Read Talaud SASABANGNGA 5 Bible Online

SASABANGNGA 5 - Talaud bible

SASABANGNGA 5

¹Wua'udde i Musa wuṛṛu i Harun inaite sinumaruanna ratu Mesir wuṛṛu nabbisara, “Arendi parenta MAWU, Ruatan Israel, ‘Walaawe walahang-Ku sumabangnga tadea'u i mangitou wotongnge mattaṛṛamawu si Ya'u su wadda'a lol᷊okka.’ ”

²“Isai MAWU udde?” aiwal᷊on datu. “Anio i ya'u mangaddata si Tou wuṛṛu mamalan balahannu Israel mapul᷊e? I Ya'u wagga MAWU udde, wuṛṛu taumatan Israel tawe ta'u iwala mapul᷊e.”

³I Musa wuṛṛu i Harun nabbisara, “Ruatan taumatan Ibrani buatte naipasilon batangan-Ne si yami. Wala'awe yami inai su wadda'a araune tallu allo amatanna tadea'u mangonggolu sasamba su MAWU, Ruatang kami. Amungkangngu yami tawe mallaghun udde, yami sarun patean-Ne ringannu radda'a ara'e pangalo.”

⁴Unnu ratu si Musa wuṛṛu si Harun, “Anio i yamiu ma'ola'a manga taumata udde mammanara manara mangitou? Doloṛṛa'e manga allangnga udde mammanara!

⁵Manga taumata udde tumaniten manambo reenganne. Wuṛṛu orassa indi yamiu ma'apulu tadea'u i mangitou mangillol᷊o mammanara!”

⁶Allo udde lai manga mandariaga taumata Mesir wuṛṛu manga mandore taumatan Israel naasomba parenta wuassu MAWU,

⁷“Ariete lai mangonggolu laṛṛami su balahanna udde ipa'ola'a tela. Wala'e i mangitou maddea'a sassane.

⁸Arawe i mangitou doloṛṛa'e ma'ola'a manga tela apan manambo wuassu niolangnge tempo nal᷊iu. I mangitou tumba'u ma'apulu tawe mammanara; ana waugu udde i mangitou sidutu sussamboṛṛe tadea'u irolokka inai mangonggolu sasamba su Ruata mangitou.

⁹Wata'a'e manga taumata udde mammanara lembon maṛṛimadda, tadea'u i mangitou sidutu mammanara wuṛṛu tawe tempone maddaringikka manga watti'a awusu.”

¹⁰Manga mandariaga taumata Mesir wuṛṛu manga mandore taumatan Israel udde sinumabbangnga ana see nabbisara su manga taumatan Israel, “Ratu namarenta tadea'u i yamiu tate onggol᷊annu laṛṛami.

¹¹I yamiu ṛinone maddea'a sassane su al᷊awo'u tampa, arawe paanaunge, manga tela apan niola'i yamiu tawe wotongnge matul᷊u wuassu tempo nal᷊iu.”

¹²Ne manga taumatan Israel inaite mammal᷊intaddu ahewallu leta'u Mesir madea'a mangammulu laṛṛami.

¹³Manga mandariaga sidutu mammata'a tadea'u allo-allo i mangitou ma'ola'a tela anambone ere lai su tempo i mangitou ta'e a'onggol᷊annu laṛṛami.

¹⁴Manga mandariaga udde nanggesekka manga mandore taumatan Israel apan nirolokka niapariaga mamanara. I mangitou naiwal᷊o, “Anio orassa indi balahannu tate maaola'a tela anambone ere dorone?”

¹⁵Ana see manga mandoren Israel inaite sinumaruanna ratu wuṛṛu sinumal᷊ande, “Anio i Tuangnga na'ola'a arendi si yami?

¹⁶Yami tawe nionggol᷊annu laṛṛami, arawe niwata'a ma'ola'a tela! Orassa indi yami nipuulla wutte'e ete manga mamanatan Tuangnga apan nassal᷊a!”

¹⁷Ratu sinumimbakka, “I yamiu wolo'a atonna wuṛṛu maddiri mamanara. Ana waugu udde i yamiu madorongnga si ya'u tadea'u inai mangonggolu sasamba su mawunu.

¹⁸Roote pammanara apia. I yamiu tawe onggol᷊annu laṛṛami, arawe i yamiu sidutu pa'ola'a tela apan uasul᷊ungnga anambone.”

¹⁹Manga mandore udde naatutukke manungku i mangitou sulal᷊ummu asasusa napawe nipasingkatanna manungku manga taumatan Israel ṛinone ma'ola'a tela apan anambone ere allo nangkal᷊iu.

²⁰Su tempo i mangitou sinumabbangnga wuassu wal᷊en araratuanna, i mangitou nassomban Musa wuṛṛu i Harun apan tantal᷊anna uaṛṛaddo si mangitou.

²¹Unnu manga mandore udde, “MAWU masingkattu inolaannu! I Tou sarun makkuumanni raddua! Ete iraddua apan naaola'a si yami nipadantinnu ratu wuṛṛu manga mamanarane, na'oman sara i mangitou mamate si yami.”

²²Ana see i Musa sinumaruante MAWU apia wuṛṛu nabbisara, “Mawu, anio walahannu pabbalagu Israel niolang-Ngu aroddi al᷊aleone udde? Anio I'o nandolo'u isindi?

²³Ro'en i ya'u sinumaruanna ratu wuṛṛu nabbisara sulal᷊ummu aran-Nu, i tou mannattake mandal᷊eo balahanna indi. Wuṛṛu I'o mangke mal᷊anna-l᷊annaba tawe umontolla si mangitou.”

²⁴Ana see MAWU nabbisara si Musa, “Orassa indi i'o sarun maasilo ereapa i Ya'u sarun ma'inolaanna ratu. I tou sarun Ta'u iwata'a mamallossu walahang-Ku. Mangke atonna i tou sarun Ta'u iwata'a mallimbuakka si mangitou wuassu wanua indi.”