Read Talaud DARALO 5 Bible Online

DARALO 5 - Talaud bible

DARALO 5

¹Su piaṛa'u mangangantari. Ringannu nanalanga wansi. Daralon Daud.

²Oh MAWU, daringiṛewe manga wisara'u, ellehewe manga sasal᷊ande'u.

³Daringiṛewe sasal᷊ande'u wuṛṛu ontol᷊ewe i ya'u, oh Ratu'u wuṛṛu Ruata'u.

⁴Ana waugu tumba'u Si'o i ya'u umal᷊iomanna, oh MAWU, daringiṛṛewe sasal᷊ande'u sutempo marua allo. Marua allo i ya'u mangapiddu sasamba'u wuṛṛu i ya'u uaṛṛaddo sasimbak-Ku, oh MAWU.

⁵I'o Ruata apan maddirin al᷊al᷊eo; taumata lal᷊eo imbaṛangnga mattindaho ringan-Nu.

⁶I'o tawe maaṛṛadanna ma'ellega taumata mawunga, I'o maddantinnu taumata apan ma'ola'a al᷊al᷊eo.

⁷I'o mammate manga taumata taṛṛa wahia, taṛṛa l᷊inga wuṛṛu taṛṛa pate aellehan-Nu addio'a.

⁸Arawe ana waugu darangngu-Nu apan wahewalla, i ya'u wotongnge maasutta sulal᷊ummu Wal᷊en-Nu. I ya'u massubba watukku saruannu Wal᷊en-Nu apan susi, wuṛṛu massubba Si'o ringannu atonna-tonna.

⁹Oh MAWU, tumaniten manambo see'u! Ehettawe i ya'u tumuṛṛutta apulu-Nu, wuṛṛu patingiraawe lal᷊an-Nu apan sarun ta'u amatanna.

¹⁰Ana waugu wisaran see'u tawe pangimananna; naungngi mangitou napenen hol᷊aga mawukku'a. Manga wisaran mangitou daringiṛṛanna maasaṛindu'a, arawe naungngi mangitou napenen awawukku'a.

¹¹Ṛuumanaawe i mangitou, oh MAWU, wala'ewe i mangitou masilaka ana waugu hol᷊agi mangitou sassane. Limbuaṛṛete i mangitou ana waugu manambo rosan mangitou, ana waugu i mangitou buatte nilumawanga Si'o.

¹²Antimanna anambon taumata apan uasirungnga Si'o lulluassa wuṛṛu hugion lal᷊uassa saran mal᷊annu-l᷊annu. Lu'arewe manga taumata apan marangngu Si'o, tadea'u i mangitou lumuassa ana waugu I'o.

¹³Ana waugu I'o nangal᷊amatta taumata apan matuṛṛutta Si'o, I'o nallu'adda si mangitou ringannu darangngu-Nu.