Read Talaud SASABANGNGA 39 Bible Online

SASABANGNGA 39 - Talaud bible

SASABANGNGA 39

¹I Bezaleel wuṛṛu i Aholiab na'ola'a laubbu patataṛṛamawu wuassu wol ma'elomma, ungu wuṛṛu maṛṛamu iluṛṛem manga imam su tempo i mangitou mammanara su Wabbo'a Susi. Laubbu imam iluṛṛe si Harun niola'a ere darolokku MAWU si Musa.

²Laubbu imam niola'a wuassu mal᷊aṛṛenessa linen al᷊ussa, wol ma'elomma, ungu wuṛṛu maṛṛamu, wuṛṛu wananna wul᷊awanna.

³I mangitou nanassalla manga wul᷊awanna apan wua'udde nipototta nabbal᷊i wananna manipissa, ana see niraddu'u mal᷊aṛṛenessa linen al᷊ussa wuṛṛu wol ma'elomma, ungu wuṛṛu maṛṛamu.

⁴Wua'udde na'ola'a darua tal᷊in bambangnga ipama'issa laubbu imam apan nitabbi'a su sandiṛṛanne.

⁵Papeṛṛetta apan niraddu'a al᷊ussa niola'a wuassu mal᷊aṛṛenessa apan uasul᷊ungnga wuṛṛu nitabbi'a su laubbu imam udde na'oman sara nabbal᷊i wageangnge sambau ere buatte niparentan MAWU si Musa.

⁶I mangitou nangasan batu delima ana see nitaṛṛo sulal᷊ummu wingke wul᷊awanna. Ringannu napenen asingkatta i mangitou nanguitta manga arannu mapul᷊o dua ana'i Yakub su manga watu udde.

⁷Wua'udde manga watu udde nitabbia'a su tal᷊in bambangngu laubbu imam maola'a tatiala pananaunganna su mapul᷊o dua ṛuangannu Israel, ere buatte niparentan MAWU si Musa.

⁸I Bezaleel wuṛṛu i Aholiab na'ola'a lal᷊indumma ro'o wuassu mal᷊aṛṛenessa apan uasul᷊ungngu laubbu imam, wuṛṛu karawange lai uasul᷊ugnga.

⁹Saṛṛene uataṛṛawu'u appata wuṛṛu nilappu darua, al᷊alakke wuṛṛu al᷊o'engnge sambau-sambau 22 sentimetere.

¹⁰Su lal᷊indumma ro'o udde i mangitou nangelen appatu raddaga watu permata. Su raddage paarorone watu delima, topas wuṛṛu baiduri sepah.

¹¹Su raddage aruane zamrud, watu nilam wuṛṛu intan.

¹²Su raddage atallune watu lazuardi, akik wuṛṛu watu kecubung.

¹³Su raddage aiappane watu pirus, yakut, wuṛṛu ratna cempaka. Mapul᷊o dua permata udde niwa'issu wul᷊awanna.

¹⁴Su tiappu sambau permata ni'uitta arannu sangkatou su wallatu mapul᷊o dua ana'i Yakub maola'a pananaunganna su manga ṛuangannu Israel.

¹⁵Ana see niola'a darua ṛate wuassu wul᷊awanna tutune apan niandongnga ere tal᷊i.

¹⁶Niola'a lai darua hal᷊angnga wul᷊awanna apan nipase su pentakke darua al᷊iu rosone su lal᷊indummu ro'o udde.

¹⁷Ana see darua ṛate wul᷊awanna udde nisuṛṛi sulal᷊ummu manga hal᷊angnga udde,

¹⁸wuṛṛu pentakke darua waine niwa'issa su darua wingke, na'oman sara lal᷊idumma ro'o udde wotongnge isampa'u wageangngu tal᷊in bambangngu saruanne wuassu laubbu imam.

¹⁹Ana see niola'a lai darua hal᷊angnga wul᷊awanna apia apan nipase su lal᷊indumma ro'o udde su pentakke wowane wageangngu lal᷊umme apan niaṛṛinoannu laubbu imam.

