Read Talaud DARALO 45 Bible Online

DARALO 45 - Talaud bible

DARALO 45

¹Daralon ṛuanganni Korah. Antarin darangngu. Su piaṛṛa'u mangangantari. Tumuṛṛuttu ronsi: Wunga hal᷊ohomma.

²Manga wisara maṛṛamaga sinumabbanga wuassu naungku, antari'u nionggola sasamba su ratu. Naal᷊ihidda penan sangkatou panden bisara, lila'u nasaddiate maapasabbangu sasanato'a.

³Ete I'o apan aṛṛamahanne wuassu wallatu taumata, manga wisaranu napenen apapia, ana waugu udde i'o nial᷊amatannu Ruata saran mal᷊annu-l᷊annu.

⁴Peta'e hal᷊elenu su lawassa, ei ratu apan matohassa, i'o tumaniten mawantuga wuṛṛu nilumiatta'a!

⁵Amata'e, ringannu awawaṛṛani mattuddan auntunganna manahekku apapia wuṛṛu atatul᷊idda apan masaṛṛionto'a; ringannu atatohannu aṛṛote auntunganna apan wahewalla!

⁶Anaannu apan maṛṛoro nallappasa su pappuson seennu, manga walahanna nanawo su saruannu leddanu.

⁷Ruata nangonggola si'o taṛṛino ipamarenta, taṛṛinonu uata'a saran mal᷊annu-l᷊annu; ringannu atatul᷊idda i'o mammarenta tumana'u soanu.

⁸I'o mandangngu atatul᷊idda wuṛṛu maddantinu al᷊al᷊eo; ana waugu udde, Ruata, Ruatanu buatte namile si'o, wuṛṛu nalluassa si'o nilumambalanna wuassu manga ratu waine.

⁹Peddenu pia hal᷊urun amania, gaharu wuṛṛu cendana; mananalangnga ronsi su wal᷊en araratuanna lal᷊ogaṛannu gadinga wuṛṛu naal᷊uassa si'o.

¹⁰Suwallatu manga mangangimbe wal᷊en araratuanna pia lai manga maṛṛuala ana'u ratu. Su aikkatannu adderan araratuanna uarisikka wo'i ringannu lal᷊ogakka wul᷊awanna tutune.

¹¹Ei Maṛṛuala ana'u ratu, paaddaringikke manga wisara'u, timbul᷊ianete walahanna wuṛṛu ṛuangannu hawenu.

¹²Al᷊aṛṛamagu maasaṛṛimbuatta naungngu ratu, i tou tuangngu, passuṛṛubawate si tou.

¹³Tumana'u Tirus uaapiddu aonggola si'o; taumata ala mattinsahadda manganu naungngu.

¹⁴Maṛuala ana'u ratu sinumutta ringannu al᷊aṛṛansangnga, peddene nilogaṛṛannu wul᷊awanna.

¹⁵Ringannu laubba manambo hatine i tou niuntudda ringannu ratu, tatantalongannu maṛṛuala, manga hawene, i mangitou lai hunane su ratu.

¹⁶I mangitou hugio ringannu al᷊al᷊uassa sutempo niuntudda sinumutta sulal᷊ummu wal᷊en araratuanna!

¹⁷I'o, ratu'u, sarun maasomba manambo ana'a esakka iapa'ianna su adderan araratuannu iupungngu al᷊amonanu. I mangitou sarun ta'u olaanna tembonanne su ahewallu runia.

¹⁸Ringannu antari indi i'o ta'u wantuhanna maddatingngu papapulungku manga walahanna sarun maddalo si'o sarangkal᷊o'engnge.