Read Talaud AYUB 38 Bible Online

AYUB 38 - Talaud bible

AYUB 38

¹Wua'udde wuassu lal᷊ummu anginna wahewalla MAWU nabbisara si Ayub, arendi:

²“Isai i'o, na'oman sara waṛṛani mappadduan asingka-U ringannu manga wisaranu apan woddo wuṛṛu tawe loṛṛone udde?

³Orassa indi, saruante si Ya'u ere sangkatou esakka, wuṛṛu simbaṛṛete manga aiwal᷊o indi.

⁴Nariaddite i'o sutempo i Ya'u nandiaddi runia? Amungkangngu asingkannu mal᷊alangnga, pasingkata'e!

⁵Isaite apan manantunnu ahewallu runia? Isaite namataddu tal᷊i pinanguukka si tou? I'o masingkattu sasimbakke?

⁶Ereapa manga tiangnga uatumpilla runia uapasi'a matohassa? Isai apan nangaddon batun su pi'un dunia ringannu matohassa,

⁷sutempo manga anumpitannu marua allo mangngantari suadio'a wuṛṛu manga riaddiannu surga maggio lulluassa.

⁸Isaite naṛṛuuddu ngara ipakkappingnga laudda sutempo wuassu tiannu runia sinumabbangnga ua'ene?

⁹Ete i ya'u apan namalungnga tahal᷊oangnga ringannu winabbawa wuṛṛu mami'unnu ararandumma.

¹⁰I ya'u nanantunnu passarannu laudda wuṛṛu ringannu ngara uawal᷊aatta I ya'u nakkapingnga.

¹¹Wisara-U si tou, ‘Eteindi passaranne. Arie i'o lumewessa! Ete isindi manga tahal᷊oangnga apan matohassa ṛinone mattaalla.’

¹²Ei Ayub, salaiwe paassa i'o buatte, nandolo'u nirumanta maraninnallo?

¹³Buattewe i'o nandolokku semakku matannallo nangagassa runia wuṛṛu namaretan taumata lal᷊eo wuassu tampa i mangitou uaimbuni?

¹⁴Semakku allo mammasilo ringannu matuala bowone wuṛṛu wawal᷊anne ere cappa su leta'a maddeetta wuṛṛu lipinne ere sambau juba.

¹⁵Semakku allo tumaniten masemakka su taumata tawe mawune, wuṛṛu nanaṛṛangnga si mangitou ma'ola'a araṛṛaggissa.

¹⁶Buattewe i'o niumurumma su al᷊imatan tahal᷊oangnga, naddatingngu wantane? Buattewe i'o niumamatta su rapappakku laudda mal᷊alangnga?

¹⁷Buattewe pia taumata nanta'e si'o ngara wahewalla su saruannu runian papate apan marandu-randumma?

¹⁸Wotongngewe i'o maṛṛangngon ahewallu runia? Simbakke amungkangngu i'o masingkatta.

¹⁹Masingkattawe i'o wuassuapa darantane asasemakka, wuṛṛu suapa ṛinone punnu ararandumma?

²⁰Wotongngewe i'o manantunnu passarannu ararandumma wuṛṛu asasemakka? ara'e wotongnge mandolokki mangitou iapapul᷊e napawe nirumantate?

²¹Asinungka i'o wotongnge, ana waugu i'o timmadete, wuṛṛu sutempo runia niriaddi i'o uddete!

²²Buattewe i'o nattembo manga gudang-Ku pangangadoannu salju wuṛṛu uranna watu,

²³apan Ta'u sinahipunna sutempon elessa, sutempon pangalo wuṛṛu manga allon pasaseetta?

²⁴Masingkatewe i'o punnu matannallo? ara'e wuassuapa anginna ra'i tinumiuppa?

²⁵Isaite apan naal᷊i loṛṛangnga amatannu uranna wahewalla wuṛṛu nangonggollu amatanna su rallu'a wuṛṛu sawallo?

²⁶Isaite apan nanossokku uranna su wadda'a mal᷊alangnga, wuṛṛu su leta'a apan tawe wawanuannu taumata?

²⁷Isaite apan namokka runia apan mamara wuṛṛu maṛṛasa na'oman sara nannal᷊o sarangkanambone nassolla?

²⁸Apa uranna udde pia iamangnge sidutu? Isaite iamangngu manga wal᷊angngukka?

²⁹Apa ua'e eisse pia inangngene? Isaite nanungkangngu wal᷊angukka masunge?

³⁰Isaite namal᷊u ua'e nabbal᷊i watu, wuṛṛu na'ola'a wowon tahal᷊oangnga tawe umal᷊ore?

³¹Wotongngewe ammul᷊annu anumpitanna Ṛiabba wa'isannu? ara'e ṛarapussu anumpitanna Matitimma ipallossa?

³²Wotongngewe i'o mangehetta manga anumpitanna sutempone, wuṛṛu anumpitanna Iamba wahewalla wuṛṛu addio'a, i'o mangatokku amamanne?

³³I'o masingkattawe manga tita su winalanganna? wuṛṛu i'o wotongnge mangaṛṛa'a su runia?

³⁴Wotongngewe i'o mangintul᷊in parenta su winabbawa, wuṛṛu mandolokku winabba mandantan uranna maola'a manawangnga?

³⁵Wuṛṛu i'o mandolokku manga sawallo ma'ilatta, apa i mangitou rumanta wuṛṛu mabbisara, “I ya'u, Tua!”?

³⁶Wuassi sai manu'a waṛṛoa masingkattu tingngera Sal᷊ukku Nil ṛumammo? Isai namasingkatta manu'a tarau manungku uranna rumantate?

³⁷Isaite asingkanne natimu ipandeengngu winabbawa wuṛṛu mamilingnge ma'oman sara manguranna,

³⁸uranna apan napaaiggu awu nabbal᷊i ua'ampella wuṛṛu leta'a nabbal᷊i maddeetta?

³⁹Wotongngewe i'o lumul᷊u inassu manga singa wuṛṛu mapal᷊aiddu tiannu manga anangnge,

⁴⁰napawe i mangitou massirungnga sulal᷊ummu liangnga ara'e rumarammangnga sulal᷊ummu sal᷊akke?

⁴¹Isai lai mantul᷊ungngu manu'a gagak apan niamal᷊unusanna wuṛṛu mangke lullalele maddea'a anna? Isai lai umontolla napawe al᷊aṛṛanangnge mangngintul᷊i si ya'u maddorongnga anna?