²⁰Wua'udde niola'a darua hal᷊angnga wul᷊awanna apan nipase su saruannu darua tal᷊in bambangngu laubbu imam, maranin sampa'u tatabinge maranin bowane, su wowon papeṛṛetta apan niraddu'a al᷊ussa.

²¹Nassul᷊ungngu parentan MAWU si Musa, hal᷊angngu lal᷊indumma ro'o nisampa'u tal᷊i ma'elomma su hal᷊angngu laubbu imam, na'oman sara lal᷊indumma ro'o udde sidutu su wowon papeṛṛetta wuṛṛu tawe mal᷊uatta.

²²Juba apan uaṛṛawanna laubbu imam, sarangkahewalle niola'a wuassu wol ma'elomma.

²³Loṛṛangngu ulekkane nitohassu tal᷊i niraddu'a tadea'u tawe mahesa'a.

²⁴Uapal᷊iwutta wiwikke wowane niola'a hambarannu wuan delima wuasu mal᷊aṛṛenessa linen al᷊ussa wuṛṛu wol ma'elomma, ungu wuṛṛu maṛṛamu, niwallatannu wawungkelene wuassu wul᷊awanna, ere buatte niparentan MAWU si Musa.

²⁷I mangitou na'ola'a kamejan i Harun wuṛṛu manga anangnge,

²⁸see lai paporongnga, dastere sal᷊ana maa'utta wuassu linen,

²⁹wuṛṛu papeṛṛetta wuassu mal᷊aṛṛenessa linen al᷊ussa, wol ma'elomma, ungu wuṛṛu maṛṛamu, nilogaṛṛannu suji, ere buatte niparentan MAWU si Musa.

³⁰See lai niola'a hambaranna wuassu wul᷊awanna tutune, tatiala manungku i mangitou buatte niṛṛaen MAWU. Su hambaranna udde ni'uitta manga wisara “Niṛṛae hunan MAWU”.

³¹Lal᷊ogakka udde nireetta su saruannu paporongnga, ere buatte niparentan MAWU si Musa.

³²Panginsueanne nuddusse anambon manara ma'ola'a Rasannu MAWU. Taumatan Israel buatte na'ola'a sarangkanambone ere buatte niparentan MAWU si Musa.

³³I mangitou nangapidda ringanni Musa Rasanna ringannu al᷊awo'u saranapane, manga aainne,manga alu wawarene, manga diṛṛi wuṛṛu apampakke,

³⁴lal᷊uubbe wuassu pisin ambinga esakka apan niwuṛṛannu maṛṛamu, lal᷊uubbe wuassu pisi al᷊ussa, mal᷊aṛṛenessa tatindungnga.

³⁵Wantallu Pa'aire apan lal᷊oṛṛoannu watu darua ringannu alu papasannane wuṛṛu lal᷊uubbe,

³⁶medda wuṛṛu anambon saranapane wuṛṛu roti ia'imbe,

³⁷leddan sol᷊o wuassu wul᷊awanna tutune, manga sol᷊one ringannu al᷊awo'u saranapane, lanan sol᷊o,

³⁸mezbah wuassu wul᷊awanna, lanan lal᷊aghu, amania mawangngi, pampelen ngaran Dasanna,

³⁹mezbah witu'a ringannu kawa nianamma wuassu witu'a, alu papasanna ringannu al᷊awo'u saranapane; bakka tampan pangukkasanna ringannu apampakke,

⁴⁰manga senggotu rallaka wuṛṛu manga diṛṛi see apampakke, pampelen ngaran pasallanganna see manga tal᷊ine, manga pati'annu Rasanna; anambon aolangnge apan ipaatta sulal᷊ummu Rasanna,

⁴¹wuṛṛu laubbu patataṛṛamawu manga imam su tempo i mangitou mammanara su Wabbo'a Susi wuṛṛu laubba apan niṛṛae si Musa wuṛṛu manga anangnge.

⁴²Taumatan Israel buatte nammanara sarangkanambone ere buatte niparentan MAWU si Musa.

⁴³I Musa namarikissa sarangkanambone wuṛṛu naasilo manungku i mangitou buatte na'ola'a uasul᷊ungngu parentan MAWU. Ana see i Musa nangal᷊amatta si mangitou.