Read Talaud DARALO 50 Bible Online

DARALO 50 - Talaud bible

DARALO 50

¹Daralon Asaf. MAWU, Ruata Apan Lembontaṛṛino, nabbisara, I Tou nassinaukka su ahewallu runia wuassu ra'i naddatingngu waṛṛatta.

²Wuassu Sion, soa apan aṛṛamahanne, Ruata nirumanta ringannu asasemakka.

³Ruatan kite nirumanta wuṛṛu tawe uatatana'a matammuda, i Tou niliuṛṛoroannu putunga apan nilumewa, wuṛṛu papal᷊iwutannu tandi'a apan masaddata.

⁴I Tou namaggo langitta wuṛṛu runia iapattiala si Tou makkuungngu al᷊aṛṛanang-Nge.

⁵Wisara-Ne, “Ammul᷊a'e anambon al᷊aṛṛana-U, apan buatte nabaiddu paaire si Ya'u, wuṛṛu ringannu nanohassu sasamba apan niṛata.”

⁶Langitta mammasingkatta manungku Ruata nakkuungngu al᷊aṛṛanang-Nge, wuṛṛu manungku i Tou sassane mallaṛuungnge.

⁷“Paddaringikke, al᷊aṛṛana-U, i Ya'u mabbisara, Israel, i Ya'u mattiala su saruanni yamiu; i Ya'u indi Ruata, Ruatanu.

⁸Wal᷊ine ana waugu sasambanu i Ya'u mangansilla si yamiu; sasamba itattambunnu sidutu udde su saruang-Ku.

⁹I Ya'u tawe mappandumma sapi wuassu tandangu, ara'e ambinga wuassu ammul᷊annu winatangngu;

¹⁰ana waugu anambon winatangnga su mahurangnge udde tatahuanang-Ku, wuṛṛu winatangnga papadul᷊iananna suṛiwun panenteanna.

¹¹Anambon manu'u winalanganna su panenteanna darotong-Ku lai, wuṛṛu al᷊awo'u riadianna apan mabbiakka su wadda'a mal᷊al᷊angnga.

¹²Amungkangngu i Ya'u mal᷊unussa, salaiwe tawe iwisara-U si yamiu, ana waugu runia wuṛṛu lal᷊oṛṛone udde darotong-Ku.

¹³I Ya'u tawe uminassa ṛemessu sapi esakka, wuṛṛu tawe lai ma'inumma daṛṛan ambinga esakka.

¹⁴Onggola'e sasamba adiangkamanna su Ruata, panipusse paairenu si Tou Apan Atanggaṛṛanne.

¹⁵Salandete si Ya'u sutempon asasusa, i Ya'u sarun mamallossi yamiu, wuṛṛu i yamiu sarun maddalo si Ya'u.”

¹⁶Arawe su taumata lal᷊eo Ruata nabbisara, “I'o tawe wotongnge mabbisaran tita-U, wuṛṛu maggahatton paaire-U.

¹⁷Ana waugu i'o maddiri maddaringikka tatagu-Ku, wuṛṛu mannol᷊a'u manga parenta-Ku.

¹⁸Amungkangu i'o maasilo sangkatou taṛṛa ta'o, i'o tumantalonga si tou, wuṛṛu i'o uahahawen manga taumata sussandaga.

¹⁹I'o sidutu mabbisaran al᷊al᷊eo, wuṛṛu sidutu uasadiaten wawahia.

²⁰I'o sidutu mangngadio'a tuṛṛangngu, wuṛṛu mangngarasa tuṛṛangngu tutune.

²¹Eteudde apan niolangngu, arawe i Ya'u tumba'u mal᷊annaba, nariaddi su ṛingirannu i Ya'u ere lai i'o. Arawe orassa indi i Ya'u mapasal᷊anu, wuṛṛu sarangkanambone udde Ta'u iapal᷊iatta'a si'o.

²²Panutukke, i yamiu apan naabul᷊iten Duata; paatehampe arie ma'oman sara i yamiu Ta'u pateanna, wuṛṛu taweddu manal᷊amatta.

²³Taumata apan mangonggolu sasamba adiangkamanna maola'a sasambane, ete i tou udde mangngaddata si Ya'u; wuṛṛu su taumata apan mannaddia lal᷊anna sarun Ta'u ipantingidda asasal᷊amatta wuassi Ya'u.”