Read Talaud AYUB 6 Bible Online

AYUB 6 - Talaud bible

AYUB 6

¹Ana see i Ayub sinumimbakka, “Unnuwisara asasusa'u indi itimbangnga awakkanne,

³sarun mabbakkatanna wuassu anne su tahal᷊oangnga. Nariaddi, arie paatiangnga amungkangngu manga wisara'u tawe naatokka see lai uasasaṛṛawutta.

⁴Anaanna wuassu Apan Lembontaṛṛino nallappassa su wadangku; pasangkadde niumalinna su ahewallu wadangku wuṛṛu ṛimuu'u. Al᷊aṛṛaubbu Ruata mangke maata'utta, wuṛṛu mammangalo si ya'u naal᷊ihidda ammul᷊annu seetta.

⁵Keledai sarun mal᷊uassa amungkangngu onggol᷊annu nannal᷊o wakku, aroddi lai sapi amungkangngu onggol᷊annu pabbawiakke.

⁶Arawe anna maammisa, isai maapulu? Tawe mariaddi mawiran tallukka pia temangnge?

⁷I ya'u maddiri mangeṛṛetta uadde; Tattaṛṛamuta i ya'u amungkangngu umanna udde.

⁸Anio Ruata maddiri maddaringikka aal᷊iomangku? Anio tawe nappandumma sasal᷊ande'u?

⁹Antimanna Ruata maapulu makkimunsa'a si ya'u! Antimanna i Tou mamuulla wuṛṛu mamate si ya'u!

¹⁰Si ya'u olangnge udde maola'a sambau lal᷊imbatta; i ya'u saṛṛen massal᷊aingnga su tangngan asasusa. Al᷊awo'u parentan Duata Apan Lembontaṛṛino, buatte nituṛṛutangku wuṛṛu sidutu iaarega'u.

¹¹Apate atatoha'u na'oman sara i ya'u ta'e indi? Apa antimangku maapulu mabbiakka mallannuanna lai?

¹²Erewe atatohassu watu wadangku indi? Wuassu witu'a awa'u indi?

¹³Nasuete ikka'u maddea'a tul᷊unganna; si ya'u tate lai aontolla.

¹⁴Sulal᷊ummu asasusa ereindi, ipaapulu'u hawe tutune. Tanne i ya'u sidutu ta'e satia ara'e naabul᷊iten Apan Lembontaṛṛino.

¹⁵Arawe i yamiu, ei manga hawe, tawe apangimananna wuṛṛu iawansaga. I yamiu naal᷊ihidda sal᷊ukka apan niasueannu ua'ene, napawe uranna tawe rumanta.

¹⁶I yamiu naal᷊ihidda sal᷊ukka apan mal᷊annabba wuṛṛu nate, ana waugu tataapannu salju wuṛṛu ua'e natakku.

¹⁷Napawe rumantate tempon paddissa, salju wuṛṛu eisse mawul᷊i tawe lannangnge. Wantan sal᷊ukka mabbal᷊i niṛṛumattangnga, tawe ua'ene wuṛṛu mamara-mara.

¹⁸Manga kafilah nilamammiṛṛanna sutempo maddea'a ua'e, i mangitou mammal᷊intadda wuṛṛu nate su wadda'u anne.

¹⁹Kafilah wuassu Syeba wuṛṛu Tema maddea'a ua'e isudde wuṛṛu uaantimma ua'e udde.

²⁰Arawe antimmi mangitou udde tawe gunane su winggin sal᷊ukka apan tawe ua'ene.

²¹Erete sal᷊ukka udde i yamiu, hawe'u; i'o sinumoṛṛotta wuṛṛu matta'utta ma'ellega asasusa'u.

²²Anio? Apa piaddu raddorongangku wuassi'o? Ara'e nandolokka mangonggollu roitta su taumata ana waugu hausangku?

²³Apa i ya'u naddorongnga maisal᷊amatta wuṛṛu tubbusanna wuassu seetta apan tawe aakkanne?

²⁴Ne, aṛṛa'ete i ya'u, tebboa'e pasasal᷊a'u! I ya'u mal᷊annabba wuṛṛu maddaringikke wisaranu.

²⁵Manga wisara apan matul᷊idda maasunge naungnga, arawe wisaranu tawe loṛṛone, tawe mangal᷊ene!

²⁶Anambon wisara'u aellehanni yamiu tumba'u ere anginna; tawe gunane i yamiu sumimbakka si ya'u apan tate antimma indi.

²⁷Ewe'e lai ana'a asisitimpal᷊ussa niundin kamiu nasimme, hawenu ate, lallingannu tadea'u i yamiu maola'a ala.

²⁸Annama'o, painnunue'o i ya'u; tawe mariaddi i ya'u indi mangawusu si'o?

²⁹Arie pangempe, asingkatte! Arie panangkulla si ya'u, i ya'u atonna tawe sal᷊ane.

³⁰Apa su sunnanu i ya'u mammahia, tawe mappaṛṛaen suapa mapia wuṛṛu suapa lal᷊eo?