Read Talaud SASABANGNGA 8 Bible Online

SASABANGNGA 8 - Talaud bible

SASABANGNGA 8

¹Ana see MAWU nabbisara si Musa, “Roote saruanna ratu wuṛṛu wal᷊oa'a si tou tanata-U indi; ‘Wala'awe al᷊aṛṛana-U inai mattaṛṛamawu si ya'u.

²Amungkangngu i'o manol᷊a'a, wanua indi sarun Ta'u peneannu aakka maola'a ṛuumanna.

³Sal᷊ukku Nil sarun mapenen aakka, na'oman sara manga winatangnga udde sumabangnga wuassu ua'e wuṛṛu sumutta sulal᷊ummu wal᷊en arartuannu, sulal᷊ummu tampa atatiil᷊anna wuṛṛu su atatiil᷊annu, sulal᷊ummu manga wal᷊en mammamanaran araratuanna, wuṛṛu tumana'u aratuanna, ewe'e lai sulal᷊ummu tampa pallol᷊oanna roti wuṛṛu manga urinna.

⁴Manga aakka udde sarun sumulo'a wuṛṛu umawitta si'o, anambon mammamanaran aratuannu wuṛṛu tumana'u araratuanna.’ ”

⁵MAWU nabbisara si Musa, “Doloṛṛa'e i Harun mamal᷊aattu ta'inne su manga sal᷊ukka, manga enggesanne wuṛṛu manga li'u tadea'u manga aakka sumapputta wuṛṛu mamene leta'u Mesir.”

⁶Ne i Harun namal᷊aattu ta'inne su anambon sal᷊ukka, ana see nilumapputte manga aakka namene ahewallu wanua.

⁷Arawe manga taṛṛa wal᷊iimata nappaatu apande mangitou, wuṛṛu lai na'ola'a aakka apan nilumapputta su wanua udde.

⁸Ratu namago si Musa wuṛṛu si Harun, wuṛṛu nabbisara, “Aal᷊iomante su mawunu tadea'u i Tou mapaawul᷊in manga aakka indi, ne i ya'u sarun mamalan walahan-Ne inai mangonggolu sasamba su MAWU.”

⁹I Musa sinumimbakka, “Ringannu naungnga mal᷊uassa i ya'u umal᷊iomanni Tuangku su MAWU. Tantuna'e tempone, ne i ya'u sarun umal᷊iomanni Tuangku, manga mammamanaran araratuanna wuṛṛu tumanangnge. Ne i Tuangku sarun mal᷊iu wuassu manga aakka udde, wuṛṛu taweddu mallambe, tumbau su Sal᷊ukku Nil.”

¹⁰Sasimbakku ratu udde, “Aal᷊iomana'e i ya'u tiṛṛabbi.” Unni Musa, “I ya'u tumuṛṛutta apa apan raddoronganni Tuangku. Ne i Tuangku sarun maasingkatta manungku tawe Duata wal᷊ine ere MAWU, Ruatan kami.

¹¹I Tou sarun mapaal᷊iun i Tuangku, manga mammamanaran araratuanna wuṛṛu tumanangnge wuassu a'akka udde. Tate lai manga a'akka sulal᷊ummu wal᷊en tumba'u su Sal᷊ukku Nil.”

¹²Ana see i Musa wuṛṛu i Harun nanantangngu ratu. Wua'udde i Musa niomal᷊iomanna su MAWU tadea'u mapaawul᷊in manga a'akka apan niaparanta su ratu.

¹³MAWU naddaringikka darorongngi Musa, wuṛṛu manga a'akka sulal᷊ummu wal᷊en, su manga rallakka wuṛṛu wawail᷊anna nate abbi.

¹⁴Taumata Mesir nangammulu a'akka nate udde na'oman sara ua'ombo, wuṛṛu sara ahewallu wanua mawukku'a.

¹⁵Napawe ratu naasilo manungku manga a'akka udde natete, naungnge naatikke. Wuṛṛu ere buatte niwal᷊o MAWU, ratu maddiri maddaringikka wisara i Musa wuṛṛu i Harun.

¹⁶MAWU nabbisara si Musa, “Doloṛṛa'e i Harun mamuulla leta'a ringannu ta'inna, ne su ahewallu wanua Mesir awu sarun mawal᷊u mabbal᷊i namu'a.”

