹³I tou lai na'ola'a appata hal᷊angnga su alu papasannane wuṛṛu nisuṛṛi su wuune appata wuassu leddan medda.

¹⁴Hal᷊angnga ipanaṛṛangnga alu papasannane nisuṛṛi maranin biwikku medda.

¹⁵Papasannane udde niola'a wuassu alu akasia wuṛṛu nioosanu wul᷊awanna.

¹⁶I tou lai na'ola'a manga lama'a, manga halasi, wensadda wuṛṛu manga pangadoannu sasamba ua'e anggore. Anambon asasuungngu medda udde niolangnge wuassu wul᷊awanna tutune.

¹⁷I Bezaleel na'ola'a leddan sol᷊o wuassu wul᷊awanna tutune. Apampakke wuṛṛu pangagasanne niola'a wuassu wul᷊awanna nisassalla. Manga wunga lal᷊ogakke, nasutta lal᷊uwone wuṛṛu wantine niṛṛaiddu pangagasanne.

¹⁸Su pangagasanne udde niola'a annumma pengane, tatalu pengane suapan sandiṛṛanne.

¹⁹Suapan pengane sambau niolaanna lal᷊ogakke tatallu wunga badam ringannu lal᷊uwone wuṛṛu wantine.

²⁰Su pangagasanne na'ola'a lalogakke appata wunga badam ringannu lal᷊uwone wuṛṛu wantine.

²¹Su al᷊ungngu suapan sampare pengane udde na'ola'a sambau lal᷊uwo.

²²Leddan sol᷊o sarangkanambone udde ringannu manga lal᷊uwo wuṛṛu manga rannane niola'a wuassu sangkabuwu wul᷊awanna tutune apan nisassala.

²³Su leddan sol᷊o udde niolangnge pitu sol᷊o ringannu bawaresi sumbun sol᷊o wuṛṛu pangadoanne wuassu wul᷊awanna tutune.

²⁴Su ipa'ola'a leddan sol᷊o wuṛṛu manga saranapane pappandumanna 35 su kilone wul᷊awanna tutune.

²⁵I Bezaleel na'ola'a wuassu alu akasia sambau mezbah tampan panutunganna amania. Mezbah udde saṛṛene uataṛṛa wu'u appata; al᷊o'engnge wuṛṛu al᷊alakke sambau-sambau 45 sentimetere. Su wuune appata al᷊iu rosone niola'a tatandua apan niṛṛaiddu mezbah udde.

²⁶Wageangnge al᷊iu rosone, su sandiṛṛanne appata wuṛṛu manga tatandu'a nioossu wul᷊awanna tutune wuṛṛu niolaanna wingkene wul᷊awanna uapal᷊iwutta.

²⁷I tou lai na'ola'a darua hal᷊angnga su al᷊ungngu darua wingke wul᷊awanna su sandiṛṛanne darua ipanaṛṛangnga alu papasannu mezbah udde.

²⁸Papasanna udde niola'a wuassu alu akasia wuṛṛu nioosannu wul᷊awanna.

²⁹I Bezaleel lai na'ola'a lanan lal᷊aghu wuṛṛu amania tutune apan mawangngi, nipallalo'a naal᷊ihidda lana mawangngi.