Read Talaud DARALO 27 Bible Online

DARALO 27 - Talaud bible

DARALO 27

¹Daralon Daud. MAWU udde asasema'u wuṛṛu asasal᷊ama'u, taweddu ta'u iata'utta. MAWU uddewe tanda'a watu pattillumangku, i ya'u tawe mata'utta.

²Amungkangu i ya'u pangaloannu taumata lal᷊eo apan mamate si ya'u, ete i mangitou apan itarane wuṛṛu mal᷊iundu'a.

³Salaiwe i ya'u tatalliwunannu tantara apan manambo, i ya'u tawe mata'utta. Salaiwe rumanta pangalo lumawanganga si ya'u, i ya'u sidutu uaantimma.

⁴Tumba'u sambau apan ta'u doronganna su MAWU, tumba'u indi apan ta'u ipaapulu: matana'a su Wal᷊en MAWU su al᷊o'engngu pabbiaṛangku, tadea'u maapendamma apapian MAWU wuṛṛu sumal᷊ande aehen-Ne.

⁵MAWU ual᷊u'adda si ya'u sutempon asasusa; I Tou namuni'u sulal᷊ummu Wal᷊en-Ne, wuṛṛu namatunna si ya'u watukku wowon batu.

⁶Orassa indi i ya'u naauntunga su see'u apan uapal᷊iwutta si ya'u; ne ringannu u'uin lal᷊ala'a i ya'u mangonggolu sasamba aadiangkamanna su Wal᷊en-Nu; i ya'u maapulu mangantari wuṛṛu maddalo MAWU.

⁷Oh MAWU, daringiṛṛewe napawe i ya'u sumal᷊ande Si'o, akkanaawe i ya'u wuṛṛu simbaṛṛewe i ya'u!

⁸I'o nabbisara, “Rantate passubba si Ya'u.” I ya'u sinumimbakka, “I ya'u sarun rumanta, oh MAWU;

⁹ariewe pa'imbuni wuassi ya'u.” Arie masa'u wuṛṛu manol᷊a'u allang-Ngu, ana waugu tumba'u I'o apan buatte nantul᷊ungku. Ariewe i ya'u iramme ara'e itantangnga, oh Ruata, mananal᷊ama'u.

¹⁰Salaiwe iamangnga wuṛṛu inangnga manantangku, MAWU sarun mappadul᷊i si ya'u.

¹¹Pantingira'awe si ya'u apulu-Nu, oh MAWU, ehettawe i ya'u su lal᷊anna apan matul᷊idda, ana waugu see'u tumaniten manambo.

¹²Arie i ya'u itantilla su apulun naungngu see'u, apan namangalo si ya'u ringannu wawahia wuṛṛu wawansaga.

¹³I ya'u mangimanna manungku sarun mamendamma apapian MAWU sulal᷊ummu wia'u su runia indi.

¹⁴Pangantimpe sidutu su MAWU, tohasse wuṛṛu patammura'e naungku; ore, pangantimpe MAWU!