Read Talaud AYUB 34 Bible Online

AYUB 34 - Talaud bible

AYUB 34

¹Wal᷊inewe i yamiu pande wuṛṛu pia asingkatta? Ne, paddaringikke anambon wisara'u indi.

³Taumata maasingkatta anna matemangnga amungkangngu mattemma, wuṛṛu manga wisara apande napawe maddaringikka.

⁴Hatto indi ṛinone parikisanni ite see iṛṛingiddi ite suadio'a.

⁵Ayub nabbisara, ‘I ya'u tawe pasasal᷊a, arawe Ruata maddiri mangonggollu atatul᷊idda si ya'u.

⁶I ya'u naudde mangngawusu, waugu mabbisara i ya'u tawe dosane. Orassa indi i ya'u nal᷊essate wahewalla, salaiwe i ya'u tawe sal᷊ane.’

⁷I yamiu buatte naasilo taumata ere i Ayub indi? I tou masokka-sokka mallobbossa Ruata.

⁸I tou apulune maggawen taumata mapontol᷊osanna wuṛṛu inai mallal᷊o'an taumata lal᷊eo.

⁹I tou nabbisara, manungku tawe gunane amungkangngu i tou ta'e mattinsahadda mallaghun apulun Duata.

¹⁰Ei manga taumata apan pande, paddaringikka! Tawe mariaddi Ruata Apan Lembontaṛṛino ma'ola'a pasasal᷊a?

¹¹I Tou manggesekka taumata uasul᷊ungngu inolaanne, makkungnga si tou uasul᷊ungngu pallal᷊aghune.

¹²Ruata Apan Lembontaṛṛino tawe ma'ola'a al᷊al᷊eo; anambon taumata nionggol᷊an-Ne atatul᷊idda.

¹³Ete wuassi sai Ruata nanengkamma taṛṛino-Ne? Isai apan nanantillu runia indi si Tou?

¹⁴Unnuwisara Ruata nanawutta niawan taumata, wuṛṛu nangul᷊e apia singangun pabbiaṛṛanna,

¹⁵ne matete anambon riadianna sarangkanambone apan pia niawane, wuṛṛu taumata maola'a awu ere su panattaṛṛanne.

¹⁶Ne, amungkangngu i'o pande, panutukke, tainga'e tanl᷊inganu wuṛṛu paddaringikke.

¹⁷Apa Ruata apan matul᷊idda wuṛṛu matohassa udde niapasal᷊anu? Apa su sunnanu Ruata maddantinnu atatul᷊idda?

¹⁸Ruata makkuumannu ratu wuṛṛu tembonanne amungkangngu i mangitou lal᷊eo wuṛṛu mapontol᷊osanna.

¹⁹I Tou tawe manamba'a manga ratu, ara'e malliu ṛoron taumata ala wuassu taumata asiangnga. Ana waugu i mangitou sarangkanambone udde niariaddi-Ne.

²⁰Su ṛabbi mattangnga, i mangitou inaṛṛombanganne mate. Ruata makkuumannu tembonanne wuṛṛu i mangitou lai nate; ringannu mal᷊uassa i Tou namate taumata matohassa.

²¹I tou ual᷊u'adda wiakku taumata, niellehan-Ne al᷊awo'u lempangnge.

²²Tawe ararandumma, salaiwe wasa tuudda, apan wotongnge mapamunin taumata marosa.

²³Ruata salaiwe tawe manantunnu tempone, taumata rumanta ṛuungannu Ruata.

²⁴Ringannu tawe manaṛṛassidda wuṛṛu mamarikissa I Tou mapaaddo tembonanne wuṛṛu manenegu hahantine.

²⁵Ana waugu, i Tou masingkattu inolaanni mangitou; ne i Tou nanal᷊inggi wuṛṛu nakkimunsa'a si mangitou sutempo ṛabbi.

²⁶I mangitou nipero-Ne ana waugu rosan mangitou, su saruannu awadaalla i mangitou niṛṛuuman-Ne.

²⁷Ana waugu i mangitou tawe tumuṛṛutta apulu-Ne, wuṛṛu tawe maddaringikka anambon parenta-Ne.

²⁸Waugu i mangitou taumata asiangnga sussal᷊iomanna lal᷊uain mangitou niaringiṛṛannu Ruata.

²⁹Napawe Ruata makkawessa mangke mal᷊annabba, taweddu saran sangkatou apan waṛṛani mapasal᷊a-Ne. Amungkangngu i Tou namunin hati-Ne, tawe saran sangkatou apan maasangkalla si Tou.

³⁰Ne manga walahanna nallomete maningaddu pangangallangnga wuassu taṛṛinon al᷊al᷊eo.

³¹Ayub, apa rosanu su lantakku hatin Duata buatte nia'unu? Apa i'o buatte naddiandi tate ma'ola'a rosa apia?

³²I'o buatte naddorongnga tadea'u i Tou manta'en pasasal᷊anu? I'o buatte nassalu manungku mangaddon inolaanna udde?

³³Ṛatadde'e Ruata mangonggollu apa apan ipaapulunu, napawe inolaannu Ruata tawe sengkamannu? Orassa indi, i'o apan sarun makkawessa, wal᷊ine i ya'u. Wal᷊oa'e apa addapannu!

³⁴Anambon taumata pande i mangitou sarun umire; taumata pande apan maddaringikka si ya'u sarun mabbisara

³⁵manungku i Ayub mabbisara tawe maasunna, wuṛṛu manungku wisarane tawe attappasanne.

³⁶Amungkangngu manga wisaran Ayub udde saṛṛasiranna ringannu ma'udduppa, sarun matualaga manungku wisarane udde ere taumata lal᷊eo.

³⁷Pasasal᷊ane lai tambannu sambau rosa; wuṛṛu mangngaddio'a Ruata su saruanni ite.