Read Talaud AYUB 20 Bible Online

AYUB 20 - Talaud bible

AYUB 20

¹Ana see i Zofar sinumimbakka, “Ei Ayub, i ya'u naapendamma papasendekku, orassa indi mangongullen sasimba'u.

³Manga wisaranu udde mangke mallobbossa atonna, arawe i ya'u masingkatta ereapa sumimbakka udde.

⁴Arawe masingkattawe i'o manungku wuassu tempo dorone, ro'en taumata paarorone niaddo su runia,

⁵al᷊al᷊uassu taumata lal᷊eo tumba'u tal᷊angkadio'a, wuṛṛu lal᷊umanna'u taumata mal᷊awangnga tumba'u sangkaṛṛondappa?

⁶Salaiwe awawantuge naddatingngu winalanganna, na'oman sara puane nangeṛṛetta winabbawa,

⁷arawe i tou sarun mawul᷊i saran mal᷊annu-l᷊annu, mawul᷊i wuassu runia ringannu lal᷊anne apan nilobbossa. Manga taumata apan buatte masingkatti tou, sarun maiwal᷊o, “Ei, watukkennapa i tou?”

⁸I tou sarun mawul᷊i ere lintaun bal᷊iawa, mahangginna ere aellega sutempo ṛabbi.

⁹I tou tate lai asiloannu mata; i tou tate lai sutampa atatanaanne.

¹⁰Apan dorone nita'one wuassu taumata tawe darotongnge ṛinone lannaannu manga anangnge.

¹¹Salaiwe i tou dario'a wuṛṛu matohassa, arawe tal᷊angkadio'a lai i tou maola'a awu sassane.

¹²Atemangngawe eteapa al᷊al᷊eo sulal᷊ummu moṛṛongnge! Pendamanna mappau amungkangngu masal᷊a allupanna; ana waugu udde sinakipunte su al᷊ungngu lilane, tadea'u mal᷊annu i tou uapendamma.

¹⁴Arawe anna udde nawal᷊u sulal᷊ummu tianna, nabbal᷊i pasangkadda mangngapiddu papate.

¹⁵Darotongnga nita'o apan niallumme, niwata'a nimutane; Ruata napassabbangnga wuassu tianne.

¹⁶Mandal᷊al᷊eo sarun ma'inumma pasangkada mangngapiddu silaka, i tou sarun mate waugu ere pina'iin atoanna mawisa.

¹⁷I tou tawe maatemma lanan zaitun apan marasai, ara'e lai susu wuṛṛu pul᷊a apan pia asadde.

¹⁸Al᷊awo'u auntunganne sarun iapawelengnge; ul᷊en inasaharanne sarun tawe atemmanne.

¹⁹Ana waugu i tou mangngallangnga wuṛṛu tawe mappadul᷊i taumata apan tawe dapane; i tou nangaṛṛo manga wal᷊en apan tawe niaparisikke.

²⁰Ana waugu awawal᷊iune tawe tatiwaanne, ne i tou sarun tawe mawusa.

²¹Amungkangngu i tou umanna sarangkanambone insueanne, ana waugu paa'alane tawe nattaṛṛangnga.

²²Sutempo paa'alane nabbal᷊i manambo, asasusa wuṛṛu papaṛṛangnga rumanta si tou.

²³Sutempo i tou uasasaṛṛawutta maloṛṛo tianne, Ruata nabbal᷊i nasa'u wuṛṛu nakkuumanne.

²⁴Amungkangngu i tou tumal᷊angnga mallinda'u hal᷊ele waja, i tou sarun lessannu anaanna witu'a.

²⁵I tou naṛṛinoannu anaanna, na'oman sara nal᷊essa; pentakku anaanna apan mal᷊endappa nallappassa su waddangnge, ne atata'utta namene naungnge.

²⁶Naṛṛimunsa'a anambon darotongnga apan sasahipunanne; i tou wuṛṛu anambon lal᷊oṛṛon bal᷊ene niepoddu putungnga apan tawe nire'ommu taumata.

²⁷Langitta namasingkattu al᷊al᷊eone; runia naddisikka mando'appa si tou.

²⁸Al᷊awo'u paa'alane sarun masue, ana waugu nangillembote asasa'un Duata.

²⁹Uddewe pal᷊addu taumata apan mapontol᷊osanna, pal᷊adda apan tinantunnu Ruata si tou.”