Read Talaud AYUB 19 Bible Online

AYUB 19 - Talaud bible

AYUB 19

¹Arawe i Ayub sinumimbakka, “Anio i yamiu sidutu mangngarasa si ya'u, wuṛṛu sassansaranni yamiu ringannu wisara?

³Masokkate i yamiu mangngal᷊uandaga si ya'u, wuṛṛu i yamiu mammate si ya'u ringannu tawe masili.

⁴Unnuwisara nassal᷊a inolaangku, udde tawe maarugi si yamiu.

⁵I yamiu maṛṛingidda manungku watangannu mappianne wuassia'u; asasusa'u su sunnanu tatialan pasasal᷊a'u.

⁶Ṛinone i yamiu masingkatta manungku i ya'u tantal᷊anna sassansarannu Ruata, wuṛṛu nisametta sulal᷊ummu sedda-Ne.

⁷I ya'u mabbinsolokka ana waugu araṛṛagin-Ne udde, arawe tawe saran sangkatou apan ma'ellega si ya'u. “Suapa atatul᷊idda,” aintul᷊i'u, arawe tawe saran sangkatou apan maddaringikka si ya'u.

⁸Ruata nakkappingnga lal᷊angku, i ya'u tawe maal᷊iu, manga lal᷊angku niolang-Nge marandu-randumma.

⁹I Tou nangaṛṛo darotongku sarangkanambone, wuṛṛu arangku mapia nilal᷊eo-Ne.

¹⁰I Tou nango'a si ya'u wuassu al᷊awo'u tampa, naal᷊ihidda taumata nangabbutta ṛamuttu sasuanna, ana see niwala-Ne maṛṛissitta wuṛṛu tinumolangnga, etearoddi niaṛṛo-Ne anambon pangangatingku.

¹¹Asasa'un Duata si ya'u mangke lukkenggamma; i ya'u aellehan-Ne ere seen-Ne.

¹²Tantara-Ne mammangalo tawe aṛṛapinganna; lal᷊angku niwal᷊aatanna wuṛṛu rasangku nipangaloanna.

¹³Manga tuṛṛangku nilimbuaṛṛan-Ne wua dingangku; i ya'u nabbal᷊i taumata raho su anambon hawe'u.

¹⁴Ana'u sangkatou'u sarangkanambone mangindaun batanganne; manga hawe'u tate mannaungnga si ya'u lai.

¹⁵Allangku wawine naabul᷊ite isai i ya'u, mawun mangitou; aellehanne i ya'u taumata apan taambe niasingkatanne.

¹⁶I ya'u namaggo allangku, arawe i tou tawe sinumimbakka, salaiwe i tou ta'u isal᷊o'a ringannu masi'ome.

¹⁷Awingku mammuta maasimbua singangu'u, tuṛṛangku sidutu tawe mangundani'u.

¹⁸I ya'u lallobbosannu al᷊aṛṛana'a su lal᷊anna; napawe i ya'u rumarisikka, i ya'u ilallagen mangitou.

¹⁹Maasilo si ya'u, hawe'u ate aaṛṛiongkomanna; i ya'u tinantangngi mangitou apan arangnguangku.

²⁰Waddangku ete nallambe pisi uapi'unna duṛṛi; i ya'u maraniten mate wuṛṛu niawa'u tumalla'a.

²¹Ei manga hawe'u, akkanaawe i ya'u, ana waugu liman Duata namuulla si ya'u.

²²Ruata sidutu mannasa'u; anio i yamiu mattanno si Tou? I yamiu taambe lai nawusa mannansara?

²³Ah, antimanna manga wisaranu iwoṛṛetta, na'oman sara i ya'u sidutu nanaunganna;

²⁴doronganna ringannu atta'a apan nipaangnga su watu, tadea'u mataṛṛangnga su al᷊o'engngu tempo.

²⁵I ya'u masingkatta manungku su surga pia Mananambaa'u; panginsueanne i Tou sarun dumanta mangontolla si ya'u.

²⁶Salaiwe manga pisi su baddangku nal᷊al᷊essa wuṛṛu nawawa'a, arawe su al᷊o'engngu i ya'u pia awa'a, i ya'u sidutu ua'ellega Ruata.

²⁷Ringannu mata'u sassane i Tou sarun ta'u ellehanna, wuṛṛu si ya'u i Tou mabbal᷊i hawe. Naungku nasusa ana waugu i yamiu mabbisara,

²⁸‘Ereapa dal᷊anne i ite mangalaen Tou?’ I yamiu maddea'a pangiananne ipa'ola'a hatto.

²⁹Arawe, orassa indi ata'utten hal᷊ele! Ana waugu Ruata massa'u wuṛṛu makkuumannu taumata marosa; ne asingkatte i yamiu, manungku pia Duata apan makkuungngu taumata.”