Read Talaud DARALO 145 Bible Online

DARALO 145 - Talaud bible

DARALO 145

¹Daralon Daud. I ya'u mamantuga Si'o, oh Ruata'u wuṛṛu Ratu'u, wuṛṛu maddalo Si'o sangkal᷊o'engnge.

²Miallo-miallo i ya'u maadiangkamanna Si'o, wuṛṛu mamantuga Si'o sarangkal᷊o'engnge.

³Ana waugu MAWU mawantuga wuṛṛu lembon raddaloanna, awawantu-Ge tawe asaṛṛasiranna.

⁴Maṛṛawa mappulunna taumata sarun maddalo inolaan-Nu wuṛṛu mamasingkattu atatohan-Nu.

⁵I mangitou sarun mabbatti'u awawantuga wuṛṛu apapia-Nu, manara-Nu apan maatiangnga sarun ta'u naunganna.

⁶I mangitou sarun mamasingkattu manga inolaan-Nu apan wahewalla, ahahewallu MAWU sarun ta'u iwatti'a.

⁷Taumata sarun mabbatti'u al᷊awo'u apapia-Nu wuṛṛu mangantarin atatul᷊iddu MAWU.

⁸MAWU udde marangngu wuṛṛu maakkanna, mal᷊annu masa'u wuṛṛu sidutu marangngu.

⁹I Tou masaṛṛionto'a su al᷊awo'u taumata, wuṛṛu marangngu anambon inariaddian-Ne.

¹⁰Anambon riaddian-Nu sarun maddalo Si'o, oh MAWU, anamabon al᷊aṛṛanang-Ngu sarun maadiangkamanna Si'o.

¹¹I mangitou sarun mamantuga taṛṛino-Nu maola'a Ratu, wuṛṛu mabbatti'u atatohan-Nu,

¹²tadea'u anambon taumata maasingkatta inolaan-Nu wahewalla, see lai araratuan-Nu mawantuga wuṛṛu maṛṛansangnga.

¹³Pamamarenta-Nu sidutu su al᷊o'engngu tempo, taṛṛino-Nu mattaṛṛangnga maṛṛawa mappulunna. MAWU matuṛṛutta su anambon paaire-Ne, i Tou napenen darangngu sulal᷊ummu al᷊awo'u inolaan-Ne.

¹⁴MAWU mantul᷊ungngu taumata sulal᷊ummu asasusa, i Tou mapararisikku taumata apan uaruutta.

¹⁵Anambon riaddianna wiakka uaantimma Si'o; I'o mangonggolu anna si mangitou sutempone.

¹⁶I'o mannuungngu al᷊awo'u hausanni mangitou, na'oman sara i mangitou tawe maawussa.

¹⁷MAWU matul᷊idda sulal᷊ummu al᷊awo'u manara-Ne wuṛṛu napenen darangngu sulal᷊ummu al᷊awo'u inolaan-Ne.

¹⁸I Tou maranin taumata apan sussal᷊ande si Tou, wuṛṛu maddorongnga si Tou ringannu naungnga waresi.

¹⁹I Tou malluassa naungngu manga taumata ma'imanna; i Tou maddaringikka sasal᷊anden mangitou wuṛṛu nanal᷊amatta si mangitou.

²⁰I Tou mallu'adda suapan taumata apan marangngu si Tou, arawe taumata lal᷊eo nipate-Ne.

²¹I ya'u maapulu maddalo MAWU sidutu, antimanna anambon riaddian-Ne maddalo MAWU saran mal᷊annu-l᷊annu.