Read Talaud DARALO 119 Bible Online

DARALO 119 - Talaud bible

DARALO 119

¹Lal᷊umanna'a su taumata apan mabbiakka tawe sangkulle wuṛṛu matuṛṛutta su manga titan MAWU.

²Lal᷊umanna'a su taumata apan mappaamattu parenta-Ne, wuṛṛu ringannu ahewallu naungnge maddea'a ma'illal᷊a MAWU.

³Lal᷊umanna'a su taumata apan mabbiakka tuttuṛṛutta apulun MAWU. wuṛṛu tawe ma'ola'a al᷊al᷊eo.

⁴I'o nangonggolu tita-Nu si yami, oh MAWU, tadea'u i yami mappaamattu udde ringannu matuṛutta.

⁵Antimanna i ya'u ringannu matohassa tuttuṛṛutta manga parenta-Nu.

⁶Amungkangu i ya'u manutukka anambon parenta-Nu, ne i ya'u tawe pansilianna.

⁷Amungkangu i ya'u mangurumma ṛaṛṛawen-Nu apan matul᷊idda, i ya'u maddalo Si'o ringannu ahewallu naungku.

⁸I ya'u maapulu tumuṛṛutta tita-Nu, ariewe manantangku.

⁹Taumata umbasanna maal᷊u'adda wiakke tawe sangkulle amungkangu i tou mabbiakka tuttuṛṛutta parenta-Nu.

¹⁰Ringannu ahewallu naungku i ya'u mattinsahadda ma'illal᷊a Si'o, arie pabbala'a i ya'u sumewadda wuassu parenta-Nu.

¹¹Al᷊aṛṛanang-Ngu ta'u sahipunanna sulal᷊ummu naungku, tadea'u i ya'u tawe marosa su saruan-Nu.

¹²I ya'u maddalo Si'o, oh MAWU, i ya'u aṛṛa'ewen parenta-Nu.

¹³Ringannu ma'ikkata i ya'u u'al᷊iata anambon tita apan nionggolu MAWU.

¹⁴I ya'u lullala'a tuttuṛutta manga parenta-Nu, ere lai uatahuanna al᷊awo'u hatin darotongnga.

¹⁵I ya'u maapulu mangurumma manga parenta-Nu, wuṛṛu manutukka manga tatantiro-Nu.

¹⁶Parenta-Nu maal᷊uassa si ya'u; al᷊aṛṛang-Ngu tawe abbul᷊ianangku.

¹⁷Antimanna naung-Ngu masaṛṛionto'a su allang-Ngu indi, tadea'u i ya'u sidutu wiakka wuṛṛu tuttuṛṛutta al᷊aṛṛanang-Ngu.

¹⁸Wu'ate mata'u tadea'u i ya'u maasilo al᷊aṛṛa'a apan maatiangnga sulal᷊ummu tita-Nu.

¹⁹Tawe mal᷊annu i ya'u matana'a su runia, ariewe mamunin tita-Nu si ya'u.

²⁰Naungku maradda'a maṛṛadannu apulu, i ya'u maapulu maasingkatta tita-Nu suapan tempo.

²¹I'o nanagu taumata apan mawunga, wuṛṛu namontoga taumata apan sinumewadda wuassu parenta-Nu.

²²Liuaawe i ya'u wuassu lal᷊obbossa wuṛṛu aal᷊uandagi mangitou, ana waugu tuttuṛṛutta tita-Nu.

²³Salaiwe manga tembonanne maammula mando'appa si ya'u, allang-Ngu indi sarun mannaungnga tita-Nu.

²⁴Manga parenta-Nu nabbal᷊i mananantiro'u apan maal᷊uassa naungku.

²⁵I ya'u ual᷊allowanga sulal᷊ummu awu; welengaawe wia'u tumuṛṛuttu paaire-Nu.

²⁶I ya'u manga'u inolaangku, ana see I'o sinumimbakka si ya'u; i ya'u aṛṛa'ewen tita-Nu.

