Read Talaud DARALO 18 Bible Online

DARALO 18 - Talaud bible

DARALO 18

¹Su piaṛṛa'u mangangantari. Daralon Daud, allangu MAWU. Niantari ipaddalo MAWU sutempo i Daud nipallosa wuassi Saul wuṛṛu wuassu manga seenne.

²I ya'u marangngu Si'o, oh MAWU, Ete I'o atatoha'u.

³MAWU naal᷊ihidda tanda'a watu apan matohassa tampa i ya'u uatullindumma. Ruata'u naal᷊ihidda wowon batu tampa i ya'u uasirunga. Naal᷊ihidda allunga i Tou, uataappa si ya'u, wuṛṛu ual᷊u'adda si ya'u tadea'u sidutu mal᷊angnganna.

⁴I ya'u ma'ial᷊are su MAWU apan ṛinone raloanna, I ya'u nipallossi Tou wuassu manga see'u.

⁵I ya'u papal᷊iwutannu silakan papate wuṛṛu uaammo su manawangu papate.

⁶I ya'u papal᷊iwutannu silakan papate wal᷊ati'u papate udde su saruangku.

⁷Sulal᷊ummu asasusa'u i ya'u ma'ial᷊are Si'o MAWU, i ya'u uui Ruata'u maddorongnga aontola. Wuassu Wal᷊en-Ne i Tou naddaringikka tingi'u wuṛṛu uararingikka darorongku.

⁸Ana see runia niumio'a wuṛṛu tinumaraddala, manga wantan bowone niumio'a wuṛṛu mangngindo ana waugu asasa'un Duata.

⁹Timbulla sinumawombola wuassu loṛṛangu ngirun-Ne, putungnga wuṛṛu waṛṛa sinumabbanga wuassu moṛṛong-Nge.

¹⁰Langitta niwaa-Ne, ana see sinumossoke i Tou ringannu winabbawa marandumma su al᷊ungngu ledda-Ne.

¹¹I Tou tinumalla'a ringannu uasa'e mala'ekatta; I Tou tuttalla'a roso su papaiddu anginna.

¹²I Tou nangoossa watangan-Ne ringannu araranduma; rallamma apan maappala uapal᷊iwutta si Tou.

¹³Wuassu sawallo su saruan-Ne, sinumabbangke winabbawa, uranna eisse wuṛṛu putungnga.

¹⁴Ana see MAWU nirumallu'a wuassu winalanganna; Apan Atanggaṛṛane napararingikku tingik-Ke.

¹⁵I Tou namiti'u manga anaan-Ne wuṛṛu nanal᷊iawukku seetta; I Tou na'ola'a sawallo masokka-sokka wuṛṛu na'ola'a i mangitou tinumal᷊angnga.

¹⁶Wantan tahal᷊oangnga niasingkatanna wuṛṛu rapappaku runia nawu'a sutempo MAWU nandona seen-Ne ringannu nasa'u.

¹⁷Wua doso MAWU nangul᷊ukku lima-Ne; I Tou nangagassa si ya'u wuṛṛu i Tou namatunna si ya'u wuassu ua'e apan mal᷊al᷊umma.

¹⁸I Tou nanal᷊amatta si ya'u wuassu seetta apan matohassa wuṛṛu wuassu manga taumata apan maddanting-Ku, ana waugu si ya'u, i mangitou tumaniten matohassa.

¹⁹I mangitou namangalo si ya'u sutempo i ya'u niaṛiaannu silaka, arawe MAWU nabbal᷊i matatul᷊ungku.

²⁰I Tou nalliu'u wuassu asasilaka wuṛṛu nanal᷊amatta si ya'u ana waugu i Tou mal᷊uassa si ya'u.

²¹MAWU nabbal᷊issa inolaangku apan naṛino; I Tou nangal᷊amatta si ya'u ana waugu i ya'u tawe sal᷊ane.

²²I ya'u tuttuṛṛutta parentan MAWU wuṛṛu tawe tumal᷊iudda Ruata'u.

²³Anambon tita-Ne raddaringiṛṛangku, manga parenta-Ne tawe abbul᷊ianangku.

²⁴I Tou masingkatta manungku i ya'u tawe sangkulle wuṛṛu nangindaun watangangku wuassu pasasal᷊a.

²⁵Ne MAWU nabbal᷊issa inolaangku apan mapia ana waugu i Tou masingkata i ya'u tawe sal᷊ane.

