Read Talaud AYUB 4 Bible Online

AYUB 4 - Talaud bible

AYUB 4

¹Ne i Elifas nabbisarate, wisarane: “Ayub, i'o tawe sumassilla amungkangngu i ya'u mabbisara? I ya'u tawe maataṛṛangnga tumaniten mal᷊annu uatinannanga.

³Manambote taumata buatte niaṛṛaannu, wuṛṛu i mangitou apan lome buatte niapatohannu.

⁴Manga wisaranu apan maasaṛṛimbuatta, maatimpu'o taumata nitara, nal᷊ammissa wuṛṛu nal᷊otakka.

⁵Arawe orassa indi i'o sassane niaṛṛiaannu asasusa; i'o niṛṛumoro, wuṛṛu tate antimma.

⁶Wal᷊inewe i'o satia su Ruata; wal᷊inewe wiakku tawe sangkulle? Amungkangngu aroddi, udde naṛṛinote i'o mangngimanna wuṛṛu tawe awul᷊iannu antimma.

⁷Paṛṛingidda, apa buatte nariaddi su taumata apan tawe sal᷊ane aṛṛiaannu silaka wuṛṛu asasusa?

⁸I ya'u naasingkatta wuassu aellega manungku taumata apan mammajeko waillu al᷊al᷊eo, wuṛṛu mangngasi'u wualannu asasilaka maola'a wualannu sasuanna, sarun mangitingnga silaka wuṛṛu asasusa!

⁹Naal᷊ihidda tandi'a, etearoddi asasa'un Duata namate si mangitou na'oman sara nasue!

¹⁰Taumata lal᷊eo mammiṛṛonganna wuṛṛu mammansingnga, naal᷊ihidda singa i mangitou lullallu. Arawe Ruata napamoun moṛṛongngi mangitou lapiddu namaddi manga isine.

¹¹I mangitou nate ere singa niasueannu wiakke, na'oman sara manga anangnge nassal᷊iawukka tawe tutukke.

¹²Su passa pia sambau sondappa na'oma ringangku, naal᷊ihidda sasal᷊imburungnga nunnenne'a sulal᷊ummu tal᷊inga'u.

¹³Atatii'u nasal᷊awaanna wuṛṛu nassongkakka si tou, naal᷊ihidda niwal᷊iawanna lal᷊eo su ṛabbi wasa.

¹⁴Ne i ya'u niṛṛumindu'a wuṛṛu nangiladdu atata'utta; ahewallu wadangngu mangngindo wuṛṛu mappapangiladda.

¹⁵Anginna sussingangu manniuppa hati'u, ne waṛṛabbissa dirumarisikke.

¹⁶Sambau paṛṛissu taumata uarisikka su saruangku; tattutuṛṛangku, arawe i tou awaganangku. Ana see i ya'u naaringikka tingikku wisara namaṛṛindu'a sutempo apan mal᷊annabba,

¹⁷‘Wotongngewe taumata tawe sal᷊ane su saruannu Ruata? Wotongngewe i tou tawe sangkulle su saruannu Mandariadine?

¹⁸Ewe'e lai manga allangngu Ruata su surga, tawe apangimanan-Ne. Ewe'e lai su manga mala'ekan-Ne niasangkal᷊an-Ne pasasal᷊a wuṛṛu sangkulla.

¹⁹Nangillembote lai riadianna sussangngo wuassu leta'a riadianna awu apan wotongnge passu'anna itaddilla ere wa'u'a!

²⁰Riadianna sussangngo udde wiakka su marua allo, wua'udde mate maṛṛangu sutempo wawallo, wuṛṛu saran mal᷊annu-l᷊annu tate lai naunganna.

²¹Ne nawul᷊ite sarangkanambone apan tatahuananna; i tou lai mate ringannu tawe naasomba asingkatta.’