Read Talaud DARALO 139 Bible Online

DARALO 139 - Talaud bible

DARALO 139

¹Su piaṛṛa'u mangangantari. Daralon Daud. Oh MAWU, I'o maasunna si ya'u wuṛṛu masingka'u.

²I'o masingkattu al᷊awo'u inolaangku; wuassu marau I'o maasunna ṛingirangku.

³I'o maasilo si ya'u, mawae ete i ya'u mammanara ara'e mangngillol᷊o, I'o masingkatu al᷊awo'a apan ta'u mammanaranna.

⁴Ewe'e lai tantal᷊anna i ya'u taambe nabbisara, I'o masingkatte apa apan ta'u iwisara.

⁵I'o uapal᷊iwutta si ya'u wuassu al᷊awo'u pappi'uanne, wuṛṛu I'o nallu'adda si ya'u ringannu taṛṛino-Nu.

⁶Alal᷊ummawe eteapa si ya'u apapande-Nu udde, tawe a'omannu ṛingirangku.

⁷Watukkuapa i ya'u inai tadea'u mal᷊iu wuassu taṛṛino-Nu? Watukkuapa i ya'u tumal᷊angnga mangindau wuassu saruan-Nu?

⁸Napawe i ya'u umawitta su langitta, I'o poiaroddi, napawe i ya'u matiilla su runian papate, I'o lai isudde.

⁹Napawe i ya'u tumalla'a malliu punnu ra'i ara'e mamanua su pondollu waṛṛatta apan arauenne,

¹⁰poiaroddi lai I'o nangontola si ya'u; poiaroddi lai lima-Nu nangehetta si ya'u.

¹¹Napawe i ya'u maddoronga tadea'u ararandumma mami'unna si ya'u, wuṛṛu asasemakka uapal᷊iwutta si ya'u mabbal᷊i marandumma,

¹²ne ararandumma udde lai tawe maarandumma Si'o; ṛabbi masemakka naal᷊ihidda allo, wuṛṛu ararandumma udde naal᷊ihidda asasemakka.

¹³I'o nallanginnu al᷊awo'u wageangu waddangku, wuṛṛu na'ola'a si ya'u sulal᷊ummu illoṛṛon inangku.

¹⁴I ya'u maddalo Si'o ana waugu apapia-Nu si ya'u nipangillembo! Al᷊awo'u inolaan-Nu maaheranga wuṛṛu maatiangnga, i ya'u atonna-tonna naatutukke.

¹⁵Sutempo manga duṛṛi'u niola'a, ringannu ma'uduppa nilanginna sulal᷊ummu illoṛṛon inangku, tantal᷊anna i ya'u maggewalla poiaroddi ringannu awagananna, i ya'u tawe iawuni Si'o.

¹⁶I'o maasilo si ya'u sutempo i ya'u ta'e sulal᷊ummu illoṛṛo; sarangkanambone uawoṛetta sulal᷊ummu wuke-Nu; manga allone buatte nitantunna tantal᷊anna allo sambau taambe nitattakka.

¹⁷Aroddi asahadde ringiṛṛan-Nu si ya'u, oh Ruata, wuṛṛu aroddi anambone reenganne!

¹⁸Napawe ta'u ireengnga, mannamboanna wuassu anne; napawe i ya'u mapo'u, I'o lai ta'e ta'u iraṛingidda.

¹⁹Antimanna taumata lal᷊eo sarun patean-Nu, oh MAWU, paarauaawe manga taṛṛa pate wuassia'u!

²⁰I mangitou mabbatti'u al᷊al᷊eo-Nu, wuṛṛu massalu awusu ringannu manga soa-Nu.

²¹Oh MAWU, i'o maddantinnu taumata apan mabbinsi-Nu, naungku sussassilla su taumata apan lullawanga Si'o!

²²I mangitou lembon iaarantingku, wuṛṛu a'ellehangku ere seetta.

²³Parikisewe i ya'u oh Ruata, saṛṛasirewe naungku, sal᷊u'atewe i ya'u wuṛṛu asingkatewe ṛingirangku.

²⁴Ellehete tanne pia al᷊al᷊eo sulal᷊ummu riri'u, wuṛṛu i ya'u sulal᷊anna apan tawe panguddusanne.