Read Talaud AYUB 40 Bible Online

AYUB 40 - Talaud bible

AYUB 40

¹Ei Ayub, i'o lumawangnga si Ya'u, Ruata Apan Lembontaṛṛino; i'o mappulu maiawaddo ara'e i'o maapulu mannal᷊are?”

³Ne i Ayub sinumimbakka MAWU, “I ya'u mabbisara ere taumata woddo, oh MAWU. Sasimbakka apa apan wotongnge ta'u ionggolla? Tateddu lai apan ta'u iwisara.

⁵Tumaniten manambo apan ta'u niwisara.”

⁶Wua'udde, wuassu lal᷊ummu anginna ma'ikkatta MAWU nabbisara apia si Ayub.

⁷Ana see MAWU nabbisara si Ayub, “Saruante si Ya'u ere sangkatou esakka, wuṛṛu simbakke manga aiwal᷊o-U indi.

⁸Apa i ya'u massinaaddu atatul᷊i-U, wuṛṛu mapaaṛṛinon watangannu ringannu mapasal᷊a-U?

⁹Apa i'o matohassa ere i Ya'u? Wotongngewe tingikku rumallu'a ere tingi-U?

¹⁰Loggakewe watangannu ringannu awawantuga wuṛṛu asaṛṛaungnga, luṛṛea'e awawantuga wuṛṛu apapian naungnga.

¹¹Pa'ellege si mangitou apan matanggakka naungnge; sopa'e asasa'unu wuṛṛu bawoa'e i mangitou.

¹²Ore, pa'ellege taumata apan mawunga, waddoa'e i tou! ṛimunsa'e taumata lal᷊eo su tampane.

¹³Labbinga'e i mangitou sarangkanambone sulal᷊ummu awu; taṛṛoa'e i mangitou su runian taumata nate.

¹⁴Ne i'o sarun Ta'u raloanna ana waugu i'o naauntungnga ringannu auatannu sassane.

¹⁵Innunuete i Behemot, i winatangnga ansuangnga; naal᷊ihidda si'o, i tou lai riaddiang-Ku. Manga nannal᷊o nabbal᷊i wiakke, ere sapi anggole wuṛṛu sapi wiasa.

¹⁶Arawe inunnute atatohassa sulal᷊ummu waddangnge wuṛṛu auatanna su manga lantikke!

¹⁷I tou namatti'u tol᷊ene ere alu aras, manga lantikku palangnge matohassa wuṛṛu maattikka.

¹⁸Manga duṛṛine matohassa ere witu'a, leddane matohassa ere manga awubuwun baja.

¹⁹Suwallattu al᷊awo'u riaddiang-Ku ete i tou apan tumaniten maatiangnga; tumba'u anawaugu Mandariaddine i tou wotongnge iawaddo!

²⁰Su manga wuidda tampan winatangnga matengnga mannal᷊angnga lulluassa, tinumuwote nannal᷊o apan maola'a wiakke.

²¹I tou ual᷊allowangnga su al᷊ungngu ahuranganna ṛoaanna, suwallattu tiwo su wungkal᷊o i tou ma'imbuni.

²²Ahuranganna ṛoaanna uatillumma si tou ringannu manga lintaune. Punnu alu gandarusa su wiwikku sal᷊ukka uasirungnga si tou.

²³I tou tawe mata'utta salaiwe Sal᷊ukku Yordan masassagga ua'ene, i tou sidutu matammudda salaiwe ua'e nangelekka su hatine.

²⁴Isaite apan waṛṛani mapawutan matane, ana see manametta si tou ringannu manongnga sasumigge?