Read Talaud DARALO 21 Bible Online

DARALO 21 - Talaud bible

DARALO 21

¹Su piaṛṛa'u mangangantari. Daralon Daud.

²Oh MAWU, ratu lulluassa ana waugu I'o buatte nanohassa si tou; i tou lullala'a ana waugu I'o nangonggolu auntunganna si tou!

³I'o buatte nangutungu apulun naungnge, wuṛṛu nangonggolu sarangkanambone apan niroronganne.

⁴I'o nirumanta ringanni tou uaapiddu al᷊amatta manambo, wuṛṛu nalluṛen araposa wul᷊awanna su puane.

⁵I tou sussal᷊ande wiakka, ne I'o nangonggola si tou, ewe'e lai uukka mal᷊o'engnga saran mal᷊annu-l᷊annu.

⁶Ana waugu tul᷊ungannu MAWU i tou nabbal᷊i aadatanna, I'o na'ola'a si tou tinumelengnga wuṛṛu mawantuga.

⁷I'o nangal᷊amatta si tou sarangkalo'engnge; daranta-Nu naapene al᷊al᷊uassi tou.

⁸Ratu uaantimma su MAWU Apan Atanggaṛṛanne, i tou sidutu mal᷊angnganna ana waugu sidutu raddangnguannu MAWU.

⁹I Tou sarun manametta anambon seenne, wuṛṛu manametta anambon taumata apan maddantinni Tou.

¹⁰I Tou nirumanta naal᷊ihidda putungnga lukkenggama ipamate si mangitou. I mangitou sarun pateannu asasa'un MAWU, wuṛṛu ringannu putungnga apan maa'epodda.

¹¹Wuassu papapulunni mangitou taweddu nallambe, ratu sarun mamate si mangitou sarangkanambone.

¹²Amungkangu i mangitou manggol᷊aga lumawanga ratu, wawahian mangitou tawe gessine.

¹³I Tou sarun mamiti'u anaan-Ne, na'oman sara i mangitou mabbelengnga wuṛṛu tumal᷊angnga.

¹⁴I yami maddalo Si'o MAWU, ana waugu wahewalle taṛṛino-Nu, i yami mangngantari maddalo atatohan-Nu.