Read Talaud AYUB 15 Bible Online

AYUB 15 - Talaud bible

AYUB 15

¹Ne i Elifas sinumimbakka, “Awusu, Ayub, hattonu mangke tawe gunane! Tawe taumata pande apan sussimbakka ere i'o indi, i tou tawe manamba'a watanganne ringannu manga wisara apan tawe loṛṛone.

⁴Unnuwisara hattonu udde tuṛṛutanna, tate sangkatou taumata apan mata'utta ara'e umal᷊iomanna su Ruata lai.

⁵Manga wisaranu mappal᷊iatta'a manungku i'o nassal᷊a, arawe al᷊al᷊eonu tataapannu manga wisaranu.

⁶I ya'u tate lai mangansilla wuṛṛu mapasal᷊anu, ana waugu manga wisaranu sassane i'o nialae.

⁷Unnu pahinu i'o taumata paarorone niasungkangnga? I'o lai isudde sutempo manga wowone niola'a?

⁸Apa i'o naaringikka Ruata na'ola'a riin-Ne? Apa tumba'u i'o apan pia asingkattu taumata?

⁹Al᷊awo'a apan niasingkatannu, i yami lai masingkatta; al᷊awo'a aasunnannu, natualage lai si yami.

¹⁰Asingkatta indi nisengkammi yami wuassu taumata apan piate owanne; i mangitou mabbiakke sutempo iamangngu taambe niasungkangnga!

¹¹Anio apapian Duata tawe sengkamannu? I yami mabbisara ringannu sabare wuṛṛu masi'ome sulal᷊ummu aran-Ne.

¹²Arawe i'o mandona, matanu lullal᷊isangnga;

¹³i'o nasa'u su Ruata wuṛṛu lullawangnga.

¹⁴Wotongne taumata mangke tawe sal᷊ane? Wotongngewe i tou iapaṛṛino su saruanna Ruata?

¹⁵Ewe'e lai su mala'ekatta Ruata tawe mangimanna; su aellegu Ruata i mangitou tawe na'ukkassa.

¹⁶Nangillembote lai taumata apan dal᷊eo wuṛṛu napenen pasasal᷊a, apan ma'inumma al᷊al᷊eo naal᷊ihidda ua'e.

¹⁷Paddaringikke Ayub, i'o sarun tal᷊aannu manga apa,

¹⁸apan niaṛṛa'u taumata pande si ya'u. Al᷊aṛṛa'a udde nisengkamme wuassu al᷊amonane, wuṛṛu nasal᷊a nial᷊inna ringannu nasuungnga su papapulunne.

¹⁹Sutempo udde tawe taumata raho su wanuan mangitou; tawe mangal᷊iwun mangitou wua dingannu Ruata.

²⁰Taumata lal᷊eo apan mannannsara sansul᷊ungnge, sarun mamendamma atata'utta su al᷊o'engngu pabbiaṛṛanne.

²¹Manga tingikka ma'ikkatta mammengella tal᷊ingane; sutempo apan malangnganna maraṛṛampassa rumanta mamangalo si tou.

²²Tawe antimma i tou maal᷊inda'u ararandumma, ana waugu hal᷊elen taṛṛa pate ua'enggenna si tou suapan tempo.

²³Manga asiaṛṛe uaṛṛaddo tempon papatene, i mangitou uaṛṛaddo uminassa winal᷊unanne. Ne i tou naatutukke manungku marandumpe allo sasaruananne.

²⁴Silaka naal᷊ihidda ratu apan baṛṛani, nasaddiate tumambo si tou.

²⁵Etearoddi pal᷊addu taumata apan lullawangnga Ruata, wuṛṛu waṛṛani lumawangnga Apan Lembontaṛṛino.

²⁶Ringannu mawunga i tou namangalo wuṛṛu nilumawangnga Ruata; niwattene allungnge, i tou maddiri tumal᷊angnga.

²⁸I tou namanua su manga soa apan nahohakka, su manga wal᷊en apan tawe taumatane. Manga soa udde buatte nitantunna manungku i tou sidutu mahohakka.

²⁹Paa'alan taumata udde sarun mawul᷊i tawe lannangnge; manga darotongnge sarun masue tawe lambene.

³⁰I tou sarun tawe maal᷊iu wuassu ararandumma; putungnga sarun manutungnga manga sollane. I tou sarun masue ṛatangannu singangu wuassu moṛṛongngu Ruata.

³¹Amungkangngu i tou mangimanna suapa tawe gunane, ne i tou niawusuante; ne lal᷊antakke apan sarun sengkamanne, tate gunane lai.

³²Tantal᷊anna taambe nia'omanna tempone, i tou sarun mate, naal᷊ihidda ranna tinumolangga apan tate mangelomma apia.

³³I tou naal᷊ihidda punnu anggore apan natontongnga wuane, naal᷊ihidda punnu zaitun apan naṛṛondossa wungane.

³⁴Taumata lal᷊eo sarun tawe maasomba paangawanne; masuete matutungnga wal᷊en apan niolangnge wuassu ul᷊en roittu aonggolla.

³⁵Uddewe i mangitou apan makkiinnu al᷊al᷊eo wuṛṛu mappaamanne; awusu wawahia sidutu sulal᷊ummu naungnge.”