²⁷Tul᷊ungaawe i ya'u massunna manga tita-Nu, al᷊aṛṛang-Ngu apan maatiangnga sidutu nanaungangku.

²⁸Niawa'u naṛimunsa'a niaṛiaannu asasusa, tohassawe i ya'u ere lai buatte nipa'ire-Nu.

²⁹Paaruaawe i ya'u wuassu lal᷊anna apan sal᷊a, ana waugu apapia-Nu i ya'u aṛṛa'ewen tita-Nu.

³⁰I ya'u buatte namile tadea'u tumuṛutta, apan sidutu nanaungangku.

³¹I ya'u buatte napaamattu manga parenta-Nu, oh MAWU, ariewe pabbala'a i ya'u maasomba asasili.

³²Ringannu mal᷊uassa i ya'u sarun maddaringikka parenta-Nu, ana waugu I'o na'ola'a si ya'u lembon maasunna.

³³MAWU, tantiroewe i ya'u manga tita-Nu, tadea'u i ya'u mappaamatta saran pangudusanne.

³⁴Olaawe i ya'u maasunna tita-Nu ana see i ya'u tuttuṛutta, wuṛṛu ta'u iapaamatta ringannu ahewallu naungnga.

³⁵Antimanna i ya'u uaagassa matohassa su parenta-Nu, ana waugu eteudde apuluangku.

³⁶Onggol᷊ewe i ya'u apulu tumuṛṛutta parenta-Nu, nilumambalanna wuassu apulu mabbal᷊i ala.

³⁷Riagaiwe i ya'u tadea'u tawe mangenggenna pawangnge, onggol᷊ewe i ya'u wiakka tumuṛuttu apulu-Nu.

³⁸Tohassawe su allang-Ngu indi paaire-Nu, apan nionggolu MAWU su taumata apan tuttuṛutta Si'o.

³⁹Paaruaawe aal᷊uandaga apan ta'u iaata'utta, ana waugu mapia atonna tita-Nu.

⁴⁰I ya'u onggol᷊ewen wiakka wakku, ana waugu I'o matul᷊idda, i ya'u pia apulu tumuṛutta manga parenta-Nu.

⁴¹Oh MAWU, pal᷊iatta'awe I'o aroddi arangngune si ya'u, sal᷊amatewe i ya'u ere buatte nipa'ire-Nu.

⁴²Ne i ya'u maasimbakke taumata apan mallobbosa si ya'u, ana waugu i ya'u uaasakku wisara-Nu.

⁴³Tul᷊unga'awe tadea'u sidutu mabbisara ṛinone, ana waugu i ya'u sidutu uaantimma tita-Nu.

⁴⁴I ya'u maapulu sidutu uaagassa tita-Nu, saran mal᷊annu-l᷊annu.

⁴⁵Ne i ya'u sarun mabbiakka ringannu tawe sal᷊awange, ana waugu mattinsahadda tuttuṛutta al᷊aṛṛanang-Ngu.

⁴⁶Titanu sarun ta'u iapasingkatta su manga ratu, wuṛṛu sarun tawe maasomba asasili.

⁴⁷Lal᷊umanna'u eteudde mappaamattu parenta-Nu, ana waugu marangngu tita udde.

⁴⁸I ya'u mangngaddata wuṛṛu marangngu parenta-Nu, tita-Nu sarun ta'u iṛṛingidda.

⁴⁹Naungete paaire-Nu su manga allang-Ngu indi, paaire apan mangngonggolu antimma si ya'u.

⁵⁰Eteindi apan maal᷊imbatta si ya'u sulal᷊ummu asasusa'u manungku paaire-Nu udde mangngonggolu wiakka si ya'u.

⁵¹Taumata mawunga tumaniten mallobbosa si ya'u, arawe i ya'u tawe sinumewadda wuassu tita-Nu.

