Read Talaud DARALO 34 Bible Online

DARALO 34 - Talaud bible

DARALO 34

¹Daralon Daud, sutempo mangngawusu wewa su saruanni Abimelekh, na'oman sara i tou nilimbuaṛṛana ana see nassal᷊iute.

²I ya'u ṛinone maadiangkamanna su MAWU suapan tempo, wuṛṛu tawe illol᷊one maddalo si Tou.

³I ya'u ṛinone lumuassa ana waugu inolaannu MAWU; antimanna taumata massusa maaringikka udde wuṛṛu lumuassa.

⁴Paddalote MAWU su sampunna ringangku, wette suadio'a mamantuga aran-Ne.

⁵I ya'u niumal᷊iomanna su MAWU, wuṛṛu i Tou sinumimbakka, wuṛṛu i ya'u nipallossa wuassu atata'utta.

⁶Taumata su asasusa mangngantimma si Tou wuṛṛu lulluassa, i mangitou taweddu pangiananne mabbal᷊i masili.

⁷Taumata su asasilaka sussal᷊ande, ne MAWU sinumimbakka, namallossi tou wuassu asasusane.

⁸Mala'ekatu MAWU uariaga taumata apan mangngimanna, wuṛṛu namallossi mangitou wuassu asasilaka.

⁹Pendamete sassane aroddi apiane MAWU, lal᷊umanna'a taumata apan uasirungnga si Tou.

¹⁰Pangaddate MAWU, ei i yamiu al᷊aṛṛanang-Nge, ana waugu taumata apan mangngimanna sarun tawe atalanne.

¹¹Manga singa mal᷊unussa ana waugu anna matul᷊ungnga; arawe taumata apan massubba MAWU tawe apausanne.

¹²Paddaringikka manga ana'u sarangkanambone, i ya'u mangaṛṛa'a si yamiu mangaddata MAWU.

¹³I yamiu maapulu uukka mal᷊o'engnga wuṛṛu mattemma apan apianne?

¹⁴Arie mapasabbangu manga wisara lal᷊eo, wuṛṛu imbaṛṛangnga maapulu mallinga mammahia.

¹⁵Pangindauten al᷊al᷊eo, pa'ola'e apapia, paddea'e paddarame ringannu anambon auatannu.

¹⁶MAWU ma'ellega taumata apan ma'imanna, i Tou maddaringikka napawe i mangitou mangintul᷊i maiontolla.

¹⁷Arawe taumata apan ma'ola'a al᷊al᷊eo raddo'apan-Ne; amungkangu i mangitou nate, i mangitou mal᷊ihakka timbul᷊iananna.

¹⁸Amungkangu taumata susi sumal᷊ande, MAWU maddaringikka, wuṛṛu manal᷊amatta si mangitou wuassu al᷊awo'u asasusa.

¹⁹MAWU maranin taumata naungnge mawawo; i Tou mannal᷊amatta taumata apan lome.

²⁰Tumaniten manambo asasusan taumata mapia, arawe MAWU namallossi tou wuassu sarangkanambone udde.

²¹Wadangnge sidutu lal᷊u'arannu MAWU, wuassu duṛṛine tawe saran sambua paddianna.

²²Taumata lal᷊eo sarun mate ana waugu al᷊al᷊eone, taumata apan maddantinu taumata susi sarun iṛṛuumanna.

²³MAWU nanal᷊amatta manga allang-Nge; apan uasirungnga si Tou sarun tawe iṛuumanna.