Read Talaud SASABANGNGA 40 Bible Online

SASABANGNGA 40 - Talaud bible

SASABANGNGA 40

¹MAWU nabbisara si Musa,

²“Pararisiṛṛa'e Rasang-Ku su allo paarorone su wul᷊anna paarorone.

³Sutta'a sulal᷊umme Wantallu Pa'aire apan lal᷊oṛṛoannu Mapul᷊o Tita wuṛṛu taapeten mal᷊aṛṛenessa su saruanne.

⁴Addoa'e medda ringannu saranapane. Sutta'e lai leddan sol᷊o wuṛṛu re'omete sol᷊one.

⁵Addoa'e mezbah wul᷊awanna tampan panutunganna amania su saruannu Wantallu Pa'aire, wuṛṛu elea'e sasarane su ngaran Dasanna.

⁶Addoa'e mezbah sasamba itattambunna su saruannu ngaran Dasanna.

⁷Addoa'e tampan ua'e su pattangngannu Rasanna wuṛṛu mezbah udde, ana see loṛṛoiten ua'e.

⁸Wua'udde elea'e senggota pamal᷊liwuta'a rallaku Rasanna, wuṛṛu elea'e lai pampelen ngaran pasallanganna.

⁹Wua'udde Rasanna wuṛṛu al᷊awo'u saranapane ṛinone ionggola si Ya'u ringannu olangnge mallana lanan lal᷊aghu, ne sarangkanambone udde niṛṛae si Ya'u.

¹⁰Onggol᷊a'a mezbah wuṛṛu al᷊awo'u saranapane ringannu laghune aroddi, tadea'u sarangkanambone iṛṛae huna'u.

¹¹Ola'e aroddi lai su tampan ua'e wuṛṛu apampakke.

¹²Wua'udde, doloṛṛa'e i Harun wuṛṛu manga anangnge rumanta su ngaran Dasanna wuṛṛu mangukkasa watanganne.

¹³Luṛṛea'e laubbu imam si Harun, wuṛṛu lanaite i tou tadea'u i tou iṛṛa'e mangimbe si Ya'u maola'a imam.

¹⁴Ana see doloṛṛa'e manga anangnge mangundani, wuṛṛu luṛṛea'e kemeja si mangitou.

¹⁵Ana see lanaite i mangitou ere i'o nallana iamangngi mangitou, tadea'u i mangitou lai wotongnge mangimbe si Ya'u maola'a imam. Ringannu lal᷊aghun lanan udde, ṛuanganni mangitou saran papapulunne uaagassa manara imam.”

¹⁶I Musa tinumuṛṛutta sarangkanambone ere buatte niparentan MAWU.

¹⁷Ne su allo paarorone wul᷊anna paarorone sulal᷊ummu tonna aruane napawe balahannu Israel buatte nanantangngu Mesir, Rasannu MAWU udde niapararisikka.

¹⁸I Musa nangaddon rapappake, napararisikku manga salaba'ukke, namasangngu manga alu wawarene wuṛṛu nanul᷊idda manga diṛṛine.

¹⁹Ana see i tou namilattu atuppu Rasanna ringannu lal᷊uubbe su liudde al᷊iurosone ere niparentan MAWU.

²⁰Wua'udde watu udde nitaṛṛo sulal᷊ummu Wantallu Pa'aire. Ana see i Musa nanutubbu Wantalla udde wuṛṛu nanuṛṛin alu papasanna sulal᷊ummu hal᷊angnge.

²¹Ana see i tou nangaddon Wantalla sulal᷊ummu Rasanna wuṛṛu nangelen mal᷊aṛṛenessa tataamme su saruanne, ere buatte niparentan MAWU si tou.

²²Wua'udde i Musa nangaddon medda sulal᷊ummu Rasanna, su wageangngu sawannaka su liuddu mal᷊aṛṛenessa,

²³ana see su wowon medda udde niatokka roti ia'imbe.

²⁴Leddan sol᷊o niaddo sulal᷊ummu Rasanna, su wageangngu timukka, uasaruanna medda udde,

²⁵ana see, manga sol᷊o udde nire'omanna su saruannu MAWU.

²⁶Mezbah wul᷊awanna niaddo sulal᷊ummu Rasanna, su saruannu mal᷊aṛṛenessa,

²⁷ana see i tou nanambunnu amania mawangngi ere buatte niparentan MAWU si Musa.

²⁸I Musa nangelen pampele ngaran Dasanna,

²⁹wuṛṛu su saruannu ngara udde i tou nangaddon medda pangadoannu sasamba itattambunna. Su wowon mezbah udde i tou nangonggolu sasamba itattambunna maola'a wuṛṛu sasamba ia'imbe.

³⁰Tampan witu'a niaddon tou su wallatu Rasanna wuṛṛu mezbah, ana see tinaṛṛoanni tou ua'e.

³¹I Musa, i Harun wuṛṛu manga anangnge nangukkassa lima wuṛṛu leddan mangitou isudde,

³²suapan i mangitou sumutta sulal᷊ummu Rasannu MAWU ara'e mangundanin mezbah.

³³Uapal᷊iwutta Rasanna wuṛṛu mezbah udde i Musa nangelen senggota, ana see i tou nangelen pampele ngara pasallanganna. Ne anambon manara udde nasuete.

³⁴Wua'udde niumonto'e winabbawa nangooppa Rasannu MAWU, wuṛṛu Rasanna udde napenen semakku darantan MAWU.

³⁵Ana waugu udde i Musa tawe naasutta sulal᷊ummu Rasanna udde.

³⁶Suapan winabbawa udde ire'e wuassu Rasannu MAWU, walahannu Israel manggohakku paddasananni mangitou wuṛṛu mangingkatta su tampa waine.

³⁷Arawe amungkangngu winabbawa udde tawe ire'e, i mangitou tawe manatangngu tampa udde.

³⁸Su al᷊annun balahannu Israel mammal᷊intadda, MAWU uatana'a su Rasanna udde sulal᷊ummu lihiddu winabbawa su tempo allo wuṛṛu lihiddu putungnga su tempo ṛabbi.