Read Talaud DARALO 44 Bible Online

DARALO 44 - Talaud bible

DARALO 44

¹Daralon ṛuanganni Korah. Antari tatantiro. Su piaṛa'u mangangantari.

²Oh Ruata, i yami naaringikke sassane wa'e apan niwatti'u al᷊amonan kami su ola'u manara wahewalla apan buatte niolang-Ngu sutempo dorone.

³I'o sassane nallimbuakka manga walahanna tadea'u al᷊aṛṛanang-Ngu mamanua su wanuan mangitou. Manga walahanna waine nisilaka-Nu, arawe al᷊aṛanang-Ngu niwalanu mabbalaga.

⁴Leta'a udde tawe niaaṛṛon mangitou ringannu hal᷊ele; tawe ringannu atatohassa sassane i mangitou naauntunga, arawe ringannu taṛṛino wuṛṛu semakku daranta-Nu, ana waugu I'o uanaungnga al᷊aṛṛanang-Ngu.

⁵Ete I'o Ratu'u wuṛṛu Ruata'u, apan nangonggolu auntunganna su al᷊aṛṛanang-Ngu.

⁶Ringannu taṛṛino-Nu i yami namaddon seetti yami, wuṛṛu napasuṛṛubbawa manga taumata apan mammangalo si yami.

⁷Ana waugu i ya'u tawe mangasakku anangku, hal᷊ele'u lai tawe mapanal᷊amatta si ya'u.

⁸Arawe ete I'o nanal᷊amatta si yami wuassu seetta, wuṛṛu namaddon manga taumata apan maddantini yami.

⁹Ne i yami sidutu mammantuga Si'o, wuṛṛu uata'a maadiangkamanna Si'o.

¹⁰Arawe orassa indi I'o nanantangngi yami wuṛṛu namalan kami niawaddo. I'o tate lai inai suadio'a ringanni yami.

¹¹I'o namalan kami tinumal᷊angu watanganni yami wuassu seetti yami, wuṛṛu i mangitou nangaṛṛo darotongngi yami.

¹²I'o namalan kami niṛṛata ere domba, wuṛṛu I'o nanal᷊iawukki yami suwallatu manga walahanna.

¹³I'o nabbal᷊u'u al᷊aṛṛanang-Ngu ringannu aregane mawawo, wuṛṛu tawe naasomba auntunganne.

¹⁴I'o na'ola'a si yami aal᷊uandahannu manga al᷊indonganna i mangitou mallobbosa wuṛṛu lullaggen kami.

¹⁵I Yami niolang-Ngu pappasendeṛannu manga walahanna; i mangitou uapapa'ilinga lapiddu mangngadio'a si yami.

¹⁶Su al᷊o'engngu allo i ya'u iappasal᷊a, uapasanna asasili wuṛṛu amamea,

¹⁷ana waugu naaringikka al᷊uandaga wuṛṛu papansili wuassu moṛṛongngu seetta wuṛṛu taṛṛa une.

¹⁸Sarangkanambone buatte naṛṛia'a si yami salaiwe i yami tawe maabul᷊i-Nu ara'e massinaadu paaire-Nu si yami.

¹⁹Naungngi yami tawe mangawusu Si'o; tita-Nu tawe abul᷊iananni yami.

²⁰Arawe I'o nanantangngi yami sulal᷊ummu ararandumma; i yami tawe ikkata suwallatu winatangnga mal᷊aṛṛaga.

²¹Unnu wisara i yami tate lai massubba Ruata, ewe'e u'al᷊iomante su mawu waine,

²²Ruata sarun maasingkata, ana waugu i Tou maatutukka addapingu naungngi yami.

²³Ana waugu I'o i yami sidutu uasaruanna papate, wuṛṛu a'olaanna naal᷊ihidda domba apan ṛatanna.

²⁴Darisikke, oh MAWU! Anio I'o mattiilla? Pabbuatte! Arie manol᷊a'i yami sarangkal᷊o'engnge.

²⁵Anio I'o ma'imbuni, wuṛṛu maabul᷊in asasansara wuṛṛu asasusan kami?

²⁶I yami naṛṛimunsa'a nanawo su leta'a, ual᷊allowanga su awu ana waugu niawaddo.

²⁷Pabbuatte wuṛṛu rantate pangontola si yami, sal᷊amatewe i yami ana waugu darangngu-Nu.