Read Talaud AYUB 30 Bible Online

AYUB 30 - Talaud bible

AYUB 30

¹Arawe orassa indi i ya'u aal᷊uandahannu taumata maddario'anna. Dorone iamangngi mangitou aellehangku tumaniten addio'a iapal᷊u'adda domba'u suadio'a ringannu asu mandariaga.

²Si ya'u i mangitou tawe gunane ana waugu niasueanten ikkatta.

³I mangitou mal᷊unussa mangke uatataṛṛangnga, na'oman sara u'ante ṛamutta naṛṛangu su wadda'a apan mal᷊annabba.

⁴I mangitou mangngabbutta nannal᷊o su wadda'a mal᷊alangnga wua'udde umante mawae ete rongnga aroddi lai ṛamunne.

⁵I mangitou nilimbuaṛṛannu aintul᷊i naal᷊ihidda taumata mallimbuakka taṛṛa ta'o.

⁶I mangitou uatana'a su manga liangnga; manga loṛṛangnga su wal᷊en wowone maola'a wal᷊en mangitou.

⁷Su mahurangnge i mangitou magguhaubba naal᷊ihidda winatangnga, uaammulla su al᷊ungngu anggaṛṛumunannu mahurangnge.

⁸I mangitou tawe aranne wuṛṛu tawe aregane, manga taumata apan buatte nilimbuaṛṛanna wuassu wanuane.

⁹Orassa indi i mangitou nirumanta wuṛṛu i mangitou nilumage'u; si mangitou i ya'u indi tumba'u maola'a papal᷊age.

¹⁰I ya'u a'ellehanni mangitou addio'a wuṛṛu maarantinna, ewe'e lai hati'u niadduanni mangitou.

¹¹Ana waugu Ruata na'ola'a si ya'u lome wuṛṛu tawe ikkanne, i mangitou napasabbangngu naungngi mangitou lal᷊eo.

¹²Ammul᷊annu taumata lal᷊eo udde namangalo si ya'u wuassu saruanne, wuṛṛu ananawo'u buatte niṛṛiinni mangitou.

¹³I mangitou namal᷊aatta lal᷊angku tadea'u ipamate si ya'u; tawe saran sangkatou apan nanal᷊are sutempo i mangitou mammangalo.

¹⁴Naal᷊ihidda manawangnga nihohakki mangitou tanda'a watu'u; sangkaṛṛindo'a i mangitou nirumanta nakkinda waddangku.

¹⁵Atata'utta nangooppa waddangku; naal᷊ihidda anginna tinumiuppa, areggan baddangku malliudda; naal᷊ihidda winabbawa sinumabbi, nawul᷊ite lal᷊umanna'u.

¹⁶Orassa indi i ya'u maraniten mate; tawe sumbala su asasusa'u.

¹⁷Sutempo ṛabbi anambon duṛṛi'u huggiadda; hiadda apan mataddu'a tawe illol᷊one.

¹⁸Ruata nangattongnga si ya'u su ullekkan lau'u na'oman sara lau'u pasi aele su waddangku.

¹⁹Sulal᷊ummu labbo i ya'u niemang-Nge, i ya'u naola'e ere sapadda!

²⁰I ya'u sumal᷊ande Si'o, oh Ruata, I'o tawe sinumimbakka; napawe i ya'u umal᷊iomanna, I'o tawe maddaringikka.

²¹I'o tumaniten maṛṛagissa si ya'u, I'o mannasa'u ringannu anambon auatan-Nu.

²²I ya'u niwala-Nu itattalla'u anginna; sulal᷊ummu anginna ma'ikkatta i ya'u ipallal᷊ombo-Nu.

²³I ya'u masingkatta, I'o nangapi'u su runian papate, tampan al᷊awo'u apan biakka niammulla.

²⁴Anio I'o namangalo manga taumata apan nasilaka, Apan tawe maal᷊ore wuṛṛu tumba'u maddorongnga tatal᷊antuppa?

²⁵Wal᷊inewe i ya'u lulluai suadio'a ringannu taumata apan massusa, wuṛṛu niumakkannu taumata apan pia awussa?

²⁶I ya'u mangngantimma lal᷊umanna'a wuṛṛu asasemakka, arawe ete asasusa wuṛṛu ararandumma apan nirumanta.

²⁷I ya'u nihesa'u asasusa wuṛṛu al᷊al᷊eo; allo hantiannu allo manambo asasusa'u.

²⁸Sulal᷊ummu ararandumma, tawe semakka, i ya'u lullallele; i ya'u dirumarisikka su tangngan awadaalla, ma'iontolla.

²⁹Tingi'u massusa napenen tatal᷊antuppa naal᷊ihidda lal᷊allun serigala wuṛṛu manu'a unta.

³⁰Pisin baddangngu nabbal᷊i ma'itumma; waddangku natutungngu sal᷊ihamma.

³¹Dorone i ya'u naaringikka musikku al᷊al᷊uassa, orassa indi tumba'u lal᷊allu lal᷊uai sassane.