Read Talaud SASABANGNGA 9 Bible Online

SASABANGNGA 9 - Talaud bible

SASABANGNGA 9

¹MAWU nabbisara si Musa, “Roote sumaruanna ratu, wuṛṛu wal᷊oa'a si tou manungku MAWU, Ruata taumatan Ibrani, nabbisara; ‘Wala'awe manga al᷊aṛṛana-U inai tadea'u i mangitou wotongnge mattaṛṛamawu si ya'u.

²Amungkangngu i'o maddiri mamallossi mangitou,

³I Ya'u sarun mandantan sa'itta apan bahewalla su anambon binatangngi i yamiu papadul᷊inanna, kuda, keledai, unta, sapi, domba wuṛṛu ambingngi yamiu.

⁴I Ya'u sarun maṛṛaen binatangngu taumatan Israel wuṛṛu winatangngu taumata Mesir. Wuṛṛu winatangngu taumatan Israel tawe saran sambau apan mate.

⁵I Ya'u, MAWU, nanantunnu allo tiṛṛabbi ipanipussu olangnge udde.’ ”

⁶Su allo tiṛṛabbi MAWU na'ola'a ere buatte nipasingkan-Ne. Anambon binatangngu walahannu Mesir nate, arawe wuassu winatangngu walahannu Israel taweddu nate.

⁷Ratu naiwal᷊o apa apan buatte nariaddi, ana see niwatti'a si tou manungku winatangngu taumatan Israel tawe saran sambau nate. Arawe ratu sidutu naungnge maattikka wuṛṛu maddiri mamallossu walahanna udde mapul᷊e.

⁸MAWU nabbisara si Musa wuṛṛu si Harun, “Panganute manga pira kangkuma awu wuassu pananutunganna. Su saruannu ratu, i Musa ṛinone manal᷊iawukku awu udde watukku winalanganna.

⁹Ne awu udde sarun massal᷊iawukka su ahewallu leta'u Mesir. Su taumata wuṛṛu su winatangnga awu sarun mapaasabangngu manga pinsulla apan mapesanga mabbal᷊i lessa pia nanane.”

¹⁰Ana see i Musa wuṛṛu i Harun nanganute awu wuṛṛu sinumaruante ratu. I Musa nangalassu awu udde su winalanganna. Su taumata wuṛṛu winatangnga nilumappute manga pinsulla apan napesanga wuṛṛu nabbal᷊i lessa apan pia nanane.

¹¹Manga taṛṛa wal᷊iimata tawe mapanalare si Musa ana waugu ahewallu wadangngi mangitou napenen pinsulla ere manga taumata Mesir waine.

¹²Arawe MAWU na'ola'a ratu naungnge maattikka, wuṛṛu ere buatte niwal᷊o MAWU, ratu maddiri maddaringikka wisara i Musa ruan i Harun.

¹³MAWU nabbisara si Musa, “Roote tiṛṛabbi marua allo maṛṛanggappa sumaruanna ratu wuṛṛu wal᷊oa'a si tou manungku MAWU, Ruatan Ibrani nabbisara; ‘Pallosa'a al᷊aṛṛana-U tadea'u i mangitou wotongnge inai mattaṛṛamawu si ya'u.

¹⁴Paasa indi i Ya'u sarun mandantan asasilaka tawe tumba'u su manga mammamanaran araratuanna wuṛṛu tumanangnge, arawe si'o lai, tadea'u i'o maasingkatta manungku i Ya'u tawe doappa su ahewallu runia indi.

¹⁵Unnu wisara i Ya'u ma'apulu makkuumannu wuṛṛu tumanangngu ringannu radda'a, i yamiu sarangkanambone natete.

¹⁶Arawe i yamiu Ta'u iwala wiakka, tadea'u i Ya'u wotongnge mapaal᷊iatta'u taṛṛino-U si'o, na'oman sara arang-Ku tinumelengke su ahewallu runia.

¹⁷Salaiwe aroddi, i'o ta'e lai mawunga, wuṛṛu maddiri mamalan al᷊aṛṛana-U inai mapul᷊e.

