Read Talaud AYUB 39 Bible Online

AYUB 39 - Talaud bible

AYUB 39

¹Masingkattawe i'o tingngera ambingngu wowone niasungkangngu inangngene? I'o buatte nanutukka rusa matengnga nanungkangngu anangnge?

²Masingkattawe i'o sangkura al᷊annune i mangitou uatianna? Wotongngewe tempone ṛumana'a iareengngu?

³Masingkattawe i'o angngerate i mangitou umal᷊udungngu waddangnge, see manungkangngu anangnge?

⁴Manga anangnge maggewalla wuṛṛu mattohassa su wadda'a mal᷊alangnga; i mangitou niumamatta wuṛṛu tate mabbelengnga ringannu inangngene.

⁵Isai apan mamallossu keledai matengnga su mahurangnge? Isai namu'a tal᷊ine wuṛṛu namalane lullalele?

⁶Si tou i ya'u nangonggollu wadda'a maola'a wal᷊ene wuṛṛu manga wadda'u asimma maola'a tatanaanne.

⁷I tou nangindaun manga soa wuṛṛu hione, taweddu wotongnge maaṛṛaro wuṛṛu mapamanarane.

⁸Wadda'u nannal᷊o su wowone tampa annananne, raddeaanne sinuananna apan nangelomma poiaroddi.

⁹Apa sapi lul᷊u maapulu mammanara ringannu? Mappuluwe i tou manaṛṛabbi su tandangnge?

¹⁰Wotongngewe i tou iitanna wuṛṛu iwata'a mammajeko wawail᷊annu? Wotongngewe i'o mandolokki tou mamaresi wawail᷊annu?

¹¹Wotongngewe i'o mangasakku auatanne apan matohassa, wuṛṛu manantillu manaranu apan mawakkatta si tou?

¹²Apa i tou nipangimanannu mangammulu hessin pangitingannu, wuṛṛu mangapidda watukku tampan pakkindanna?

¹³Aroddi al᷊ihakke aalabbu papaiddu manu'a unta! Arawe tatalla'u waṛṛoa tawe asul᷊unganne.

¹⁴Manu'a unta mattalluka su leta'a, ana see itantangnga; ne ete anne apan manal᷊ihangnga talluke.

¹⁵I tou tawe maatutukka manungku asinungka taumata maagassa wuṛṛu manga winatangnga matengnga maaṛṛinda.

¹⁶Pallal᷊agune ereola'u anangnge wal᷊ine tatahuananne; i tou tawe mappandumma amungkangngu manarane maola'a tawe gunane.

¹⁷Ete i Ya'u apan na'ola'a si tou woddo wuṛṛu longonna, i Ya'u tawe nangonggollu asingkatta wuṛṛu ṛingidda si tou.

¹⁸Arawe napawe i tou manattakke tumal᷊angnga mal᷊ihakka, i tou nandugi awal᷊o wuṛṛu sumasa'ene.

¹⁹Ei Ayub, ete i'o apan nangonggollu atatohassa su awal᷊o wuṛṛu wambul᷊u su pal᷊u'ane apan u'aalabba?

²⁰Ete i'o apan nandolokke sinumolo'a ere saṛṛappalanna, wuṛṛu ringannu mammasingnga mammata'utta taumata?

²¹I tou mangngalakka leta'a su wal᷊ane ringannu lulluassa, wuṛṛu ringannu naungnga wahewalla i tou inaite su tampa papangaloanna.

²²I tou waggan atappasannu matta'utta wuṛṛu sussinggawangnga; tawe gal᷊ele apan maasoṛṛotta si tou.

²³Ahidda apan papasannannu sumasa'ene uahal᷊egeṛṛanna wuṛṛu lullendappa aṛṛinoannu semakka.

²⁴Ringannu naungnga apan wahewalla awal᷊o udde tuttal᷊angnga; napawe trompetta manuntingikka i tou tawe maataṛṛangnga waddangnge.

²⁵I tou mammassingnga suapan trompetta iapatuntingikka wuassu marau i tou maasimbuate hal᷊urun pangalo. I tou naaringikka aintul᷊in manga tembonannu tantara sutempo i mangitou nangonggollu darolokka.

²⁶Apa manu'a asiaṛṛe i'o mangngaṛṛa'a tuttalla'a napawe i tou mattudda watukku timukka ringannu papaidde uasiappakka?

²⁷Ete parentanu apan tattuṛṛutannu manu'a iamba tantal᷊anna i tou taambe na'ola'a sal᷊akka su wowone matanggakka?

²⁸Su puiddu wowone watu udde i tou napararisikku wal᷊ene; pentakku manga watu apan maṛṛoro nabbal᷊i tanda'a watune.

²⁹Wua isudde i tou uariagga al᷊awo'u punnu anginna matane mangngintanno madde'a wiakke.

³⁰Suapa piaddu nate, isudde lai i tou, wuṛṛu daṛṛa niawawi udde niinummu manga anangnge.