Read Talaud AYUB 16 Bible Online

AYUB 16 - Talaud bible

AYUB 16

¹Arawe i Ayub sinumimbakka, “Masokkate i ya'u maaringikka addapatta ereindi; al᷊al᷊uassa tumba'u maasusa.

³Angngerate wisara wawahia udde iillol᷊oa'en kamiu? Apate manapuatta si yamiu tadea'u mangonggollu sasimbakke?

⁴Unnuwisara i yamiu indi i ya'u, wuṛṛu i ya'u i yamiu, i ya'u lai maawisara uasul᷊ungngu ereudde. I yamiu ta'u wambinannu manga wisara; pua'u sarun ta'u iapapa'ilingku.

⁵Naungngu sarun ta'u tohasanna ringannu al᷊awo'u tatantiro; manga wisara'u sarun mangonggollu al᷊al᷊uassa.

⁶Amungkangngu i ya'u mabbisara, asasusa'u tawe umompo'a; amungkangngu i ya'u mallannabba, apa lai hunane?

⁷Ruata na'ola'a si ya'u nallome; anambon amonangku nipatete.

⁸I tou mannal᷊are wuṛṛu nanametta si ya'u. Orassa indi i ya'u naṛṛasate, wuṛṛu su anambon taumata eteudde tatialane manungku i ya'u narosate.

⁹Ringannu araṛṛagissa Ruata nanggesa'a waddangku; ringannu lembon maddantinna i Tou ua'ellega si ya'u.

¹⁰Manga taumata mangngal᷊uandaga si ya'u ringannu moṛṛongnga uanganga mal᷊oangnga; i ya'u niṛṛimpulunanna wuṛṛu wambala'u nipero.

¹¹I ya'u tinantillu Ruata su taumata lal᷊eo; i ya'u niemang-Nge su liman taumata mawansingnga.

¹²Dorone wia'u su langnganna wuṛṛu su lal᷊umanna'a, arawe Ruata namngalo si ya'u ringannu namaṛṛindu'a. Pal᷊u'a'u niṛṛammid-De, ne i ya'u nawantingnga; i ya'u niolang-Nge paannamanna.

¹³Ringannu tawe apendamma u'akkanna, i Tou mangke mammiti'a si ya'u, na'oman sara lal᷊oṛṛon tiangku nilumal᷊eṛṛe.

¹⁴I Tou mammangalo naal᷊ihidda sangkatou tumannaṛṛane, wuṛṛu nallessa si ya'u ringannu masokka-sokka.

¹⁵I ya'u ual᷊uṛṛen karongnga tatialan masusa, wuṛṛu ua'ianna su awu ana waugu niawaddo.

¹⁶Hati'u maṛṛamutta ana waugu lal᷊uai'u; angkondapu mata'u nagoggo'a wuṛṛu nangelomma.

¹⁷Arawe i ya'u tawe nilumawangnga; nasemakke aal᷊iomangku matul᷊idda su MAWU.

¹⁸Ei runia, al᷊al᷊eo maṛṛia'a si ya'u arie pabbunia'a; arie pallannawa'a aintul᷊i'u maddorongnga atatul᷊idda.

¹⁹I ya'u masingkatta manungku Mananambaa'u poi su surga; I Tou nangonggollu tatiala manungku i ya'u tawe dosa.

²⁰I ya'u aal᷊uandahannu manga hawe'u wuṛṛu ilallage; lapiddu lulluai i ya'u sinumaruanna Ruata maddorongnga aontolla.

²¹Ah, antimanna Ruata sassane manamba'a si ya'u su saruan-Ne, naal᷊ihidda sangkatou apan maapulu manamba'a hawene.

²²Manga tonna'u apan nallambe tate manambo lai; tate mal᷊annu lai i ya'u inaite wuṛṛu tate mabbelengnga apia.