Read Talaud SASABANGNGA 4 Bible Online

SASABANGNGA 4 - Talaud bible

SASABANGNGA 4

¹Ana see i Musa sinumimbakka MAWU, “Arawe ereapate amungkangngu unnu wisara manga taumatan Israel tawe mangimanna wuṛṛu maddiri tumuṛṛutta manga wisara'u? Apa ṛinone ta'u olaanna unnu wisara i mangitou mabbisara manungku MAWU tawe naipasilon batangan-Ne si ya'u?”

²MAWU naiwal᷊o si Musa, “Apa udde aagasannu?” I Musa sinumimbakka, “Ta'inna.”

³Unnu MAWU, “Lomboa'a udde su leta'a.” I Musa nallombon ta'inna udde, ana see ta'inna udde nawal᷊u nabali atoanna wuṛṛu i Musa tinumal᷊angnga nangindau.

⁴MAWU nabbisara si Musa, “Undanie atoanna udde, wuṛṛu aggassa tol᷊ene.” I Musa nangundani wuṛṛu nanametta atoanna udde apan apiddu nawal᷊u nabbal᷊i ta'inna su ta'iakki Musa.

⁵Unnu MAWU, “Pa'ola'e aroddi tadea'u manga taumatan Israel mangimanna manungku i Ya'u, MAWU, Ruata iupungngu al᷊amona mangitou, Ruatan Abraham, Ishak wuṛṛu Yakub, buatte naipasilon batangan-Ne si'o.”

⁶MAWU nabbisara apia si Musa, “Sutta'e limanu sulal᷊ummu laungngu.” I Musa tinumuṛṛutta, wuṛṛu napawe i tou napasabangngu limane, lima udde mawira atonna ana waugu naṛṛinoannu radda'a su pisi apan maata'utta.

⁷Ana see MAWU nabbisara, “Sutta'e limane apia sulal᷊ummu laungngu.” I Musa tinumuṛṛutta, wuṛṛu napawe i tou napasabangnga apia, limane udde napiate.

⁸Unnu MAWU, “Amungkangngu i mangitou maddiri mangimanna si'o, ara'e tawe mangimanna napawe buatte na'ala'a al᷊aṛṛindu'a paarorone, ne al᷊aṛṛindu'a indi sarun ma'ola'a si mangitou mangimanna.

⁹Amungkangngu i mangitou ta'e lai maddiri mangimanna si'o salaiwe buatte naasilo al᷊aṛṛindu'a darua indi, wuṛṛu i mangitou madiri maddaringikka manga wisaranu, panganu ua'e addio'a wuassu Sal᷊ukku Nil wuṛṛu lal᷊ina'a su leta'a. Ua'e udde sarun mawal᷊u mabal᷊i daṛṛa.”

¹⁰Arawe i Musa nabbisara, “Oh, Mawu, i ya'u wal᷊inewe taumata pande masinaukka, mawae ete dorone aroddi lai orassa indi, napawe MAWU buatte nabbisara si ya'u. Lila'u mawakkata, mabbisara mal᷊iwue wuṛṛu tawe masaṛṛawutta.”

¹¹MAWU nabbisara si tou, “Isai apan nagonggolu moṛṛongnga su taumata? Isai apan na'ola'a si tou mou ara'e wengella? Isai na'ola'a si tou alla ara'e wuta? Wal᷊inewe i Ya'u, MAWU?

¹²Orassa indi, roote, i Ya'u sarun mantul᷊ungngu mabbisara wuṛṛu mangaṛṛa'u sarangkanambone apan ṛinone iwisaranu.”

¹³Arawe i Musa sinumimbakka, “I Ya'u sumal᷊ande, ariete pandolo'u, oh Mawu, pandolokken taumata waine.”

¹⁴Ana see MAWU nabbal᷊i nasa'u si Musa wuṛṛu nabbisara, “Wal᷊inewe i'o pia tuṛṛangnga aranne i Harun? I Ya'u masingkatta i tou pande massinaukka. I tou orassa indi sulal᷊ummu amatanna inawarendi, wuṛṛu i tou sarun mal᷊uassa massombanu.

