Read Talaud AYUB 8 Bible Online

AYUB 8 - Talaud bible

AYUB 8

¹See i Bildad nabbisarate, “Piran katempo lai i'o mabbisara aroddi? Manga wisara naal᷊ihidda anginna apan sussal᷊induṛṛunga.

³Ruata mangke tawe mamengkollu atatul᷊idda; mangke taweddu mariaddi manahekku ṛinone.

⁴Asinungka manga anangngu marosa su saruan-Ne, ne suṛṛinonete i mangitou iṛṛuuman-Ne.

⁵Arawe amungkangngu tumba'u si Tou i'o uasirungnga, maddorongnga aakkanna wuṛṛu sumal᷊ande aampungnga,

⁶amungkangngu naungngu matul᷊idda, tawe sangkulle, Ruata sarun mantul᷊ungngu ringannu mal᷊ihakka; wuṛṛu maola'a lal᷊antakke, lal᷊oṛṛon bal᷊enu masul᷊e apia.

⁷Paa'alanu apan nawul᷊i udde tawe aregane isumandingngu sarangkanambone apan asombangannu.

⁸Taumata pande sutempo dorone ṛinone aellehannu, wuṛṛu mannaungnga pabbiaṛṛannu iupungngu al᷊amona.

⁹Wiakki ite maautta, i ite waggaten apa-apa; manga allon kite tumba'u ere lintau.

¹⁰Daringiṛṛete wisaran taumata pande tempon dorone, i mangitou nangonggollu al᷊aṛṛa'a indi si'o,

¹¹‘Tumba'u sutampa pia ua'ene tumuwo wungkal᷊o; pandanna tumba'u asangkal᷊anna su leta'a mal᷊awonakka.

¹²Napawe ua'ene mamarate, wungkal᷊o udde tumolangnga, malliharanna wuassu sasuanna waine. Sumbal᷊i ta'e wakku wuṛṛu taambe sutempone, i tou pototanna wuṛṛu ipaatta.

¹³Etearoddi taumata apan tawe mawune. I tou naabul᷊iten Duata, ne pangangantimme nawul᷊ite.

¹⁴Sambassutta wananna al᷊ussa iwabbansage; sal᷊akku al᷊imbuwutta maola'a pangantimanne.

¹⁵Matohassawe sal᷊akka udde amungkangngu pangunsandaṛṛanna? Mataṛṛangngawe wananna udde anungakangngu olaanna pangunsandaṛṛanna?’

¹⁶Naal᷊ihidda akke mal᷊uasse taumata apan tawe mawune; napawe aṛṛinoannu semakku matannallo, i tou tumuwo masuwukka wuṛṛu mamene wailla.

¹⁷Ṛamunne mangngal᷊i'uppa manga leta'a; uawa'issa matohassa, i tou tawe hampa umal᷊ore.

¹⁸Arawe, annama'o, abbutte akke udde orassa indi, ne ere ola'u i tou taambe tinumuwo isudde.

¹⁹Ore, lal᷊umanna'u taumata lal᷊eo tumba'u udde; taumata waine rumanta wuṛṛu mallol᷊ossa i tou.

²⁰Arawe Ruata tawe saran paassa manantangngu taumata satia, wuṛṛu tawe saran paassa lai i Tou mantul᷊ungngu taumata lal᷊eo.

²¹Moṛṛongngu sarun olaan-Ne lullage, biwikku sarun maggion al᷊al᷊uassa.

²²Isai mandantinnu sarun masili wuṛṛu maaddio'a, wuṛṛu wal᷊en taumata lal᷊eo sarun ihohakka ma'oman sara maṛṛimunsa'a.”