¹⁷Ana see i Harun namuulla leta'a ringannu ta'inne, wuṛṛu al᷊awo'u awu su Mesir nawal᷊u nabbal᷊i namu'a apan naṛṛimpulunna taumata wuṛṛu winatangnga.

¹⁸Manga taṛṛa wal᷊iimata madea'a mappaatu apande mangitou ma'ola'a manga namu'a, arawe i mangitou tawe naaola'a. Su al᷊awo'u tampa pia namu'a,

¹⁹na'oman sara manga taṛṛa wal᷊iimata udde nabbisara ratu, “Indi inolaannu Ruata.” Arawe ratu udde maatikka naungnge, wuṛṛu ere buatte niwisara MAWU, ratu udde maddiri maddaringikka wisara i Musa wuṛṛu i Harun.

²⁰MAWU nabbisara si Musa, “Roote tiṛṛabbi maṛṛanggappa maisasomban datu su tempo i tou sumossokka su sal᷊ukka, wuṛṛu wal᷊oa'a si tou wisara-U indi; ‘Wala'awe al᷊aṛṛana-U inai mattaṛṛamawu si ya'u.

²¹Amungkangngu i'o manol᷊a'a, ne i Ya'u sarun mandantan lango si'o, manga mammamanaran araratuanna wuṛṛu tumanangnge. Manga wal᷊en taumata Mesir, ewe'e ahewallu wanua sarun mapenen lango.

²²Arawe i Ya'u sarun ma'ola'a al᷊aṛṛaene su leta'u Gosyen, su tampa al᷊aṛṛana-U uatana'a. Poiaroddi tawe lango, tadea'u i yamiu masingkatta manungku i Ya'u, MAWU apan na'ola'a udde.

²³I Ya'u sarun ma'ola'a padaṛṛalanne su wallatu al᷊aṛṛana-U wuṛṛu tumanangngu. Al᷊aṛṛindu'a udde sarun mariaddi tiṛṛabbi.’ ”

²⁴MAWU nandantan lango apan manambo atonna su wal᷊en araratuannu ratu wuṛṛu su manga wal᷊en mammamanaran araratuanna. Su ahewallu wanua Mesir mambewe uatataṛṛangnga ana waugu manga lango udde.

²⁵Wua'udde MAWU namaggo si Musa wuṛṛu si Harun ana see nabbisara, “Roote pangonggollu sasamba su MAWU Ruatanu, arawe su wanuate indi.”

²⁶“Mappianne arie,” sasimbakki Musa, “ana waugu taumata Mesir sarun umal᷊udda naungnge amungkangngu maasilo sasamban kami udde, wuṛṛu yami sarun tuntungannu watu ma'oman sara mate.

²⁷Yami ṛinone inai watukku wadda'a araune tallu allo amatanna inai mangonggolu sasamba su Ruatan kami, ere buatte nirolokki Tou si yami.”

²⁸Ratu nabbisara, “Aroddite, i ya'u mamalan kamiu inai watukku wadda'a mangonggolu sassamba su MAWU, Ruatanu, addonganne i yamiu tawe umamatta marau. Paanaunge, a'al᷊iomana'awe i ya'u!”

²⁹Sasimbakki Musa, “Napawe i ya'u inaite, i ya'u apiddu umal᷊iomanna su MAWU tadea'u tiṛṛabbi manga lango udde manantangngi Tuangku, manga mammamanaran araratuanna wuṛṛu tumana'u araratuanna. Arawe arie pamahia si yami apia, wuṛṛu arie panal᷊are walahannu Israel inai mangonggolu sasamba su MAWU.”

³⁰I Musa nanantangngu ratu, ana see inumal᷊iomanna su MAWU,

³¹wuṛṛu MAWU naddaringikka aal᷊iomanni Musa. Manga lango udde tinumalla'e nanantangngu ratu, manga manmamanaran araratuanna wuṛṛu tumana'u araratuanna. Tawe saran sambau apan ta'e natantangnga.

³²Arawe paassa indi lai ratu naungnge ta'e maattikka wuṛṛu tawe namalan balahanna udde manantangnga.