Read Talaud DARALO 14 Bible Online

DARALO 14 - Talaud bible

DARALO 14

¹Su piaṛṛa'u mangangantari. Daralon Daud. Taumata longonna mabbisara sulal᷊ummu naungnga, “Tawe Duata.” Inolaanni mangitou lal᷊eo wuṛṛu maarantinna taweddu ma'ola'a apapia.

²Wuassu surga MAWU ual᷊ellega umattu taumata maddea'a taumata pande wuṛṛu massubba si Tou.

³Arawe anambon taumata buatte sinumewadda wuṛṛu nal᷊al᷊eo, tawe saran sangkatou apan na'ola'a apapia.

⁴Unnu MAWU, “Apa manga taumata lal᷊eo udde tawe maatutukka? I mangitou mabbiakka ringannu manna'o al᷊aṛṛana-U wuṛṛu tawe saran paassa niumal᷊iomanna si Ya'u.”

⁵Taumata lal᷊eo sarun lembon matta'utta, ana waugu Ruata uasirungnga taumata apan matuṛṛutta si Tou.

⁶Taumata lal᷊eo maapulu manal᷊are taumata asiangnga, arawe MAWU nabbal᷊i mallal᷊u'adde.

⁷Antimanna wuassu Sion rumanta asasal᷊amattu Israel! Ne pallal᷊awanni Yakub sarun lumuassa napawe mangapia apia ola'u wiakku al᷊aṛṛanang-Nge.