Read Talaud DARALO 112 Bible Online

DARALO 112 - Talaud bible

DARALO 112

¹Paddalote MAWU! Lal᷊umanna'a su taumata apan ma'imanna, apan sidutu maddaringikka manga parentan MAWU.

²Manga anangnge sarun mamarenta su wanua indi, papapulunnu taumata mapia sarun al᷊amatanna.

³Amonanne sarun maala wuṛṛu su pabbawiakke, wuṛṛu i tou sarun su lal᷊umanna'a saran mal᷊annu-l᷊annu.

⁴Semakka lukkena sulal᷊ummu ararandumma su taumata mapia, su taumata apan matul᷊idda, marangngu wuṛṛu maakkanna.

⁵Lal᷊umanna'a su taumata apan masaṛṛionto'a naungnge wuṛṛu apulune mappawallasa wuṛṛu matul᷊idda su al᷊awo'u manara.

⁶Taumata mapia tawe mabbelenga aroddi; i tou sarun nanaunganna saran mal᷊annu-l᷊annu.

⁷I Tou tawe mata'utta maaringikka watti'a lal᷊eo, naungnge matohassa ana waugu mangngimanna MAWU.

⁸I Tou tawe suminggawanga ara'e mata'utta, ana waugu mangngimanna seenne sarun iawaddo.

⁹I Tou mattahia paa'alane, wuṛṛu nangonggolu darotonge su taumata asiangnga; i tou sidutu ma'ola'a apapia, ana waugu i tou uaparenta wuṛṛu aaddatanna.

¹⁰Taumata lal᷊eo maasilo si tou wuṛṛu nabbal᷊i massa'u; i mangitou mangngasan isi ana waugu maddantinna. Ana see i mangitou nate; antimmi mangitou nawul᷊i saran mal᷊annu-l᷊annu.