Read Talaud DARALO 103 Bible Online

DARALO 103 - Talaud bible

DARALO 103

¹Wuassi Daud. Paddalote MAWU, ei niawa'u, ahewallu ṛimuu'u, paddalote aran-Ne apan susi.

²Paddalote MAWU, ei niawa'u, arie pattimbul᷊iane al᷊awo'u apapia-Ne!

³I Tou apan nangampungnga anambon rosanu, apan nangapia al᷊awo'u raddangu,

⁴i Tou apan namallossu niawanu wuassu labbinga, apan nangonggolla si'o ringannu darangngu wuṛṛu aakkanna.

⁵I Tou apan namene pabbiaṛṛannu ringannu apapia, na'oman sara i'o ellehanna ta'e dario'a ere rajawali.

⁶MAWU napaamattu tita wuṛṛu atatul᷊idda su anambon taumata apan niallangnga.

⁷I Tou napal᷊iatta'u ṛiin-Ne si Musa wuṛṛu manga inolaan-Ne su walahannu Israel.

⁸Ana waugu MAWU marangngu wuṛṛu maakkanna, i Tou masabare wuṛṛu darangngu-Ne uatinnalunna.

⁹I Tou tawe sidutu mandona, wuṛṛu tawe masa'u sarangkal᷊o'engnge.

¹⁰I Tou tawe makkuumanni ite uasul᷊ungu rosan kite, ara'e mabbal᷊issa si ite uasul᷊ungu pasasal᷊an kite.

¹¹Arawe atanggakku langitta su wowon dunia, ahewalle udde lai darangngu-Ne su taumata apan ma'imanna.

¹²Araune wuassu ra'i maddatingngu waṛṛata, araune udde lai niramme-Ne manga rosan kite.

¹³Ere sangkatou iamangnga mandangngu manga anangnge, aroddi lai MAWU mandangngu taumata ma'imanna.

¹⁴Ana waugu MAWU masingkatta i ite niola'a wuassuapa, i Tou maanaungnga i ite indi tumba'u awu.

¹⁵Taumata wiakke maautta ere nannal᷊o; i tou matti'akka ere wunga su wawail᷊anna;

¹⁶napawe tiupannu anginna, nawul᷊ite i tou, ewe'e lai lannangnge awaganante.

¹⁷Arawe MAWU sidutu mandangngu taumata ma'imanna, apapia-Ne sara maṛṛawa mappulunna

¹⁸su taumata apan uaumbele paaire-Ne wuṛṛu ringannu maadunna tuttuṛṛutta parenta-Ne.

¹⁹MAWU uaparenta su surga, i Tou ratu apan uataṛṛino al᷊awo'a.

²⁰Paddalote MAWU, ei manga mala'ekan-Ne apan matohassa, apan sidutu uararingikka wuṛṛu tuttuṛṛutta parenta-Ne.

²¹Paddalote MAWU, ei al᷊awo'u riadianna su surga, anambon manga allang-Nge apan mappaamattu apulu-Ne.

²²Paddalote MAWU, ei al᷊awo'u riadianna su ahewallu leta'a paparentan-Ne. Paddalote MAWU, ei niawa'u!