¹⁸Tiṛṛabbi marua allo, su tempo apan uasul᷊ungnga, i Ya'u sarun mandatan uranna masunge apan masadatta, ere taambe nariaddi su Mesir ro'en dorone naddatingngu orassa indi.

¹⁹Ne parentaite tadea'u anambon binatangnga wuṛṛu al᷊awo'u darotongngu apan su liudde apira'a su tampa amanna. Anambon taumata wuṛṛu winatangnga apan su liudde wuṛṛu tawe nattillindumma sarun mate aemaannu uranna masunge.’ ”

²⁰Manga pira su wallatu mammamanaran araratuanna nata'uttu wisara MAWU. I mangitou uaapiddu manga allangnga wuṛṛu winatangngi mangitou sinumutta sulal᷊ummu wal᷊en tadea'u asirunganna.

²¹Arawe ingana'a waine tawe maddaringikka wawal᷊o udde wuṛṛu nanantangken manga allangnga wuṛṛu winatangngi mangitou su wadda'a.

²²Ana see MAWU nabbisara si Musa, “Wattea'e ta'iakku ire'e, wuṛṛu uranna masunge sarun sumossokka su ahewallu leta'u Mesir. Uranna udde sarun maṛṛia'a su taumata, winatangnga wuṛṛu al᷊awo'u sinuananna su wailla.”

²³I Musa namaten ta'iakke ire'e, wuṛṛu MAWU nanossokku rallu'a wuṛṛu uranna masunge, wuṛṛu sawallo mabeessa su runia. MAWU nandantan

²⁴uranna masunge apan asadatanne ringannu sawallo uasasimbakka. Eteudde uranna masange apan lembon asadatanne sulal᷊ummu watti'u araratuannu Mesir.

²⁵Su ahewallu runia uranna masunge udde namate sarangkanambone su wailla, nasutta taumata wuṛṛu winatangnga. Anambon sasuanna su wailla mangke nate wuṛṛu manga alune aoluanna naṛṛa'a.

²⁶Tumba'u leta'u Gosyen, tampa tatanaannu taumatan Israel, tawe naemaannu uranna masunge.

²⁷Ana see ratu namago si Musa wuṛṛu si Harun, wuṛṛu nabbisara, “I Ya'u narosate. Ete MAWU apan naṛṛino, i ya'u wuṛṛu tumana'u araratuangku buatte na'ola'a pasasal᷊a.

²⁸Aal᷊iomatee su MAWU; yami mal᷊annute uatataṛṛangnga ana waugu rallu'a wuṛṛu uranna masunge indi. I Ya'u sarun mamallossi yamiu inai. I yamiu ariete pa'atana'a isindi lai.”

²⁹Wisara i Musa su ratu, “Tawe mal᷊annu napawe i ya'u su liudden soa, i ya'u sarun mamatten lima umal᷊iomanna su MAWU. Rallu'a sarun umaddo wuṛṛu uranna masunge sarun mawaessa, tadea'u i Tuangku masingkatta manungku runia indi tatahuanannu MAWU.

³⁰Arawe i ya'u masingkatta manungku i Tuangku wuṛṛu manga mammamanaran araratuanna taambe lai mata'uttu Ruata.”

³¹Sasuanna rami wuṛṛu jelai nal᷊al᷊eo, ana waugu rami tantal᷊anna mabbanti, wuṛṛu jelai tantal᷊anna mabbua.

³²Arawe gandumma wuṛṛu wua pia batune tawe nal᷊al᷊eo ana waugu tambe tempone mabbua.

³³Ana see i Musa nanantangngu ratu wuṛṛu inaite watukku liuddu soa; poiaroddi i tou namatten ta'iakke umal᷊iomanna su MAWU. Orassa udde lai naddote rallu'a, uranna masunge wuṛṛu uranna.

³⁴Napawe ratu naasilo sarangkanambone apan buatte nariaddi, i tou narosate apia. I tou wuṛṛu manga mammamanaran araratuanne sidutu maattikka naungnge.

³⁵Ere buatte niwal᷊o MAWU si Musa, ratu maddiri mamalan taumatan Israel inai mapul᷊e.