Read Talaud AYUB 13 Bible Online

AYUB 13 - Talaud bible

AYUB 13

¹Sarangkanambone udde buatte niasiloangku wuṛṛu niaringiṛṛangku sassane, wuṛṛu atonna-tonna niasunnangku.

²Apa apan niasingkatanni yamiu; i ya'u lai masingkatta; arie massunna manungku i ya'u mawaddo si'o.

³Arawe i ya'u maapulu maggahatto Apan Lembontaṛṛino; i ya'u maapulu manahekku hatto'u su saruannu Ruata.

⁴Ana waugu i yamiu mammunin awawoddon kamiu ringannu wawahia, tawe paṛṛalane ere manga tonaassa mammahia.

⁵Unnu wisara i yamiu tawe mabbisara, asinungka i yamiu sunnanna pande.

⁶Ne paddaringikke sasongga'u; panutukke sasimba'u.

⁷Wotongnge ringannu arannu Ruata, i yamiu mammahia? Wotongnge i yamiu mangngawusu ana waugu hausan-Ne?

⁸Wotongngewe i yamiu manamba'a Ruata, wuṛṛu manahekku Ruata ere sangkatou apitan bisara?

⁹Napawe Ruata mamarikissa si'o, mapiawe hessine? Wotongngewe i yamiu mamahia si Tou ere mammahia taumata?

¹⁰Amungkangngu i yamiu manamba'a, salaiwe ringannu mal᷊anna-l᷊annabba, i yamiu sarun iṛṛuumannu Ruata ringannu araṛṛagissa.

¹¹Apa awawantugu Ruata tawe maaṛindu'a sasangngonu? Apa araṛṛaubbu Ruata tawe maata'utta naungngu?

¹²Al᷊awo'u tatantironu naal᷊ihidda awu apan tawe gunane; pananambaanu naal᷊ihidda leta'a niompengnga apan mappesangnga.

¹³Ana waugu udde paal᷊annabbe, wala'e i ya'u mabbisara! I ya'u tawe pandumme tanne ereapate pangillul᷊eanne!

¹⁴I ya'u nasaddiate mabbataṛṛun niawa!

¹⁵I ya'u nauutulle ana waugu niasueanten ṛingidda! Amungkangngu Ruata mappulute mamate si ya'u, i ya'u manantilla, arawe i ya'u sarun manahekku pallal᷊agu'u su saruan-Ne.

¹⁶Asinungka ana waugu awawaṛṛani udde i ya'u sal᷊amatta, ana waugu taumata lal᷊eo tawe waṛṛani sumaruanna Ruata!

¹⁷Orassa indi paddaringikke paapia-pia wisara'u; panutukke tatal᷊aa'u.

¹⁸Hatto'u nasaddiate ta'u iapidda; i ya'u mangimanna, i ya'u tawe wotongnge iapasal᷊a!

¹⁹MAWU, napawe I'o rumanta wuṛṛu mangansilla si ya'u, i ya'u uatinnanangnga wuṛṛu uaṛṛaddo papate'u.

²⁰Arawe sengkamawe darorongku darua indi, tadea'u i ya'u waṛṛani sumaruanna Si'o apia:

²¹illol᷊oa'e manansara si ya'u, wuṛṛu ariewe i ya'u mandantan araṛṛagin-Nu si ya'u!

²²Pabbisarate, ne i ya'u mangonggollu sasimbakke. Ara'e wala'ewe i ya'u mabbisara, wua'udde pabbal᷊isse!

²³Sangkura anambon pasasal᷊a wuṛṛu rosa apan niola'u? Al᷊awo'u lal᷊awangku ṛinone isaggo-Nu!

²⁴Anio I'o mallinda'a wuṛṛu massal᷊iu wua dingangku? Anio I'o ma'ellega si ya'u naal᷊ihidda seen-Nu?

²⁵I ya'u tumba'u rongnga apan nitontongngu anginna sumabbi, tawe mariaddi I'o mammata'utta si ya'u! I ya'u tumba'u laṛṛami apan naṛṛangu wuṛṛu tinumolangnga, tawe mariaddi I'o mangke mangngenggenna si ya'u!

²⁶I'o mannantunnu pabbiaṛṛangku apan mapetta si ya'u; I'o nabbal᷊issa pasasal᷊a'u sutempo i ya'u ta'e dario'a.

²⁷I'o nakkapussa ledda'u ringannu ṛate atta'a; anambon inolaangku mangke rariagannu. Ewe'e lai pal᷊addu ledda'u, tawe mapallossa wuassu aelle-Gu.

²⁸Ne i ya'u nabbal᷊i maṛṛattu ere alu apan naṛṛenessa; naal᷊ihidda mal᷊aṛṛenessa niannu wa'u'a i ya'u nabbal᷊i ṛenessa.