Read Talaud AYUB 21 Bible Online

AYUB 21 - Talaud bible

AYUB 21

¹Ayub sinumimbakka, “Paddaringikke manga wisara'u; tumba'u udde apan ta'u doronganna maola'a ipalluassa.

³Walaawe i ya'u mallol᷊ossa mabbisara, wua'udde i yamiu wotongnge lai mangal᷊uandaga!

⁴Wal᷊ine ringannu taumata i ya'u uawawul᷊o, nariaddi tawe apane amungkangngu i ya'u tawe sabbarene.

⁵Pa'ellege si ya'u, ne i yamiu sarun tumiangnga, i yamiu mal᷊annabba wuṛṛu moṛṛongngu sasapinganna.

⁶Amungkangngu i ya'u maṛṛingiddu olangnge indi i ya'u mangngindote ana waugu nata'utta.

⁷Anio taumata lal᷊eo nionggol᷊annu Ruata uukka mal᷊o'engnga, wuṛṛu darotongngi mangitou sidutu aatambanna?

⁸I mangitou mabbiakka allannune na'oman sara naasilo ana'a pulunni mangitou nabbal᷊i saṛṛentumuwo.

⁹Amonanni mangitou su al᷊al᷊angnganna; Ruata tawe nandantan silaka si mangitou.

¹⁰Winatangngi mangitou mangke mabbalaga, wuṛṛu tawe singkal᷊one maṛṛana'a.

¹¹Al᷊aṛṛana'u taumata lal᷊eo sussolo'a ringannu lulluassa, naal᷊ihidda domba wakku apan lullala'a.

¹²Tatantalongannu tingikku tambore, wansi wuṛṛu kecapi, i mangitou lulluassa mangngantari wuṛṛu massal᷊aingnga.

¹³Manga allone a'insueanna sulal᷊ummu lal᷊umanna'a, wuṛṛu i mangitou mate sulal᷊ummu paddarame.

¹⁴Sumbal᷊i i mangitou buatte nabbisara Ruata, “Pangindaute si yami wuṛṛu roote! I yami tawe maddaringikka wuṛṛu maddiri massunna pandumanna wuṛṛu apulu-Nu su pabbiaṛṛanni yami.”

¹⁵I mangitou maṛṛingidda, “Mangimbe Ruata tawe gunane, wuṛṛu umal᷊iomanna si Tou tawe gessine.

¹⁶Wal᷊inewe ana waugu auatanni ite sassane, nia'omante al᷊awo'u pandumma wuṛṛu tuddan kite?” Arawe i ya'u atonna-tonna maddiri matatuṛṛutanna ringannu lal᷊annu ṛingidda wuṛṛu addapatta aroddi.

¹⁷Apa buatte sasol᷊oannu taumata lal᷊eo nipaddumma, wuṛṛu i mangitou naṛṛiaannu silaka wuṛṛu nawaddo? Apa Ruata nasa'u si mangitou, na'oman sara i mangitou niṛṛuuman-Ne?

¹⁸Apa i mangitou ere laṛṛami wuṛṛu awu apan nisal᷊iawukku lakkuti wuṛṛu tiniuppu anginna?

¹⁹I yamiu mabbisara, “Ana'a niṛṛuumannu Ruata ana waugu rosan kiamangnge.” Arawe wisara'u: Ete taumata marosa udde sarun iṛṛuumannu Ruata, tadea'u i mangitou maatutukka manungku udde ana waugu rosan mangitou, ne Ruata nandantan ṛuuman-Ne.

²⁰Wala'ewe taumata marosa mamasanna rosane sassane, wala'ewe i tou maapendamma asasa'un Duata Apan Atanggaṛṛanne.

²¹Amungkangngu taumata nia'omante auuṛṛanne su runia, ta'e mannaungnga i tou tanne amonanne su lal᷊ummanna'a?

²²Wotongngewe taumata manantiro Ruata, sumbal᷊i ete Ruata sassane apan makkuungngu riadianna su surga?

²³Pia taumata apan tawe rumadda'a su al᷊o'engngu pabbiaṛṛanne; i tou nate ringannu lal᷊umanna'a wuṛṛu mal᷊uassa, Apapatene matammudda ringannu apendamma su lal᷊umanna'a, see lai waddangnge ta'e matohassa.

²⁵Arawe piaddu lai mattate uatataṛṛangnga asasusa, tawe saran passa naapendamma al᷊al᷊uassa.

²⁶Arawe su lal᷊abbinganna, i mangitou ual᷊allowangnga suadio'a; laṛṛimpul᷊unannu ul᷊idda wuṛṛu oa'a.

²⁷Atonna i ya'u masingkatu ṛingiddi yamiu wuṛṛu al᷊awo'u al᷊al᷊eo apan lakkiinni yamiu.

²⁸Aiwal᷊onu, “Suapane wal᷊en tembonanne apan ma'ola'a inolaanna lal᷊eo?”

²⁹I yamiu taambe naiwal᷊o taumata apan masokka sumal᷊ele? Apa i yamiu tawe mangimanna watti'a apan niwatti'i mangitou?

³⁰I mangitou mabbisara, “Su allo Ruata mangonggollu ṛuumanna, manga mandal᷊al᷊eo sarun iapasal᷊amatta.”

³¹Taweddu mangalaen pallal᷊agune; taweddu mabbal᷊issa al᷊al᷊eone.

³²I tou niapidda su lal᷊abbinganna, wuṛṛu nitaṛṛo su loṛṛangnga; labbingnge rariagganna wuṛṛu babbaresianna.

³³Su ṛiwune taumata u'amatta uatantalongnga winal᷊unanne; ringannu leta'a lai masabbupinangombo si tou.

³⁴Nariaddi, lal᷊imbannu udde tawe loṛṛone wuṛṛu anambon sasimbakku udde awusu!”