Read Talaud SASABANGNGA 38 Bible Online

SASABANGNGA 38 - Talaud bible

SASABANGNGA 38

¹I Bezaleel nanganu alu akasia, ana see i tou na'ola'a mezbah sasamba itattambunna. Mezbah udde saṛṛene uataṛṛa wu'u appata, al᷊o'engnge wuṛṛu al᷊alakke sambau-sambau 2,2 metere, wuṛṛu atanggake 1,3 metere.

²Su al᷊awo'u wuune al᷊iu rosone niolaanna tatandu'a apan uaṛṛaiddu mezbah udde. Sarangkahewalle nioosannu witu'a.

³I tou lai na'ola'a manga urinna, sikopo, manga mangko, manga porokka wuṛṛu tampan putungnga. Anambon saranapa udde niola'a wuassu witu'a.

⁴I tou lai nanganamma kawa wuassu witu'a apan niwa'issa su wageangngu mezbah al᷊iu wowane, atanggake mattangnga wuassu atanggakku mezbah.

⁵Ana see i tou na'ola'a appata hal᷊angnga su alu papasannane su wuune appata al᷊iu wowane.

⁶Alu papasannane udde niola'i tou wuassu alu akasia apan nioosannu witu'a.

⁷Ana see alu papasanna darua udde nisuṛṛi sulal᷊ummu manga hal᷊angnga su mezbah sandiṛṛanne ruan ba'a. Mezbah udde niolangnge wuassu pappala wuṛṛu wageangngu lal᷊umme pia loṛṛangnge.

⁸I Bezaleel na'ola'a tampan ua'e witu'a ringannu apampakke witu'a. Witu'a udde wuassu manga saṛṛuminanna pussa'an manga wawine apan mangngimbe su ngaran Dasannu MAWU.

⁹I Bezaleel namaggala rallaku Rasannu MAWU ringannu senggota wuassu mal᷊aṛṛenessa linen al᷊ussa. Su samba'an timukka, al᷊o'engnge 44 metere,

¹⁰tataṛṛangannu ruan pul᷊o diṛṛi witu'a, sambau-sambau ringannu apampakke witu'a, ringannu aaitta wuṛṛu pangeleanne wuassu sal᷊a'a.

¹¹Su samba'a sawannaka niola'a ereudde lai.

¹²Su samba'an baṛṛata niele senggota al᷊o'engnge 22 su meterene, ringannu mapul᷊o diṛṛi wuṛṛu mapul᷊o apampakke; aaitta wuwu sasampangnge niola'a wuassu sal᷊a'a.

¹³Su samba'an da'i, apan pia ngarane, al᷊alakku senggone 22 su meterene.

¹⁴Su aiṛṛi wuṛṛu aikatannu ngara udde nieleannu senggota, sambau-sambau al᷊o'engnge 6,6 su meterene, ringannu tatallu diṛṛi wuṛṛu tatallu apampakke.

¹⁶Anambon senggota uapal᷊iwutta rallaka udde niola'a wuassu mal᷊aṛṛenessa linen al᷊ussa.

¹⁷Apampakku manga diṛṛine niola'a wuassu witu'a, wuṛṛu aainne, sasampangnge wuṛṛu oto'u diṛṛine niola'a wuassu sal᷊a'a. Anambon diṛṛi su ahewallu rallaka udde nipasasampa'a ringannu aaitta sal᷊a'a.

¹⁸Pampele ngaran rallaka udde niola'a wuassu linen al᷊ussa apan niraddu'u wol ma'elomma, ungu wuṛṛu maṛṛamu wuṛṛu nilogaṛṛannu karawanga. Al᷊o'engnge sio metere wuṛṛu atanggake rua metere, nassul᷊ungngu senggotu rallaka.

¹⁹Pampele ngara udde tataṛṛangannu appata diṛṛi ringannu appata apampakke wuassu witu'a. Anambon aainne, lal᷊uubbu puidde wuṛṛu manga pangaitanne niola'a wuassu sal᷊a'a,

²⁰arawe manga pati'annu Rasanna wuṛṛu tatandangnge niola'a wuassu witu'a.

²¹Eteindi arannu logamma apan nipaatta sulal᷊ummu Rasannu MAWU, tampan batu rarua ringannu Mapul᷊o Titan Duata udde sinahipunna. Manga aranna niola'a wuassu parentan i Musa wuṛṛu niatokku manga taumatan Lewi apan mammanara su al᷊ungngu piaṛṛa'i Itamar, ana'i Imam Harun.

²²I Bezaleel ana'i Uri, pulunni Hur wuassu ṛuanganni Yehuda, na'ola'a sarangkanambone apan nirolokku MAWU.

²³Mallal᷊al᷊imane, i Aholiab ana'i Ahisamakh wuassu ṛuanganni Dan, eteudde sangkatou pande manguitta, mallaṛṛiinna wuṛṛu mandaradu'u mal᷊aṛṛenessa linen al᷊ussa, see wol ma'elomma, ungu wuṛṛu maṛṛamu.

²⁴Wul᷊awanna apan nionggola su MAWU nipa'ola'a Rasanna Susi sarangkanambone saṛṛiwu su kilone, nitimbangnga tumuṛṛuttu timbanganna apan ipappaatta su Rasannu MAWU.

²⁵Sal᷊a'a apan niasombanganna wuassu pandare'engngu walahannu Israel anambone 3.430 su kilone nitimbangnga tumuṛṛuttu timbanganna apan ipappaatta su Rasannu MAWU.

²⁶Reenganna udde uasul᷊ungngu apa apan buatte niwaeṛṛannu taumata apan nawoṛṛetta sulal᷊ummu sensus udde. Suapan taumata, mamaekka aregane apan buatte nitantunna, nitimbangnga tumuṛṛuttu timbanganna apan ipappaatta. Sulal᷊ummu sensus udde nawoṛṛetta 603.550 esakka uukke ruan pul᷊o su tonnane ire'e.

²⁷Wuassu sal᷊a'a udde, 3.400 su kilone nipaatta pina'ola'a maṛṛasutta apampakku diṛṛin Dasannu MAWU wuṛṛu pampele ngarane. Suapan apampakke awakkanne 34 su kilone.

²⁸Wuassu lamben sal᷊a'a udde, anambone 30 su kilone, i Bezaleel na'ola'a manga sasampangnge wuṛṛu manga aaittu manga diṛṛi, see lai lal᷊uubbu puiddu manga diṛṛi udde.

²⁹Witu'a apan nionggola su MAWU sarangkanambone 2.425 su kilone.

³⁰Witu'a udde nipaatta pina'ola'a apampakku ngaran Dasannu MAWU, mezbah ringannu kawa nianamma wuassu witu'a, anambon saranapan mezbah,

³¹apampakku senggota uapal᷊iwutta rallaka wuṛṛu ngaran pasallanganna, anambon pati'annu Rasanna ahewallu rallake.