Read Talaud DARALO 38 Bible Online

DARALO 38 - Talaud bible

DARALO 38

¹Daralon Daud sutempo nangonggolu sasamban panananunganna.

²MAWU, ariewe i ya'u iṛṛuumanna sulal᷊ummu asasa'u-Nu, ariewe panansara si ya'u sulal᷊ummu pandarona-Nu.

³Anaan-Nu nallappasa nallessa wadangku, lima-Nu pendamanna mawakkata uaumpisanna si ya'u.

⁴I ya'u maradda'a mawakkata ana waugu asasa'u-Nu; taweddu pia lal᷊umanange su wadangku ana waugu rosa'u.

⁵I ya'u nal᷊ammisa su manawangngu pasasal᷊a'u, winabbawan rosa'u tumaniten mawakkata si ya'u.

⁶Manga lessa'u pia nanane wuṛṛu hal᷊urune mawukku'a, ana waugu inolaangku tumaniten longonna.

⁷I ya'u niuma'ukku'a wuṛṛu niumaruutta, su al᷊o'engngu allo i ya'u uatinnannanga wuṛṛu massusa.

⁸Sal᷊iubba mannutungnga wadangku, taweddu pia lal᷊umannange su waddangku.

⁹I ya'u naṛimunsa'a wuṛṛu niasueannu ikkata, i ya'u ma'uare ana waugu naungku sussinggawanga.

¹⁰MAWU, I'o masingkatu al᷊awo'u apulu'u, sasal᷊iomangku tawe iawuni Si'o.

¹¹Pappuso'u sussinggawanga, ikka'u nawul᷊i, mata'u nabbal᷊ite mal᷊abbuka.

¹²Manga hawe'u mallinda'a ana waugu radda'u, ewe'e manga tuṛṛangku mangngindauute lai.

¹³Taumata apan mappandumma mamate si ya'u nantaingngu sedda si ya'u; apan pia pandumma manilaka si ya'u mammansaga mamate si ya'u.

¹⁴Arawe i ya'u naal᷊ihidda taumata wengella apan tawe maaringikka, naal᷊ihidda taumata mou apan tawe maawisara.

¹⁵Atonna, i ya'u naal᷊ihidda taumata tawe maaringikka, wuṛṛu ana waugu udde tawe sumongga.

¹⁶Arawe i ya'u uaantimma Si'o, oh MAWU, wuṛṛu I'o, MAWU Ruata'u, sinumimbakka si ya'u.

¹⁷Arie pabbala'a see'u mal᷊uassa maasilo asasusa'u, arie pabbala'a i mangitou mattal᷊imoṛonganna napawe i ya'u lomete.

¹⁸I ya'u maraniten manawo, i ya'u sidutu sussal᷊iomannu atataddu'a.

¹⁹I ya'u nanga'u manga rosa'u; naungku sussinggawanga maṛingiddu pasasal᷊a'u.

²⁰Manga taumata apan maisasee'u, manambo wuṛṛu matohassa, i mangitou maddantinnu ola'u i ya'u mabbiakka.

²¹Taumata apan mabbal᷊issu apapia ringannu al᷊al᷊eo maisasee'u ana waugu inolaangku mapia.

²²Oh MAWU, ariewe manantangku, ariewe marau wuassia'u, oh Ruata'u.

²³Paal᷊ihakka rumanta umontolla si ya'u, oh MAWU mananal᷊ama'u.