Read Talaud AYUB 41 Bible Online

AYUB 41 - Talaud bible

AYUB 41

¹Wotongngewe i'o manametta si wuala Lewiatan, tumba'u ringannu sambau wawaṛṛungngu inassa? Wotongngewe limane wa'isannu ringannu manga tal᷊i aiitta?

²Wotongngewe i'o manuṛṛin tal᷊i su ngirunne ara'e lai aaitta atta'a su ol᷊ane?

³Asinungka i tou sumal᷊ande si'o tadea'u ipallossa? ara'e ma'irenu maddorongnga aakkanna?

⁴Wotongngewe i tou makkiinnu paaire ringannu, wuṛṛu ma'ire i mangitou sidutu mangngimbe si'o?

⁵Wotongngewe i'o mangiitta si mangitou ere manu'u winalanganna papadul᷊iananna, apan maal᷊uassa manga allangnga wawine?

⁶Wotongngewe i tou iwal᷊u'u manga tumatondo wuṛṛu tahiannu manga mabbawal᷊u'a?

⁷Wotongngewe i'o mangusu'a pisine ringannu papanta'a matane tatallu ara'e i tou pantaannu tambakka apan mallappassa su puane?

⁸Pangeṛṛette si tou addiongke paassa, wuṛṛu i'o mangawelengnga apia; pabbawawul᷊o udde sarun tawe aabul᷊ianannu saran mal᷊annu-l᷊annu.

⁹Suapan taumata apan naasilo Lewiatan, sarun mabbal᷊i lome ana se mawantingnga mapinsanna.

¹⁰I tou mal᷊aṛṛaga amungkangngu pu'oanna tantal᷊anna mattiilla; tawe saran sangkatou apan waṛṛani dumarisikka su saruanne.

¹¹Isai apan wotongnge mamangalo si tou ringannu tawe mal᷊essa? Su runia indi taweddu wotongnge maaola'a udde.

¹²Wette i Ya'u mabbatti'u ola'u waddangngi Lewiatan, su ola'u atatohanne wuṛṛu pahudde apan maṛṛamaga.

¹³Tawe saran sangkatou apan wotongnge manggesa'a laubbu liudde ara'e mallappassa laubbu pangalo apan niluṛṛene.

¹⁴Isai wotongnge mamangngassa moṛṛongnge apan matohassa, tatuwoannu manga isi apan maata'utta?

¹⁵Naal᷊ihidda allungnga ual᷊al᷊apissa, uddewe liudde uareetta matohassa, naal᷊ihidda watu langgikka.

¹⁶Uaumpisanna, ua'iitta ma'ikkatta, na'oman sara anginna lai tawe maasutta.

¹⁷Allungnga udde aroddi atohanne uaa'aitta na'oman sara tawe wotongnge isal᷊iawukka.

¹⁸Amungkangngu i Lewiatan mabbannanna, lukkenate semakka; matane lullendappa ere matannallo sumabbangke.

¹⁹Lila putungnga massal᷊iawukka wuassu moṛṛongnge; wungan putungnga mattuakka su al᷊awo'u tampa.

²⁰Timbulla sussal᷊oi wuassu lal᷊ummu ngirunne, naal᷊ihidda timbullu alu su al᷊ungngu urinna.

²¹Sasangngone maaṛṛenggamma waṛṛa; ṛenggammu putungnga sinumabbangnga wuassu moṛṛongnge.

²²Liudde aroddi atohanne, na'oman sara sarangkanambone mangngiladda su saruanne.

²³Tawe tampa lome su pisine; i tou tawe mapesangnga ana waugu ere aattikku baja.

²⁴Naungnge ere atohassu watu, tawe suminggawangnga matohassa wuṛṛu maattikka ere watun gahilinganna.

²⁵Napawe i tou dumarisikka, taumata atohasanne awul᷊iannu awawaṛṛani, tawe maal᷊ore ana waugu tumaniten matta'utta.

²⁶Tawe gal᷊ele apan maal᷊essa si tou; tambakka, anaanna ara'e lai wangkao tawe maataddu'a si tou.

²⁷Atta'a si tou naal᷊ihidda nannal᷊o al᷊ussa wuṛṛu witu'a naal᷊ihidda asi'omen alu ṛenessa.

²⁸Tawe anaanna apan maal᷊imbuakka si tou; watu apan niwareta si tou naal᷊ihidda laṛṛami.

²⁹Pal᷊o-pal᷊o aellehanne naal᷊ihidda nannal᷊o mamara; i tou lullagge amungkangngu pia taumata mamanta'u wangkau.

³⁰Onappa su tianne naal᷊ihidda wal᷊iungnga maṛṛoro su pentakke. Naal᷊ihidda pajeko i tou maal᷊i leta'a wuṛṛu niwaane.

³¹Tahal᷊oangnga niluakke na'oman sara ere ua'e hugoggokka; naal᷊ihidda urinna pallal᷊ahanna lana apan lullupa.

³²I tou nanantangngu lanna'u ledda apan lukkena, tahal᷊oangnga niwal᷊une nabbal᷊i lupa apan mawira.

³³Su wowon dunia tawe sul᷊ungnge; riaddianna apan tawe mata'utta, eteudde i tou!

³⁴Winatangnga apan awantuhanne lai aellehanne addio'a; suwallattu anambon winatangnga mal᷊aṛṛaga, ete i tou ratune.”