Read Talaud AYUB 1 Bible Online

AYUB 1 - Talaud bible

AYUB 1

¹Su leta'u Us uatana'e sangkatou esakka aranne i Ayub. I tou massubba Ruata wuṛṛu satia si Tou. I tou taumata apan pallal᷊aghune mapia wuṛṛu tawe ma'ola'a al᷊al᷊eo sarangkadio'a.

²I tou uatahuanna siri pitu ana'a esakka wuṛṛu siri tallu ana'a wawine.

³Wua'udde lai i tou uatahuanna manambo allangnga, 7.000 domba, 3.000 unta, 1.000 sapi wuṛṛu 500 keledai. Aunne, ete i tou taumata apan aalanne su wallattu tumanangnge su samba'a Ra'i.

⁴Siri pitu esakka ana'i Ayub pia anaramme ma'ola'a andeangnga su wal᷊en sangkatou-sangkatou ringannu ualal᷊ol᷊ossa. Su andeangnga udde, siri tallu wawine ana'i Ayub niwal᷊oanna lai, ne i mangitou sarangkanambone niumante, na'inumma suadio'a.

⁵Suapan andeangnga muddussa, i Ayub sidutu matimmpu'o maṛṛanggappa wuṛṛu mangonggollu sasamban manga anangnge tadea'u i mangitou ampungannu MAWU. Waugu i Ayub maṛṛingidda, wotongnge mariaddi al᷊aṛṛanangnge udde buatte na'ola'a rosa wuṛṛu mangngadio'a Ruata ringannu tawe nipattatudda.

⁶Su allo sambau manga riadianna sussangngo su surga sinumaruanna MAWU, wuṛṛu i Mamamono'a isudde lai suwallatti mangitou lai.

⁷MAWU naiwal᷊o si tou, “Wuassuapa i'o?” Sasimbakki Mamamono'a, “Allangnga wakkute wua nilumallele wuṛṛu namal᷊intaddu ahewallu runia.”

⁸Ana see MAWU naiwal᷊o, “Apa i'o buatte nanutukka allang-Ku i Ayub? Su ahewallu runia tawe taumata aroddi atuṛṛunne wuṛṛu apiane ere i tou. I tou massubba si Ya'u wuṛṛu tawe saran paassa ma'ola'a al᷊al᷊eo.”

⁹Arawe i Mamamono'a sinumimbakka, “Wotongnge mariaddi i Ayub massubba Si'o ana waugu i tou maasomba lal᷊antakke.

¹⁰I tou, amonanne wuṛṛu anambon paa'alane sidutu lal᷊u'aran-Nu. Manarane nial᷊amatan-Nu wuṛṛu I'o nangonggollu manambo winatangnga papadul᷊iananna, wotongnge maapene ahewallu wanua.

¹¹Arawe unnu wisara anambon paa'alane udde ul᷊ean-Nu apia, i tou sarun masal᷊a mamontoga Si'o!”

¹²Ne unnu MAWU si Mamamono'a, “Aroddite, walate i'o ma'ola'a sarangkanambone wuassu paa'alan Ayub, addiongnge i'o arie manansara si tou!” See inaite i Mamamono'a wuassu saruannu MAWU.

¹³Manga pira tempo wua'udde al᷊aṛṛana'i Ayub tantal᷊anna ma'ola'a andeangnga su wal᷊en iaangngi mangitou pahul᷊une.

¹⁴Inaṛṛombanganne pia sangkatou daroloṛṛanna nirumanta tuttal᷊angnga watukku wal᷊en Ayub wuṛṛu naiwal᷊o, “Tua, taumatan Syeba nirumantate namangalo si yami sutempo manga sapi mammajeko wailla wuṛṛu manga keledai tantal᷊anna u'anna mararine. I mangitou nangaṛṛo manga winatangnga udde, wuṛṛu namate manga allangngi Tuangnga isudde. Tumba'u allangngu sassane apan naal᷊assokka na'oman sara nabbal᷊o si Tuangnga.”

¹⁶Sutempo i tou ta'e uahahatto, nirumantate lai allangnga aruane wuṛṛu nabbisara, “Manga domban Tuangnga wuṛṛu mallal᷊u'adde buatte niamettu sawallo na'oman sara nate abbi. Tumba'u allangngu sassane apan naatal᷊angnga na'oman sara napabbal᷊o si Tuangnga.”

¹⁷I tou taambe nuddussa uahahatto, sutempo udde lai allangnga atallune nirumanta namasingkatta, “Tatallun kadoanna mallaṛṛampassa wuassu Kasdim buatte nanganu manga untan Tuangnga wuṛṛu namate manga allangngi Tuangnga. Tumba'u allangngu sassane apan naatal᷊angnga na'oman sara wotongnge napabbal᷊o si Tuangnga.”

¹⁸Sutempo i tou ta'e mabbisara, nirumantate sangkatou allangnga waine ringannu uaapiddu watti'a, “Manga ana'i Tuangnga tantal᷊anna ma'ola'a andeangnga su wal᷊en ana'i Tuangnga pahul᷊une.

¹⁹Inaṛṛombanganne anginna al᷊isusu tinumiuppa wuassu wadda'a wuṛṛu naṛṛa'an bal᷊e udde wuṛṛu naapate anambon ana'i Tuangnga. Tumba'u allangngu apan naal᷊asso'a na'oman sara wotongnge nabbatti'a si Tuangnga.”

²⁰Ana see i Ayub dirumarisikke wuṛṛu nanggesa'a laungnge tatialan massusa. I tou nallunggukka puane, ana see niumal᷊intudda

²¹wuṛṛu nabbisara, “I ya'u niasungkangnga tawe uaapiddu apa-apa, wuṛṛu i ya'u sarun mate tawe mangapiddu manga apa lai. MAWU buatte nangonggolla wuṛṛu MAWU lai buatte nangul᷊e. Paddalote aran-Ne!”

²²Nariaddi, salaiwe i Ayub naasomba al᷊awo'u asasilaka udde, i tou tawe na'ola'a rosa wuṛṛu tawe napaasal᷊an Duata.