Read Talaud DARALO 102 Bible Online

DARALO 102 - Talaud bible

DARALO 102

¹Aal᷊iomannu taumata sansara apan sulal᷊ummu awawandu sussal᷊iommanna su MAWU.

²Oh MAWU, daringiṛṛewe aal᷊iomangku, wala'e sasal᷊ande'u ma'omate ringan-Nu.

³Ariewe mangindau'u napawe i ya'u sulal᷊ummu asasusa. Daringiṛṛewe napawe i ya'u sumal᷊ande, wuṛṛu simbakkawe si ya'u ringannu mal᷊ihakka.

⁴Wia'u nawul᷊i naal᷊ihidda timbulla; manga duṛṛi'u naola'a ere waṛṛan putungnga.

⁵I ya'u tinumolangnga ere nannal᷊o naṛṛangu, wuṛṛu niawul᷊iannu apulu umanna.

⁶I ya'u ma'uare ringannu ma'ikkatta; wadangku nallambe ete pisi uapi'unna duṛṛi.

⁷I ya'u naal᷊ihidda manu'a tamingnga su wadda'a, naal᷊ihidda manu'a mammeo su panuwangnga apan mal᷊annabba.

⁸I ya'u tawe maatiilla, naal᷊ihidda manu'u winalanganna sassane su atuppu wal᷊en.

⁹Su al᷊o'engngu allo see'u mallobbossa si ya'u; arangku niola'a wawontoga su taumata massa'u si ya'u.

¹⁰I ya'u u'anna awu ere roti, ua'e'u lal᷊o'annu allon mata,

¹¹ana waugu I'o buatte namatunna wuṛṛu nanuntungku sulal᷊ummu asasa'u-Nu apan lukkenggamma.

¹²Wia'u malliudda ere lintau sutempo wawallo; i ya'u tinumolangnga ere nannal᷊o.

¹³Arawe I'o, oh MAWU, Ratu saran mal᷊annu-l᷊annu, sidutu nannaunganna sara maṛṛawa mappulunnu.

¹⁴I'o sarun dumarisikka wuṛṛu umakkannu Sion, tempone nia'omante umakkanni tou.

¹⁵Ana waugu manga allang-Ngu mandangngu si tou, salaiwe i tou nabbal᷊ite nallambe manga tuidda. I mangitou u'akkanni tou, salaiwe i tou nabbal᷊ite awu.

¹⁶Taṛṛinon MAWU iaata'uttu manga walahanna; wuṛṛu awawantu-Ge aaddatannu anambon datu,

¹⁷napawe MAWU mapararisikku Sion apia, wuṛṛu rumanta sulal᷊ummu awawantu-Ge.

¹⁸I Tou sarun maddaringikka aal᷊iomannu al᷊aṛṛanang-Nge apan uatataṛṛanga, wuṛṛu tawe mapawelengngu darorongngi mangitou.

¹⁹Woṛṛeta'e anambon inolaannu MAWU su pallal᷊awanna apan addantane, tadea'u walahanna apan taambe niasungkangnga wotongnge maddalo si Tou.

²⁰MAWU ual᷊ellega wuassu tampa-Ne apan matanggakka, wuassu surga i Tou nangintanno runia

²¹maddaringikka sasal᷊iomannu taumata tataṛṛanganna wuṛṛu namallossu taumata iṛṛuumanna pateanna.

²²Ne aran-Ne sarun iapasingkatta su Sion, ne i Tou sarun raloanna su Yerusalem,

²³sutempo manga walahanna wuṛṛu manga araratuanna naammulla ana mattaṛamawu su MAWU.

²⁴MAWU namaddi atatoha'u sutempo i ya'u ta'e dario'a, wuṛṛu uukka si ya'u niautta.

²⁵Ana see i ya'u nabbisara, “Oh Ruata ariewe mangal᷊appa niawa'u su pattangngannu pabbiaṛṛangku.” MAWU, I'o wiakka saran mal᷊annu-l᷊annu,

²⁶dorone I'o nandiaddi runia; langitta lai lanna'u lima-Nu.

²⁷Sarangkanambone udde sarun mawul᷊i, arawe I'o sidutu uatatana'a aroddi; sarangkanambone udde sarun mawulle ere peddetta. Niramme-Nu ere laubba tabbe, ana see sarangkanambone sarun maṛṛenessa.

²⁸Arawe I'o sidutu uasul᷊unga, I'o wiakka tawe pangudusanne.

²⁹Ana'a papapulunni yami sarun mabbiakka ringannu mal᷊angnganna, wuṛṛu sidutu matammudda sulal᷊ummu lu'addu MAWU.