Read Talaud AYUB 3 Bible Online

AYUB 3 - Talaud bible

AYUB 3

¹Wua'udde i Ayub nanattakke nabbisara wuṛṛu mammontoga allo apan niasungkanganne, wisarane,

²“Oh Ruata, wontohete allo niasungkangangku, wuṛṛu su ṛabbi i ya'u nanattakke su illoṛṛon inangku!

⁴Oh Ruata, ola'e allo udde marandumma, pappasse wuassu naungngu ma'oman sara mawul᷊i; ariewe I'o mamala lai semakka matualaga manemakka si tou.

⁵Olaawe allo udde ma'itumma uarallamma, wasa tuudda, mal᷊abbukka wuṛṛu mawol᷊a; oopeten winabbawa wuṛṛu rallamma, lindumete wuassu semakku matannallo.

⁶Ṛinonewe ṛabbi udde iliudda wuassu reengannu tonna wuṛṛu wul᷊anna; ariete lai naunganna, ariete lai isaggo.

⁷Wala'e ṛabbi mapenen ararandumma tawe sasaṛṛionto'a, tawe al᷊al᷊uassa.

⁸Ei taumata tonaassa wuṛṛu mamamiaṛṛa'u Lewiatan, ema'ete allo udde ringannu sasalu wuṛṛu wawontoga;

⁹Ariete ma'oman sara anumpitanna aṛṛusuallo ṛumena, ariete pabbala'a semakku matannallo matuakka! Wala'ewe ṛabbi udde ual᷊aṛṛaddo tawe gunane darantan allo wuṛṛu antimma apan wakku.

¹⁰Niawontohante ṛabbi maasilaka sutempo i ya'u niasungkangngu inangku, wuṛṛu niwala uatataṛṛangngu sansara.

¹¹Anie i ya'u tate nate sulal᷊ummu illoṛṛon inangku, ara'e nawassutannu sasangngu sutempo i ya'u niasungkangnga?

¹²Anio i ya'u niaṛṛa'uppu inangku wuṛṛu niṛṛiwane, see lai niapasusu su susune?

¹³Unnuwisara sutempo udde i ya'u nate, ne i ya'u mattiilla wuṛṛu mangillol᷊o ringannu matammudda,

¹⁴ere manga ratu wuṛṛu tembonanne sutempon tiwatta, apan napararisikku apia wal᷊en araratuanna sutempon dorone.

¹⁵I ya'u niamatiil᷊anna naal᷊ihidda parinsi, apan nalloṛṛo wal᷊ene ringannu sal᷊a'a wul᷊awanna.

¹⁶Anio i ya'u tawe niasungkangnga tawe niawane tadea'u mattilla mal᷊angnga-langnga?

¹⁷Poiaroddi, sulal᷊ummu labbingnga, taumata lal᷊eo tawe ma'ola'a al᷊al᷊eo, wuṛṛu mamamasanna tawe niasueannu ikkatta wotongnge maaillol᷊on sahadde.

¹⁸Wuṛṛu taumata niatawanna naasangngo mapia, nal᷊iu wuassu araṛṛagissu manga mandariaga.

¹⁹Poiaroddi anambon taumata uasul᷊ungnga: apan tinumelengnga wuṛṛu tawe aranne. Wuṛṛu manga allangnga, panginsueanne nipallossa.

²⁰Anio taumata sidutu niwala mabbiakka susa? Anio semakka nionggolla su taumata apan massusa?

²¹Si mangitou mappianne lal᷊abbinganna wuassu darotongnga, uaṛṛaddo papate, arawe tawe rumanta.

²²Lal᷊umanna'a wakkute apendamanna inapawe i mangitou mate wuṛṛu ilabbingnga.

²³Tempo sasaruananni mangitou lal᷊indumannu Ruata, i mangitou papal᷊iwutante wuassu al᷊awo'u pi'une.

²⁴Hahantin anna i ya'u sussal᷊iomanna, tawe illol᷊one i ya'u ma'uare.

²⁵Al᷊awo'a apan isassinggawangku, naṛṛia'a si ya'u, al᷊awo'a apan ta'u iaata'utta, nangumpisanna si ya'u.

²⁶I ya'u tawe atatammudda, i ya'u uatataṛṛangnga tawe panguddusanne.”