Read Talaud DARALO 140 Bible Online

DARALO 140 - Talaud bible

DARALO 140

¹Su piaṛṛa'u mangangantari. Daralon Daud.

²Liuaawe i ya'u wuassu taumata lal᷊eo, oh MAWU, riagaiwe i ya'u su saruannu taumata apan ma'ola'a al᷊al᷊eo.

³I mangitou manggol᷊agu al᷊al᷊eo sulal᷊ummu naungnga, wuṛṛu miallo-miallo mandantan patatiakka.

⁴Lilan mangitou naal᷊ihidda atoanna mawisa, manga wisaran mangitou naal᷊ihidda ere atampu.

⁵Oh MAWU, liuaawe i ya'u wuassu taṛṛinon taumata lal᷊eo, riagaiwe i ya'u su saruannu taumata apan mandantan pabbawawul᷊o apan pia pandumma mangema'u.

⁶Taumata mawunga mal᷊anna-l᷊annaba mantaingngu sedda si ya'u, wuṛṛu namataddu soma ipanametta si ya'u. Su al᷊o'engngu lal᷊anna i mangitou mantaingngu sedda ipanongnga si ya'u.

⁷Oh MAWU, i ya'u mabbisara: Ete I'o Ruata'u, daringiṛṛewe aal᷊iomannu sasal᷊ande'u.

⁸MAWU, Ruata'u, mananal᷊ama'u apan matohassa, I'o buatte nallu'adda si ya'u sulal᷊ummu pangalo.

⁹Arie pa'utunge apulun taumata lal᷊eo, oh MAWU, arie pabbala'a hol᷊agi mangitou maola'a.

¹⁰Arie pabbala'a see'u maauntunga; wala'e manga wisara lal᷊eo apan iwisaran mangitou maṛṛia'a su watanganni mangitou apan mallobbossa si ya'u.

¹¹Wala'e i mangitou aemaannu waṛṛan putungnga, wuṛṛu iramme sulal᷊ummu loṛṛangngu papate, na'oman sara tate maasabbanga apia.

¹²Wala'e taumata apan ma'ola'a pabbawawul᷊o aṛiaannu asasilaka, arie pabbala'a taṛṛa al᷊uandaga uatana'a su runia.

¹³I ya'u masingkatta I'o nangonggolu atatul᷊idda su taumata apan niallangnga, wuṛṛu nanamba'a hatton taumata asiangnga.

¹⁴Taumata matul᷊idda sarun maddalo Si'o; i mangitou sarun matana'a suadio'a ringan-Nu.