⁵²I ya'u uanaungnga tita-Nu apan piate ro'en dorone, ne naungku naal᷊uasse, oh MAWU.

⁵³I ya'u tumaniten massa'u su taumata lal᷊eo, ana waugu i mangitou nanantangu tita-Nu.

⁵⁴Su al᷊o'engngu pabbiaṛangku su runia, tita-Nu ta'u niola'a manga aantari daralo.

⁵⁵Sutempo ṛabbi i ya'u uanaungnga Si'o, oh MAWU, tita-Nu sidutu ta'e aagasanna.

⁵⁶I ya'u naasomba lal᷊umanna'a sulal᷊ummu tuttuṛṛutta manga parenta-Nu.

⁵⁷Tumba'u I'o apan ipaapulu'u, oh MAWU, i ya'u maddiandi sarun mappaamattu al᷊aṛṛang-Ngu.

⁵⁸Ringannu ahewallu naungnga i ya'u sumal᷊ande darangngu-Nu, akkanaawe i ya'u uasul᷊ungngu paaire-Nu.

⁵⁹I ya'u buatte naṛṛingiddu pallal᷊aghu'u, wuṛṛu maddiandi sarun tumuṛṛutta parenta-Nu.

⁶⁰I ya'u uasasaṛawutta wuṛṛu tate maṛṛaddo mappaamattu parenta-Nu.

⁶¹Taumata lal᷊eo nantaingngu sedda si ya'u, arawe i ya'u tawe maabul᷊in tita-Nu.

⁶²Ṛabbi mattangnga i ya'u mapu'o ana waugu maddalo Si'o, ana waugu manga tita-Nu apan matul᷊idda.

⁶³I ya'u uahahawen anambon taumata ma'imanna, anambon taumata apan tuttuṛutta parenta-Nu.

⁶⁴Runia napenen darangngu-Nu, oh MAWU, i ya'u aṛṛa'ewen manga tita-Nu.

⁶⁵I'o buatte nanipussu paaire-Nu, oh MAWU, wuṛṛu na'ola'a apapia su allang-Ngu.

⁶⁶I ya'u aonggol᷊ewen apande wuṛṛu asingkatta, ana waugu mangngimanna su manga parenta-Nu.

⁶⁷Tantal᷊anna taambe niṛṛuumanna, i ya'u buatte sinumewadda, orassa indi i ya'u uaagassa parenta-Nu.

⁶⁸Ana waugu I'o mapia wuṛṛu na'ola'a apapia, i ya'u aṛṛa'ewen manga tita-Nu.

⁶⁹Taumata mawunga mallobbosa si ya'u, arawe i ya'u ringannu ahewallu naungnga tuttuṛṛutta parenta-Nu.

⁷⁰Manga taumata udde tawe maasunna, arawe si ya'u tita-Nu maal᷊uassa naungku.

⁷¹Atonna mappianne I'o makkuumangku, tadea'u i ya'u maaillal᷊a manga tita-Nu.

⁷²Si ya'u tita-Nu maaregganne wuassu anambon wul᷊awanna wuṛṛu sal᷊a'a su runia.

⁷³Ete I'o apan na'ola'a wuṛṛu nandiaddi si ya'u, i ya'u onggol᷊eten pasasunna ipangurumma manga parenta-Nu.

⁷⁴Taumata ma'imanna sarun mal᷊uassa napawe maasilo si ya'u, ana waugu i ya'u uaantimma su paaire-Nu.

⁷⁵I ya'u masingkatta manungku raṛṛawen-Nu matul᷊idda oh MAWU, I'o buatte nakkuumangku ana waugu apapia-Nu.

⁷⁶Antimanna darangngu-Nu maal᷊uassa si ya'u, uasul᷊ungu paaire-Nu su allang-Ngu.

⁷⁷Akkanaawe i ya'u, tadea'u i ya'u sidutu wiakka, ana waugu tita-Nu maal᷊uassa naungku.

