Read Talaud DARALO 106 Bible Online

DARALO 106 - Talaud bible

DARALO 106

¹Paddalote MAWU! Paadiangkamante su MAWU, ana waugu i Tou mapia; darangngu-Ne tawe pattaal᷊anne.

²Isai wotongnge mamasingkattu atatohassu MAWU, wuṛṛu mangonggolu daralo apan ṛinone si Tou?

³Lal᷊umanna'a su taumata apan tuttuṛṛutta manga parenta-Ne, wuṛṛu tawe sal᷊ane sulal᷊ummu inolaanne.

⁴Naungewe i ya'u, oh MAWU, ana waugu apapia-Nu su al᷊aṛang-Ngu, ontol᷊ewe i ya'u lai napawe I'o manal᷊amatta si mangitou.

⁵Antimanna i ya'u maasilo lal᷊umanna'u manga taumata apan nipile-Nu, wuṛṛu lumuassa suadio'a ringannu al᷊aṛṛanang-Ngu. Antimanna i ya'u lumala'a wuṛṛu lumuassa suadio'a ringannu manga taumata apan nabbal᷊i pussa'a-Nu.

⁶I yami narosate ere al᷊amonan kami; i yami buatte na'ola'a al᷊al᷊eo wuṛṛu nilumawanga.

⁷Sutempo su Mesir al᷊amonan kami tawe maasunna; manara-Nu apan maatiangnga tawe asunnanni mangitou. I mangitou naabul᷊in darangngu-Nu apan nilumambalanna, wuṛṛu su maranin Tahal᷊oangngu Gelagah i mangitou nilumawanga Apan Atanggaṛṛanne.

⁸Arawe MAWU nanal᷊amatta si mangitou ana waugu watangan-Ne sassane, ana see atatohan-Ne lumiatta'a.

⁹Wuassu parenta-Ne Tahal᷊oangngu Gelagah namara, i Tou nangapiddu al᷊aṛṛanang-Nge niumamatta su tahal᷊oangnga, ere u'amatta su wadda'a.

¹⁰Ringannu aroddi i Tou nangal᷊amatta si mangitou wuassu ro'appa, i Tou namallossi mangitou wuassu taṛṛinon seetta.

¹¹Arawe ua'e nallammissa ro'appi mangitou; tawe saran sangkatou natantangnga.

¹²Ana see al᷊aṛṛanang-Nge nangimante paaire-Ne wuṛṛu nangantariten daralo si Tou.

¹³Arawe i mangitou lapiddu naabul᷊in inolaannu MAWU wuṛṛu mammanara ringannu tawe maddorongnga tatantiro-Ne.

¹⁴Su wadda'a i mangitou niawono'annu apulun naungnga, wuṛṛu mannal᷊u'atta Ruata.

¹⁵I Tou nangonggolu apa apan raddoronganni mangitou, arawe lai sa'itta apan nirumanta si mangitou.

¹⁶Su wadda'a udde i mangitou naungnge lal᷊eo si Musa wuṛṛu si Harun allang-Nge apan susi.

¹⁷Ana see runia nawa'a nangallupa si Datan, nanaappa si Abiram wuṛṛu amonanne.

¹⁸Putungnga niumonto'a nanametta ammul᷊anni mangitou, nangepoddu sarangkanambone apan buatte na'ola'a al᷊al᷊eo.

¹⁹Su Wowon Sinai i mangitou nallanginnu ana'u sapi wul᷊awanna, wuṛṛu massubba paal᷊uanna nilanginna udde.

²⁰I mangitou nanal᷊iun Duata apan mawantuga ringannu paal᷊uannu sapi apan u'anna nannal᷊o.

²¹I mangitou naabul᷊in Duata mananal᷊amatti mangitou apan buatte na'ola'a manga inolaanna wahewalla su Mesir.

²²Mangke wahewalla atonna manga inolaan-Ne su wanua udde, maatiangnga manara-Ne su Tahal᷊oangngu Gelagah.