¹⁵Paggahattoten tou wuṛṛu wal᷊oa'a si tou apa apan ṛinone iwisarane. I Ya'u sarun mantul᷊ungngi raddua wuṛṛu mangaṛṛa'u apa apan ṛinone iwisara wuṛṛu olaanni raddua.

¹⁶I tou ṛinone mabbisara ringannu arannu su saruannu tumanangnge. I tou sarun maola'a mabbawisaranu wuṛṛu i'o ellehanni tou ere Ruata apan mammasingkattu apa apan ṛinone iwisaran tou.

¹⁷Apira'e ta'inna indi, i'o sarun ma'ola'a manga al᷊aṛṛindua'a ringannu ta'inna udde.”

¹⁸Wua'udde i Musa napul᷊ete watukku wal᷊en Yitro, iamangnga la'iananne, wuṛṛu nabbisara si tou, “Walaawe i ya'u mabelengnga su Mesir mattembo manga tuṛṛangku wuṛṛu ma'ellega tanne i mangitou ta'e wiakka.” I Yitro nabbisara si Musa, “Roote ringannu sal᷊amatta.”

¹⁹Su tempo i Musa ta'e su leta'u Midian, MAWU nabbisara si tou, “Pabelengke su Mesir. Anambon taumata apan ma'apulu mamate si'o natete.”

²⁰Ne i Musa nangahete awingnge wuṛṛu manga anangnge wuṛṛu nalluranni mangitou su keledai ana see i mangitou suadio'a inaite watukku Mesir. Wuassu parenta MAWU, i Musa lai nangapiddu ta'inne.

²¹MAWU nabbisara si Musa, “I Ya'u buatte nangonggolu taṛṛino si'o ipa'ola'a manga al᷊aṛṛindu'a. Nariaddi amungkangngu i'o nabelengke su Mesir, ola'e manga al᷊aṛṛindu'a udde su saruannu ratu Mesir. Arawe i Ya'u sarun ma'ola'a si tou maatikka puane, na'oman sara i tou maddiri mamalan balahanna udde mangingkatta.

²²Ana see wal᷊oa'e su ratu udde manungku i Ya'u, MAWU, nananata arendi; ‘Israel uddewe ana'U pahul᷊une,

²³wuṛṛu i'o buatte Ta'u nirolokka mamalan ana'U udde inai tadea'u i tou wotongnge mattaṛṛamawu si Ya'u, arawe i'o nanol᷊a'a. Orassa indi i Ya'u sarun mamate anangngu pahul᷊une.’ ”

²⁴Su sambau tampan paddasananna sulal᷊ummu amatanna udde, MAWU nirumanta ringanni Musa wuṛṛu mappulu mamate si tou.

²⁵I Zipora, awingnge, nanganu sambau watu maṛṛoro wuṛṛu namototta pentakku pamamanuan anangnge, ana see nieṛṛetta su ledda Musa. Unni Zipora, “I'o awing daṛṛa'u.”

²⁶Olangnge udde nipasingkanne ana waugu lal᷊aghun sunatta. Ne MAWU tate nariaddi namate si Musa.

²⁷Tantal᷊anna udde MAWU nabbisara si Harun, “Roote watukku wadda'a lol᷊okka paisasomba Musa.” I Harun inaite ana see nassombaten tuarine su wowone na'ukkassa, wuṛṛu nangari'a si tou.

²⁸I Musa nabbati'a si Harun anambon bisara MAWU si tou su tempo i tou nirolokka apia watukku Mesir, wuṛṛu lai anambon al᷊aṛṛindu'a apan sarun olaanne.

²⁹Wua'udde i Musa ruan Harun inaite watukku Mesir, wuṛṛu nangammulu anambon piaṛṛa'u Israel.

³⁰I Harun namasingkatta si mangitou sarangkanambone apan niwisara MAWU si Musa, wuṛṛu i Musa na'ola'a anambon al᷊aṛṛindu'a su saruannu manga taumata udde.

³¹Ne i mangitou nangimante, wuṛṛu napawe i mangitou naaringikka manungku MAWU buatte na'ellega walahannu Israel wuṛṛu na'ellega al᷊awo'u asasusa mangitou, i mangitou niumal᷊intudda nassubba.