⁷⁸Wala'e taumata mawunga masili ana waugu buatte nallobbossa si ya'u, arawe i ya'u sarun maṛṛingiddu manga parenta-Nu.

⁷⁹Antimanna taumata ma'imanna rumanta ringangku, sarangkanambone apan maaillal᷊a manga tita-Nu.

⁸⁰Antimanna naungku tawe sumewadda wuassu tita-Nu, tadea'u i ya'u tawe masili.

⁸¹Naungku mangke luṛṛintulun asasal᷊amatta wuas-Si'o; i ya'u uaantimma paaire-Nu.

⁸²Mata'u nal᷊ol᷊ote uaṛṛaddo Si'o manipussa paaire-Nu, i ya'u nabbisara, “Tingngerate I'o malluassa si ya'u?”

⁸³Pisi'u naal᷊umpissa ere pato'an anggore tabbete, arawe raṛṛawen-Nu tawe ta'u abbul᷊iananna.

⁸⁴Maddatingu tingngera allang-Ngu masabare? Tingerate I'o makkuumannu manga taumata apan mangngenggenna si ya'u?

⁸⁵Taumata apan tawe tumuṛṛutta tita-Nu, buatte naal᷊i loṛṛangnga ipaggau si ya'u.

⁸⁶Anambon tita-Nu wotongnge ipangasakka, ontol᷊ewe i ya'u, ana waugu i ya'u a'enggenanna taweddu pangiananne.

⁸⁷I ya'u maraniten iapaten mangitou, arawe i ya'u tawe manantangu parenta-Nu.

⁸⁸Sal᷊amatewe i ya'u ana waugu I'o sidutu marangngu, tadea'u maatuṛṛutta tita-Nu.

⁸⁹MAWU, ṛengetan-Nu matohassa saran mal᷊annu-l᷊annu, tawe panguddusanne su surga.

⁹⁰Apapia-Nu mattaṛṛangnga su al᷊o'engngu tempo, I'o nanohassa runia tadea'u ta'e pia.

⁹¹Sarangkamabone apan pia orassa indi, pia ana waugu parenta-Nu, ana waugu i mangitou sarangkamabone uddewe manga allang-Ngu.

⁹²Unnuwisara tita-Nu wal᷊ine punnu lal᷊ala'u, i ya'u natete sulal᷊ummu asasusa'u.

⁹³Sarangkal᷊o'enge i ya'u tawe mapanantangu parenta-Nu, ana waugu ringannu udde I'o namiakka si ya'u.

⁹⁴Sal᷊amatewe i ya'u, ana waugu i ya'u indi pussa'a-Nu, i ya'u buatte nattinsahadda tuttuṛutta parenta-Nu.

⁹⁵Taumata lal᷊eo uaṛaddote mamate si ya'u, arawe i ya'u sidutu uararingikka tita-Nu.

⁹⁶Aellehangku manungku apan nasuungnga udde lai pia pattaal᷊anne, tumba'u ete parenta-Nu apan nasuungnga.

⁹⁷Aroddi arangnguangku tita-Nu; ta'u iraṛṛingidda su al᷊o'engngu allo.

⁹⁸I ya'u sidutu uanaungnga parenta-Nu, apan naaola'a si ya'u lembon mappandeanna wuassu manga see'u.

⁹⁹Pasasunna'u nangillembo wuassu pasasunnan manga huru'u, ana waugu i ya'u maṛingiddu manga parenta-Nu.

¹⁰⁰I ya'u massingkatanna wuassu matatimmade, ana waugu i ya'u uaumbele manga parenta-Nu.

¹⁰¹I ya'u nallinda'u manga pallal᷊aghu lal᷊eo, tadea'u i ya'u matuṛṛutta su manga al᷊aṛṛang-Ngu.

¹⁰²I ya'u tawe mangadio'a tita-Nu, ana waugu ete apan nanantiro si ya'u.

