Read Talaud AYUB 22 Bible Online

AYUB 22 - Talaud bible

AYUB 22

¹Wua'udde i Elifas nabbisarate, “Suwallattu alu taumata, tawe saran sangkatou apan pia gunane su Ruata. Taumata apan tumaniten pande, tumba'u mahuna su watanganne sassane.

³Apa pia gunane su Ruata, amungkangngu i'o tuttuṛṛutta apulu-Ne? Apa untungnge si Tou, amungkangngu wiakku nasuungnga?

⁴Wal᷊ine ana waugu atata'unnu su Ruata, i'o niansil᷊anna wuṛṛu ereola'u nassal᷊a,

⁵ewe'e ana waugu tumaniten manambo rosanu, wuṛṛu tumaniten dal᷊eo inolaannu wuṛṛu pallal᷊agunu.

⁶Amungkangngu tuṛṛangngu tawe maawaekka utangnge, pangaṛṛote anambon paddenne.

⁷Taumata apan masahadda i'o tawe napa'inumma, iapa mal᷊unussa tawe niwagoannu umanna.

⁸I'o mappaattu pangkatta wuṛṛu taṛṛino ipangaṛṛo leta'a sarangkanambone.

⁹Wal᷊ine tumba'u manga wawine wal᷊u apan tawe itul᷊ungngu, arawe aisisin timpal᷊ussa lai aallangannu.

¹⁰Ana waugu uapal᷊iwutta si'o, orassa indi napeneten sedda, wuṛṛu niaṛṛombanganne napenen atata'utta.

¹¹Allo marandumpe, i'o tate lai maasilo; i'o nal᷊ammissa nielekku manawangnga apan masassaga.

¹²Wal᷊inewe Ruata uawanua su langitta apan atanggaṛṛanne, wuṛṛu mangngintanno inawa, watukku manga anumpitanna apan atanggaṛṛanne?

¹³Arawe i'o naiwal᷊o, “I Tou masingkattu apa? I Tou su samba'an binabbawa wuṛṛu tate mappakuungngi ite.”

¹⁴I'o massunna manungku aellegu MAWU lal᷊indumannu winabbawa wuṛṛu manungku tumba'u su passarannu langitta wuṛṛu runia i Tou u'amatta?

¹⁵Apa i'o sidutu mappulu sumabbi su lal᷊anna apan nipilen taumata lal᷊eo?

¹⁶I mangitou niarṛṛo tantal᷊anna taambe nia'omanna papatene, wuṛṛu nielekku manawangnga apan wahewalla.

¹⁷Ete i mangitou udde apan waṛṛani nanol᷊a'u Apan Lembontaṛṛino, wuṛṛu massunna i Tou tawe maola'a mangapa si mangitou.

¹⁸Sumbal᷊i Ruata buatte na'ola'a si mangitou ala! Atonna i ya'u tawe maasunna ṛingiddu taumata lal᷊eo!

¹⁹Taumata mapia, lullagge napenen al᷊al᷊uassa, napawe maasilo taumata lal᷊eo naasomba ṛuumanna.

²⁰Al᷊awo'u darotongngu taumata lal᷊eo nasuete naṛṛimunsa'a, wuṛṛu putungnga nangepoddu saranapa apan ta'e nallambe.

²¹Ne, Ayub, paddameten MAWU, tadea'u i'o maasomba atatammudda. Amungkangngu udde olaannu, i'o sarun maasomba auntunganna.

²²Sengkampe sarangkanambone apan iaaṛṛa'u MAWU si'o; sahipunte udde sulal᷊ummu naungngu.

²³Pabbelengke su MAWU ringannu naungnga mawawo al᷊al᷊eo su wal᷊enu ṛinone insueannu.

²⁴Rammea'e wul᷊awanna apan lembon tutune; lomboa'e su wantan sal᷊ukka apan tate ua'ene lai.

²⁵Wala'ewe Apan Lembontaṛṛino maola'a wul᷊awannu, wuṛṛu sal᷊aanu apan maarega.

²⁶Ne i'o sidutu wotongnge mangimanna Ruata, wuṛṛu maasingkatta manungku i Tou punnu lal᷊umannangngu.

²⁷Amungkangngu i'o umal᷊iomanna, i Tou sarun sumimbakka si'o, wuṛṛu i'o wotongnge manipussa anambon paairenu.

²⁸Inasaharannu sidutu sarun pia gessine, wuṛṛu asasemakka sarun manemakka pabbiaṛṛannu.

²⁹Taumata apan mawunga sarun iapawawon MAWU, arawe iapa naungnge mawawo sarun iapasal᷊amatta.

³⁰Ruata sarun mantul᷊ungngu amungkangngu i'o tawe sal᷊ane, wuṛṛu amungkangngu i'o tuttuṛṛutta apulu-Ne.”