Read Talaud AYUB 10 Bible Online

AYUB 10 - Talaud bible

AYUB 10

¹I ya'u nawusate wuṛṛu nualle ringannu pabbiaṛṛangku, ne iwosote apapatten wia'u.

²Oh Ruata, ariewe i ya'u iapasal᷊a-Nu; tal᷊aa'e anio i ya'u niroopan-Nu.

³Apa untungnge amungkangngu I'o mangngallangnga arendi, wuṛṛu mandammen hessin manara-Nu sassane? Apa untungnge amungkangngu I'o susambau addapatta wuṛṛu ṛiinnu manga taumata lal᷊eo?

⁴Aellegu MAWU uapapaṛṛalan aellegu taumata

⁵wuṛṛu uukku Ruata aaunne tawe ere uukku taumata.

⁶Amungkangngu aroddi, anio I'o namarikissa al᷊awo'u rosa'u? anio I'o sidutu mangngenggenna pasasal᷊a'u?

⁷Ṛinone I'o masingkatta wuṛṛu maatutukka, manungku i ya'u tawe sal᷊ane, arawe naṛṛino. I'o masingkatta manungku saran sangkatou tawe maatottolla manal᷊amatta si ya'u wuassu lima-Nu.

⁸I ya'u indi nilanginnu lima-Nu, ṛatadde orassa indi I'o mamate si ya'u?

⁹Naungete manungku wuassu awun leta'a I'o na'ola'a si ya'u! Ṛatadde I'o na'ola'a apia si ya'u nabbal᷊i awu?

¹⁰I'o namalan iamangku nallangingku wuṛṛu I'o nabbuwunna si ya'u sulal᷊ummu illoṛṛon inangnga.

¹¹Waddangku nilangin-Nu ringannu duṛṛi wuṛṛu lantikka; duṛṛi'u nionggol᷊an-Nu ṛemessa wuṛṛu pisi uawa'issa.

¹²I'o nanggolla si ya'u wiakka; I'o marangngu si ya'u, I'o ual᷊u'adda niawa'u ringannu paddul᷊i-Nu.

¹³Arawe orassa indi i ya'u masingkatta manungku su al᷊annune udde, mal᷊anna-l᷊annabba I'o buatte nakkiinnu silaka'u.

¹⁴I'o ual᷊u'adda si ya'u tadea'u tawe ma'ola'a pasasal᷊a tadea'u wotongnge ito'e-Nu tawe ampunganna.

¹⁵Amungkangngu i ya'u ma'ola'a rosa, ne wia'u atonna-tonna su asasilaka! Arawe amungkangngu inolaangku tawe sal᷊ane, i ya'u sidutu mangke sassunnanna ma'ola'a rosa! Tawe waṛṛani i ya'u tumaggekku pua, ana waugu uapendamma susa wuṛṛu addio'a.

¹⁶Amungkangngu i ya'u pia gessine, salaiwe tumba'u addio'a, I'o mangngenggenna si ya'u ere singa. Wuṛṛu I'o napal᷊iatta'u apia taṛṛino-Nu, tumba'u ipammata'utta si ya'u.

¹⁷I'o sidutu mangngapiddu sakassi ipando'appa si ya'u; wuṛṛu aatambate asasa'u-Nu si ya'u. I'o nangatokku manga tantara-Nu wakku ipando'appa wuṛṛu ipamangalo si ya'u.

¹⁸Anio i ya'u niwala-Nu niasungkangnga su runia? Mappianne nate tantal᷊anna taambe niasiloannu taumata!

¹⁹Ne pendamanna i ya'u ereola'u tawe niasungkangnga, ana waugu wuassu illoṛṛo nasal᷊a nilabbingnga.

²⁰Ah, tawe mal᷊annu lai i ya'u sarun mate, ne wala'ewe i ya'u sassane, tadea'u i ya'u wotongnge maapendamma tempo'u apan ta'e nallambe indi.

²¹Tate mal᷊annu lai i ya'u inaite wuṛṛu tate mabbelengnga apia, mattuddan banua apan marandumma wuṛṛu tumaniten mal᷊abbukka,

²²wanua apan mal᷊abbukka, napenen linta'u wuṛṛu aal᷊iba'ukka, isudde asasemakka uasul᷊ungngu ararandumma.”