Read Talaud DARALO 40 Bible Online

DARALO 40 - Talaud bible

DARALO 40

¹Su piaṛa'u mangangantari. Daralon Daud.

²Ringannu sabare i ya'u uaṛṛaddo sasumbalan MAWU; ana see i Tou na'ellega si ya'u wuṛṛu naddaringikka sasal᷊ande'u.

³I Tou namatunna si ya'u wuassu loṛṛangnga apan maasilaka, wuassu labbon lota. I Tou nangaddo'u su wowon wuiddu watu, na'oman sara lempangku naatokka.

⁴I Tou nangaṛṛa'a si ya'u mangantarin antari wakku, antari daralo su Ruatan kite. Manambo taumata naasilo wuṛṛu nabbal᷊i nata'utta, ana see nangimante MAWU.

⁵Lal᷊umanna'a su taumata apan mangngimanna MAWU, apan tawe tinumantalonga massubba manga monganna, ara'e maiontolla su taumata mawunga.

⁶MAWU, anambone eteapa inolaan-Nu si yami, oh MAWU Ruata'u, I'o taweddu panumandinganne! Tumaniten manambo ṛiin-Nu apan maatiangnga si yami, tawe iawatti'a abbi.

⁷Sasamba wuṛṛu aonggola ipaadiri-Nu, sasamba itattambunna wuṛṛu sasamba papappassa rosa tawe dorongan-Nu. Arawe I'o buatte nangonggolu tal᷊inga si ya'u, apan wotongnge maaringikka tingikku MAWU.

⁸Ana see i ya'u nabbisara, “Indete i ya'u, sulal᷊ummu lul᷊unnu wuke niwoṛetta si ya'u.

⁹I ya'u mal᷊uassa tuttuṛṛuta apulu-Nu, oh Ruata, tita-Nu ta'u sinahipunna sulal᷊ummu naungnga.”

¹⁰Sulal᷊ummu ammul᷊annu al᷊aṛṛanang-Ngu i ya'u mammasingkatu watti'u al᷊al᷊uassa manungku I'o buatte nanal᷊amatta si yami. Ringannu tawe illil᷊one olangnge udde iapasingkata, I'o masingkatu sarangkanambone udde, oh MAWU.

¹¹Watti'u asasal᷊amatta udde tawe ta'u sinahipunna sulal᷊ummu naungnga, aontolla wuṛṛu papadul᷊i-Nu sidutu ta'u iapasingkata. Su saruannu ammul᷊annu al᷊aṛang-Ngu i ya'u tawe mal᷊annaba, arawe i ya'u mammasingkatu darangngu wuṛṛu papadul᷊i-Nu.

¹²MAWU ariewe pangillol᷊o mandangngu si ya'u; lu'arewe i ya'u sidutu ringannu darangngu wuṛṛu papadul᷊i-Nu.

¹³I ya'u tatalliwunannu asasilaka apan manambo, anambone tawe iareengnga. I ya'u a'engenannu manga rosa'u, na'oman sara i ya'u tawe maasilo. Reenganne nilumebbe wuassu uta'a su pua'u, maaola'a si ya'u tate antimma.

¹⁴Oh MAWU, sal᷊amatewe i ya'u, MAWU paal᷊ihakke umontola si ya'u!

¹⁵Wala'ewe taumata apan maapulu mamate si ya'u iaparugi wuṛṛu tumal᷊angnga ringannu u'al᷊iwu. Wala'ewe taumata lullaggen asasilaka'u puul᷊anna iapatal᷊angnga wuṛṛu aadio'anna.

¹⁶Wala'ewe taumata apan lullage'u mabbal᷊i ṛumindu'a wuṛṛu masili.

¹⁷Antimanna anambon taumata apan massubba Si'o lumuassa wuṛṛu lumala'a, wuṛṛu sarangkanambone apan mandangngu asasal᷊amatta wuassu MAWU sidutu mabbisara, “Atonna mawantuga MAWU!”

¹⁸I ya'u indi asiangnga wuṛṛu lome, arawe MAWU ual᷊u'adda si ya'u. Ete I'o matatul᷊ungnga wuṛṛu mananal᷊ama'u, ariewe malliwue, oh Ruata'u!