Read Talaud AYUB 7 Bible Online

AYUB 7 - Talaud bible

AYUB 7

¹Taumata udde naal᷊ihidda iwabbata'a mattinsahadda; wiakke masahadda naal᷊ihidda wiakku taumatan sewa;

²naal᷊ihidda allangnga apan luṛṛintulun passirunganna; naal᷊ihidda taumatan sewa apan uaṛṛaddo sewane.

³Wul᷊anna malliu wul᷊anna, wia'u tawe pattuddanne; ṛabbi malliu ṛabbi naungku napenen asasusa.

⁴Napawe i ya'u inaite matiilla, ṛabbi pendamanna mal᷊o'engnga; i ya'u luṛṛintulu matannallo, i ya'u tawe mal᷊allowangnga matammudda.

⁵Wadangku napenen lal᷊uati wuṛṛu ṛangissu daṛṛa; pisi'u nal᷊essa wuṛṛu mapasabbangu nana.

⁶Wia'u apan tawe antimma udde mallihakka mattudan panginsueanne, mallihaṛṛanna wuassu mandaraddu'a mapaamattu masinane.

⁷Naungete, oh MAWU, wia'u tumba'u paassa sumangngo; lal᷊umanna'u nawul᷊i, tawe lannangnge.

⁸Orassa indi i'o ual᷊ellege si ya'u — arawe udde tawe mal᷊annu. Amungkangngu i ya'u reaannu, tate asombanganna.

⁹Naal᷊ihidda winabbawa apan mangngindau see mawul᷊i, taumata lai mate, tate maawelengnga mapul᷊e. Anambon taumata apan dorone masingkatti tou, naabul᷊ite wuṛṛu tate lai mannaungnga si tou.

¹¹Ana waugu udde i ya'u tawe maatana'a mal᷊annabba! Apendamma massusa wuṛṛu apapetta'u mabbiakka tawe iawul᷊i. I ya'u ṛinone mamu'a moṛṛongku, wuṛṛu mapasabangngu lal᷊oṛṛon naungku.

¹²Anio i ya'u indi mangke sidutu rariaganna wuṛṛu lal᷊u'aran-Nu? Apa i ya'u indi atoannu tahal᷊oangnga apan maasilaka?

¹³I ya'u lumallowangnga wuṛṛu maannamma mangillol᷊o; i ya'u maddea'a al᷊al᷊uassu naungku apan massusa.

¹⁴Arawe I'o mammata'utta si ya'u sulal᷊ummu wal᷊iawa; niaparanta-Nu wal᷊iawa lal᷊eo wuṛṛu nalangngu ṛingidda.

¹⁵Na'oman sara mappianne i ya'u attonganna see mate wuassu mabbiakka sulal᷊ummu awa'a napenen asasusa indi.

¹⁶I ya'u nasahadde wuṛṛu nawusate mabbiakka; i ya'u mappulute mate! Wala'e i ya'u, waugu wia'u tate aregane.

¹⁷Anio taumata tumaniten maarega Si'o? Anio pallal᷊agune sidutu ainnunuan-Nu?

¹⁸I'o mannaṛṛasidda si tou suapan marua allo, wuṛṛu suapan tempo I'o mannal᷊u'atta si tou.

¹⁹Tingngerate I'o tumal᷊iudda si ya'u, tadea'u i ya'u wotongnge mangalluppa luṛṛo'u?

²⁰Ei Mandariaga'u, marugite I'o ana waugu rosa'u? Anio I'o nappaattu maola'a tataṛṛangannu anaan-Nu? Aroddi awakkanne i ya'u maola'a winabbawa-Nu?

²¹Apa I'o tawe mapangampungnga rosa'u? Tawe wotongnge I'o mapamappassa pasasal᷊a'u? Ete addio'a lai i ya'u lumallowangnga su lal᷊abbinganna, ne amungkangngu I'o maddea'a si ya'u, i ya'u tate asombangan-Nu.”