²³Ne Ruata pia pandumma mamate al᷊aṛṛanang-Nge, arawe niwo'anni Musa, taumata nipile-Ne. I Musa nabbal᷊i mananangnga si mangitou, na'oman sara asasa'un Duata nompo'a.

²⁴Wua'udde i mangitou nanol᷊a'u wanua apan maṛṛamaga udde ana waugu tawe mangimanna pairen Duata.

²⁵I mangitou sussawutulla sulal᷊ummu rasanni mangitou, wuṛṛu maddiri madaringikka tingikku MAWU.

²⁶Ne ringannu sasalu i Tou naddiandi sarun mamate si mangitou su wadda'a.

²⁷Papapulunni mangitou sarun iramme-Ne suwallatu manga walahanna wuṛṛu isal᷊iawukka su manga wanua awagananna.

²⁸Wua'udde su Peor i mangitou massubba si Baal, wuṛṛu niumanna sasamba apan ionggola su manga monganna.

²⁹Pallal᷊aghu udde naatamba asasa'un MAWU, na'oman sara i mangitou niarunannu sa'itta apan maata'utta.

³⁰Arawe i Pinehas dirumarisikka wuṛṛu nakkuumanni isai nassal᷊a, ne sa'itta udde naddote.

³¹Pallal᷊aghu udde naola'a sambau aaddata si tou, wuṛṛu nanaunganna saran mal᷊annu-l᷊annu.

³²Su manga paṛṛihi su Meriba i mangitou nasa'u MAWU, wuṛṛu napasusan Musa ringannu inolaanni mangitou.

³³I mangitou na'ola'a naungnge sinumassilla, na'oman sara i tou nabbisara ringannu tawe maṛṛingidda asuene.

³⁴Manga walahanna waine tawe niṛṛadda'i mangitou, ere lai buatte nirolokku MAWU.

³⁵Ewe'e i mangitou nallal᷊o'a manga walahanna udde, wuṛṛu nattanno pallal᷊aghu manga taumata apan tawe maailal᷊a Ruata.

³⁶Ana see i mangitou nassubba manga paal᷊uanna, wuṛṛu pinangianannu ananawon mangitou.

³⁷I mangitou nangonggolu manga ana'i mangitou, su manga paal᷊uannu Kanaan.

³⁸I mangitou napaturon daṛṛan taumata tawe sal᷊ane, daṛṛan manga ana'i mangitou sassane, tadea'u ionggola su manga paal᷊uanna; na'oman sara wanua udde nil᷊al᷊eon mangitou.

³⁹Ana waugu manga inolaanna udde i mangitou narosa, wuṛṛu tate maddaringikka Ruata.

⁴⁰Ana see asasa'un MAWU niṛṛumenggampe si mangitou, i Tou nuallu pussa'a-Ne sassane.

⁴¹Ne i Tou nanantilli mangitou su manga walahanna, niwala-Ne i mangitou tataṛṛinoannu seetta.

⁴²Ana see i mangitou niallangngu manga seetti mangitou, wuṛṛu uasuṛṛubbawa su al᷊ungngu taṛṛinon mangitou.

⁴³Masokkate MAWU mamallossi mangitou, arawe i mangitou apulune lullawangnga, na'oman sara i mangitou sulal᷊ummu manga rosan mangitou.

⁴⁴Arawe MAWU naddaringikka aintul᷊in mangitou, i Tou na'ellega asasusan mangitou.

⁴⁵Ana waugu i mangitou i Tou naanaungnga paaire-Ne wuṛṛu niumakkanni mangitou ana waugu darangngu-Ne apan wahewalla.

⁴⁶I Tou na'ola'a si mangitou raddangnguannu anambon taumata apan nanawanna si mangitou.

⁴⁷Sal᷊amatewe i yami, oh MAWU Ruatan kami, ammul᷊aawe i yami wuassu wallattu manga walahanna, tadea'u i yami wotongnge maadiangkamanna wuṛṛu maddalo aran-Nu apan susi.

⁴⁸Paddalote MAWU, Ruatan Israel, orassa indi saran mal᷊annu-l᷊annu. Wala'ewe anambon taumata mabbisara, “Amin!” Paddalote MAWU!