¹⁰³Atemangngawe eteapa wisara-Nu, pendamanna mattemanganna wuassu pul᷊a!

¹⁰⁴Manga tita-Nu nangonggolu pasasunna si ya'u, na'oman sara i ya'u maddantinnu pallal᷊aghu lal᷊eo.

¹⁰⁵Ṛengetan-Nu uddewe sasol᷊oanna su lempangku, semakka ipangngututta amatangku.

¹⁰⁶Apan ta'u pina'ire ringannu sasalu sarun ta'u tipusanna, tadea'u ipangagassa raṛṛawen-Nu apan matul᷊idda.

¹⁰⁷I ya'u tumaniten nasansara, oh MAWU, lu'arewe wia'u ere lai buatte nipa'ire-Nu.

¹⁰⁸Daringiṛṛewe aal᷊iomannu aadiangkamangku, oh MAWU, wuṛṛu i ya'u tantiroiwen manga tita-Nu.

¹⁰⁹Niawa'u sidutu maola'a wataṛṛu, arawe i ya'u tawe maabul᷊in tita-Nu.

¹¹⁰Taumata lal᷊eo mantaingngu sedda si ya'u, arawe i ya'u tawe sumewadda wuassu raṛṛawen-Nu.

¹¹¹Parenta-Ne uddewe pussa'a-U sarangkal᷊o'engnge, apan naal᷊uassa naungku.

¹¹²I ya'u mappandumma tumuṛṛutta raṛṛawen-Nu maddatingngu panginsueannu pabbiaṛṛangku.

¹¹³I ya'u marangngu manga tita-Nu, i ya'u maddantinnu taumata apan tawe ringannu ahewallu naungnga tuttuṛṛutta Si'o.

¹¹⁴Ete I'o mangangambangku wuṛṛu patatillummangku, i ya'u uaantimma su paaire-Nu.

¹¹⁵Ei taumata lal᷊eo, paaraute wua dingangku! I ya'u tuttuṛṛutta parentan Duata'u.

¹¹⁶Tohassawe i ya'u ere lai buatte nipa'ire-Nu tadea'u i ya'u sidutu wiakka, arie pabbala'a naungku masusa sulal᷊ummu pangangantingku.

¹¹⁷Tumpil᷊ewe i ya'u tadea'u i ya'u masal᷊amatta, wuṛṛu sidutu uararingikka parenta-Nu.

¹¹⁸I'o napawelengu taumata apan sinumewadda wuassu raṛawen-Nu, tawe gunane wawahian mangitou.

¹¹⁹Anambon taumata lal᷊eo ellehan-Nu ere sapadda, ana waugu udde i ya'u marangngu manga parenta-Nu.

¹²⁰I ya'u mangngindo ana waugu matta'un-Nu, naungku mangiladda su saruannu raṛṛawen-Nu.

¹²¹I ya'u buatte napaamattu atatul᷊idda wuṛṛu apapia, ariewe i ya'u itantilla su liman seetta.

¹²²Paddiandite manungku I'o mantul᷊ungku, arie pabbala'a i ya'u aallangannu manga taumata mawunga.

¹²³Mata'u maṛṛagete uaṛṛaddo sasumbala-Nu apan manal᷊amatta, i ya'u uaṛṛaddo apapallossa apan pina'ire-Nu.

¹²⁴Olaawe i ya'u uasul᷊ungngu darangngu-Nu, wuṛṛu i ya'u tantirowen raṛṛawen-Nu.

¹²⁵I ya'u allang-Ngu, olaawe i ya'u maasunna, tadea'u i ya'u maasunna parenta-Nu.

¹²⁶MAWU, ni'omante tempone I'o mammanara, ana waugu manga taumata nilumawanga tita-Nu.

¹²⁷Manga tita-Nu arangnguangku nangillembo wuassu wul᷊awanna, nangillembo wuassu wul᷊awanna tutune.