²⁶MAWU, I'o mallu'adda su taumata apan matuṛṛutta wuṛṛu mapia su taumata apan mapia.

²⁷Su saruannu taumata apan susi I'o napal᷊iatta'u watangan-Nu susi, arawe taumata lal᷊eo paisaseetan-Nu.

²⁸Taumata apan naungnge mawawo I'o nanal᷊amatta, arawe taumata mawunga niapasuṛṛubawa-Nu.

²⁹I'o nande'omma sol᷊o'u; MAWU Ruata'u nanemakka ararandungku.

³⁰I'o nanohassa si ya'u ipaṛṛadda'a seetta; ringannu sasumbalan Ruata'u i ya'u nanggohakku pattillumanni mangitou.

³¹Inolaannu Ruata udde nasuungnga paairen MAWU udde apangimananna. I Tou naal᷊ihidda allungnga su anambon taumata apan uasirungnga si Tou.

³²Ana waugu tumba'u MAWU udde Ruata; Ruata udde sassane mananamba'a si ite.

³³Ete i Tou Ruata apan nanohassa si ya'u wuṛṛu na'ola'a lal᷊angku mal᷊angnganna.

³⁴I Tou nanohassa ledda'u ere leddan rusa, wuṛṛu nallu'adda asasal᷊ama'u su panenteanna.

³⁵I Tou nangaṛṛa'a si ya'u mapapangalo, na'oman sara i ya'u wotonge mangannata al᷊ati'anna apan atohasanne.

³⁶MAWU, I'o ual᷊u'adda wuṛṛu nanal᷊amatta si ya'u, wuṛṛu nanumpilla si ya'u ringannu taṛṛino-Nu; i ya'u tinumelenga ana waugu inolaan-Nu.

³⁷I'o nallu'adda si ya'u tadea'u i ya'u tawe iasametta, wuṛṛu i ya'u tawe saran paassa manawo.

³⁸I ya'u nangenggenna see'u wuṛṛu niawaddo i mangitou, wuṛṛu tawe sinumoṛṛotta na'oman sara i mangitou nate.

³⁹I mangitou ta'u niwal᷊atta na'oman sara tate naawuatta apia, i mangitou naṛṛa'a nallome su saruannu ledda'u.

⁴⁰I'o nangonggola si ya'u atatohassa ipapapangalo, wuṛṛu auntunganna su manga see'u.

⁴¹I'o na'ola'a see'u tinumal᷊anga wuassu si ya'u; manga taumata apan maddantina ta'u nipate.

⁴²I mangitou mangngintul᷊i, arawe taweddu mangontola, i mangitou sussal᷊ande su MAWU, arawe i Tou tawe sinumimbakka.

⁴³I mangitou ta'u niṛṛimunsa'a naal᷊ihidda awu apan nassal᷊iawukka, wuṛṛu ta'u nisapu naal᷊ihidda labbo su lal᷊anna.

⁴⁴I'o nalliu'u wuassu ṛuanganna apan mal᷊awangnga, wuṛṛu na'ola'a si ya'u tembonannu manga walahanna; walahanna apan awaganangku maola'a allangku.

⁴⁵Manga taumata raho uasuṛṛubawa si ya'u wuṛṛu tuttuṛṛutta napawe maaringikka tingi'u.

⁴⁶Awawaṛṛanin mangitou nawul᷊ite; i mangitou mangngiladda wuṛṛu sinumabbanga wuassu tanda'a watun mangitou.

⁴⁷MAWU udde wiakka! Daralo su mananahe'u! Paddalote awawantugu Ruata mananal᷊ama'u!

⁴⁸I Tou nangonggollu auntunganna si ya'u wuassu see'u; manga walahanna niapasuṛṛubawa-Ne su saruangku,

⁴⁹I Tou nanal᷊amatta si ya'u wuassu manga see'u. MAWU, I'o nangonggollu auntunganna si ya'u wuassu see'u, I'o nallu'adda si ya'u wuassu manga taumata apan maṛṛagissa.

⁵⁰Ne i ya'u mamantuga Si'o suwallattu manga walahanna, wuṛṛu i ya'u mangngantarin daralo Si'o.

⁵¹Ruata nangonggolu auntunganna wahewalla su ratu-Ne, I Tou sidutu mandangngu taumata apan nipile-Ne, eteudde i Daud wuṛṛu papapulunne saran mal᷊annu-l᷊annu.