Read Talaud DARALO 146 Bible Online

DARALO 146 - Talaud bible

DARALO 146

¹Paddalote MAWU! Ei naungku, paddalote MAWU!

²I ya'u maapulu maddalo MAWU su al᷊o'engngu pabbiaṛṛangku wuṛṛu mangantari su Ruata'u tantal᷊anna i ya'u ta'e wiakka.

³Ariete pangantimma su tembonanne su taumata apan tawe mapanal᷊amatta.

⁴Amungkangu i mangitou mate, i mangitou mabbelengnga su leta'a; allo udde lai anambon hol᷊agi mangitou mawul᷊i.

⁵Lal᷊umanna'a su taumata apan mangngasakku MAWU Ruatane, wuṛṛu uatahuanna Ruatan Yakub matatul᷊ungnge.

⁶Ete i Tou apan nandiaddi langitta wuṛṛu runia, tahal᷊oangnga wuṛṛu al᷊awo'u lal᷊oṛṛone; i Tou sidutu matul᷊idda saran mal᷊annu-l᷊annu.

⁷I Tou nangambanga manga taumata apan niallangnga, wuṛṛu nangonggolu anna su taumata apan mal᷊unussa. MAWU namallossu manga taumata apan tataṛṛanganna,

⁸wuṛṛu na'ola'a taumata wuta maasilo. I Tou namatunna taumata apan nanawo, wuṛṛu marangngu taumata apan matul᷊idda.

⁹I Tou mannillumma manga taumata raho; i Tou nantul᷊ungngu manga inawal᷊uanna wuṛṛu asisin timpal᷊uassa, arawe nanal᷊are hol᷊agu taumata lal᷊eo.

¹⁰MAWU uddewe Ratu saran mal᷊annu-l᷊annu. Ei Sion, Ruatanu uataṛṛino al᷊annune su al᷊awo'u tempo. Paddalote MAWU!