¹²⁸Ana waugu udde i ya'u mabbiakka uasul᷊ungngu anambon tatantiro-Nu, pallal᷊aghu apan wengkolla ipabbinsi'u.

¹²⁹Manga parenta-Nu mangke maatiangnga, ne i ya'u tuttuṛṛutta ringannu ahewallu naungku.

¹³⁰Napawe ital᷊a'a, al᷊aṛṛang-Ngu mangngonggolu asasemakka, mangonggolu pasasunna su taumata wiasa.

¹³¹Sasangngo'u uasal᷊arenga, ana waugu maapulun parenta-Nu.

¹³²Panailete si ya'u wuṛṛu akkanaawe i ya'u, ere lai I'o umakkannu taumata apan marangngu Si'o.

¹³³Tohassawe lempangku erelai buatte nipa'ire-Nu, ariewe pabbala'a i ya'u tataṛṛinoannu al᷊al᷊eo.

¹³⁴Pallosaawe i ya'u wuassu manga taumata apan mangngallanga si ya'u, tadea'u i ya'u sidutu tuttuṛutta parenta-Nu.

¹³⁵Al᷊amatewe i ya'u ringannu daranta-Nu, wuṛṛu i ya'u tantiroiwen raṛawen-Nu.

¹³⁶Allommata'u mangngelekka ere sal᷊ukka, ana waugu tita-Nu tawe tuṛṛutanna.

¹³⁷I'o matul᷊idda, oh MAWU, anambon tita-Nu naṛṛino.

¹³⁸Manga parenta apan nionggollu MAWU matul᷊idda wuṛṛu wotongnge ipangasakka.

¹³⁹Asasa'u erete waṛṛa sulal᷊ummu wadangku ana waugu see'u naabul᷊in al᷊aṛṛang-Ngu.

¹⁴⁰Paaire-Nu matohassa wuṛṛu apangimananna, i ya'u tumaniten marangngu.

¹⁴¹I ya'u indi taumata addio'a wuṛṛu lal᷊ebbone, arawe i ya'u tawe maabul᷊in al᷊aṛṛang-Ngu.

¹⁴²Atatul᷊iddu MAWU mattaṛṛangnga sarangkal᷊o'engnge, wuṛṛu tita-Nu sidutu naṛṛino.

¹⁴³I ya'u niaṛṛiaannu sansara wuṛṛu asasusa, arawe raṛṛawen-Nu maal᷊uassa naungku.

¹⁴⁴Parenta-Nu sidutu matul᷊idda; i ya'u onggol᷊eten pasasunna tadea'u i ya'u sidutu wiakka.

¹⁴⁵Ringannu ahewallu naungnga i ya'u sussal᷊ande Si'o; simbaṛṛewe i ya'u oh MAWU, i ya'u maapulu tumuṛutta parenta-Nu.

¹⁴⁶I ya'u sussal᷊ande Si'o; sal᷊amatewe i ya'u, i ya'u maapulu uaagassa parenta-Nu.

¹⁴⁷Marua allo i ya'u napu'o wuṛṛu sussal᷊ande ma'iontola; i ya'u uaantimma su paaire-Nu.

¹⁴⁸su al᷊o'engngu ṛabbi i ya'u uaalla, maṛṛingiddu al᷊aṛṛang-Ngu.

¹⁴⁹Daringiṛṛewe i ya'u ana waugu darangngu-Nu, oh MAWU, lu'arewe wia'u ana waugu atatul᷊iddu MAWU.

¹⁵⁰Taumata apan mangngenggenna si ya'u maranite, pandumanni mangitou lal᷊eo wuṛṛu maddiri maddaringikka tita-Nu.

¹⁵¹Arawe I'o marani, oh MAWU, al᷊awo'u parenta-Nu naṛṛino.

¹⁵²Ro'en dorone i ya'u naasingkatta wuassu manga al᷊aṛṛang-Ngu, manungku I'o buatte nanantunna saran mal᷊annu-l᷊annu.

