Read Talaud DARALO 109 Bible Online

DARALO 109 - Talaud bible

DARALO 109

¹Su piaṛṛa'u mangangantari. Daralon Daud. Oh Ruata apan sidutu raddaloanna, ariewe mangintammuda.

²Ana waugu i ya'u nipangaloannu taumata lal᷊eo wuṛṛu taṛṛa l᷊inga apan mannal᷊iawukku manga watti'a awusu su ola'u watangangku.

³I mangitou namangalo si ya'u ringannu manga wisara maarantinna, wuṛṛu namangalo si ya'u ringannu taweddu pinangiananne.

⁴I mangitou mangngasilla si ya'u, salaiwe i ya'u marangngu si mangitou, wuṛṛu buatte niumal᷊iomanni mangitou.

⁵I mangitou nabbal᷊issa apapia'u ringannu al᷊al᷊eo, wuṛṛu darangngu'u ringannu ararantinna.

⁶Pilete sangkatou taumata lal᷊eo iapaṛṛuungnga si tou, wala'e i tou iala'e manga ro'amme.

⁷Wala'e i tou parikisanna wuṛṛu iapasal᷊a, wuṛṛu wala'e aal᷊iomanne maola'a rosa.

⁸Wala'e pabbiaṛṛanne mal᷊ihakka umuddussa, wuṛṛu manarane anuannu taumata waine.

⁹Wala'e manga anangnge mabbal᷊i asisi, wuṛṛu awingnge mabbal᷊i wawine wal᷊u.

¹⁰Wala'e manga anangnge mabbal᷊i taṛṛa rorongnga apan lullallele, wuṛṛu limbuaṛṛanna wuassu manga tuiddu wal᷊ene.

¹¹Wala'e al᷊awo'u pussa'ane aṛṛoannu mallal᷊uṛṛu awallassa, wuṛṛu hessin inasaharanne anuannu taumata.

¹²Arie piaddu mannaungnga mapia si tou, ara'e umakkannu manga anangnge apan tinantangnge.

¹³Wala'e anambon papapulunne ṛaddaanna, wuṛṛu aranne timbul᷊ianannu pal᷊awanna manansunna.

¹⁴Wala'e al᷊al᷊eon al᷊amonane sidutu nanaungannu MAWU, wuṛṛu rosan inangngene tawe pappasanna.

¹⁵Wala'e rosan mangitou sidutu nanaungannu MAWU, wuṛṛu taweddu mannaungnga si mangitou su runia.

¹⁶Ana waugu taumata udde tawe mannaungnga tadea'u mamasilon darangngu. I Tou mannansara taumata asiangnga wuṛṛu susa, wuṛṛu namate taumata lome.

¹⁷I Tou apulune mantal᷊a; wala'e i tou sassane aṛṛinoannu tatal᷊a! I Tou maddiri mangonggolu al᷊amatta, wala'e tawe al᷊amatta si tou!

¹⁸Si tou mantal᷊a udde inolaanna inanaramanna, ere lai i tou malluṛṛen laubba. Wala'e tatal᷊a udde umallinna ere ua'e su waddange, wuṛṛu ere lana umisippa sulal᷊ummu manga duṛṛine.

¹⁹Wala'e tatal᷊a udde uataappa si tou ere laubba, wuṛṛu sidutu uawa'issa si tou ere papeṛetta.

²⁰MAWU, paarua'a ṛuumanna udde su mangngangasila si ya'u, su taumata apan mabbisaran al᷊al᷊eo si ya'u.

²¹Arawe ontol᷊ewe i ya'u ere buatte nipa'ire-Nu, oh MAWU Ruata'u, sal᷊amatewe i ya'u ana waugu apapia wuṛṛu darangngu-Nu.

²²Ana waugu i ya'u asiangnga wuṛṛu susa, wuṛṛu naungku nal᷊essa na'oman lal᷊umme.

²³I ya'u maraniten mawul᷊i ere lintau sutempo wawallo, i ya'u nipaṛṛassa ere saṛṛappalanna.

²⁴Wuu'u mangngindo ana waugu mappuasa, waddangku nabbal᷊i maṛṛasa-ṛasa.

²⁵Manga taumata apan naasilo si ya'u mallobbossa si ya'u lapiddu uapapa'ilingu pua.

²⁶Ontol᷊ewe i ya'u, oh MAWU Ruata'u, sal᷊amatewe i ya'u ana waugu darangngu-Nu.

²⁷Ne see'u sarun maasingkatta manungku udde inolaan-Nu, manungku I'o, MAWU, apan na'ola'a sarangkamabone.

²⁸Salaiwe i mangitou mantal᷊a'u, antimanna I'o mangal᷊amatta si ya'u. Salaiwe i mangitou dumarisikka, i mangitou sarun pansilianna; arawe antimanna i ya'u, allang-Ngu iapal᷊uassa.

²⁹Wala'e manga taumata apan mangngansilla si ya'u papal᷊iwutannu aal᷊uandaga, wuṛṛu asasili apan uapi'unna si mangitou ere jubah.

³⁰I ya'u maddalote MAWU ringannu tingikka ma'ikkata, mamasingkati Tou su pattangngannu ammul᷊annu taumata.

³¹Ana waugu i Tou nangambanga wuṛṛu nanal᷊amatta taumata asiangnga wuassi mangitou apan nangema'u ṛuumanna mate si tou.