¹⁵³Pa'ellege asasusa'u wuṛṛu sal᷊amatewe i ya'u, ana waugu i ya'u tawe manantangngu tita-Nu.

¹⁵⁴Sambaaite hatto'u wuṛṛu pallosa'e i ya'u; sal᷊amatewe i ya'u ere buatte nipa'ire-Nu.

¹⁵⁵Taumata lal᷊eo tawe iapasal᷊amatta, ana waugu tawe tumuṛṛutta raṛṛawen-Nu.

¹⁵⁶Tumaniten nangillembo darangngu-Nu, oh MAWU, sal᷊amatewe i ya'u ana waugu atatul᷊iddu MAWU.

¹⁵⁷Manambo taumata apan maisaseetta wuṛṛu mangngenggenna si ya'u, arawe i ya'u tawe manantangngu parenta-Nu.

¹⁵⁸I ya'u maddantinna maasilo manga taumata lal᷊eo udde, ana waugu i mangitou tawe maddaringikka al᷊aṛang-Ngu.

¹⁵⁹Pa'ellege arangngune i ya'u su parenta-Nu, oh MAWU, sal᷊amatewe i ya'u ana waugu darangngu-Nu.

¹⁶⁰Anambon ṛengetannu naṛṛino, al᷊awo'u tita-Nu matul᷊idda saran mal᷊annu-l᷊annu.

¹⁶¹Manga taumata pia taṛṛino mangngenggenna si ya'u ringannu tawe pinangiananne, arawe tumba'u tita-Nu apan ta'u iaata'utta.

¹⁶²Paaire-Nu naal᷊uassa si ya'u, ere sangkatou taumata apan naasangkalla darotongnga.

¹⁶³Al᷊awo'u awusu ta'u ipaddantinna, arawe tita-Nu arangnguangku.

¹⁶⁴I ya'u sidutu maadiangkamanna Si'o, ana waugu tita-Nu apan matul᷊idda.

¹⁶⁵Taumata apan marangngu tita-Nu mal᷊angnganna wuṛṛu matammudda, taweddu maasal᷊are si mangitou.

¹⁶⁶I ya'u uaṛṛaddo asasal᷊amatta wuas-Si'o, MAWU, manga parenta-Nu ta'u tattuṛṛutanna.

¹⁶⁷I ya'u tuttuṛṛutta manga parenta-Nu, wuṛṛu mandangngu ringannu ahewallu naungnga.

¹⁶⁸I ya'u maddaringikka parenta wuṛṛu tatantiro-Nu, ana waugu I'o maasilo al᷊awo'u inolaangku.

¹⁶⁹Antimanna sasal᷊ande'u ma'oma ringan-Nu, oh MAWU, i ya'u onggol᷊eten pasasunna ere buatte nipa'ire-Nu.

¹⁷⁰Wala'ewe darorongku maddatinga ringan-Nu, sal᷊amatewe i ya'u ere buatte nipa'ire-Nu.

¹⁷¹I ya'u maapulu sidutu maddalo Si'o, ana waugu I'o nangaṛa'a si ya'u raṛṛawen-Nu.

¹⁷²I ya'u maapulu mangantari su ola'u paaire-Nu, ana waugu al᷊awo'u parenta-Nu matul᷊idda.

¹⁷³Antimanna I'o sidutu umontola si ya'u, ana waugu i ya'u namile tumuṛṛutta parenta-Nu.

¹⁷⁴Naungku luṛṛintulun al᷊amatta wuas-Si'o, tita-Nu maal᷊uassa naungku.

¹⁷⁵Wala'e i ya'u mabbiakka, tadea'u i ya'u maddalo Si'o, antimanna manga raṛawen-Nu mantul᷊ungku.

¹⁷⁶I ya'u nial᷊iwune ere domba apan nawul᷊i, ne rantate wuṛṛu rea'ete allang-Ngu indi, ana waugu i ya'u tawe manantangngu manga parenta-Nu.